Ọ̀pọ̀ ọ̀dọ́ lara àwọn òbí wọn ṣì le, tí wọn ò sì tíì nílò ìtọ́jú, torí ó lè jẹ́ pé ó dẹ̀yìn ọ̀pọ̀lọpọ̀ ọdún tára àwọn òbí náà bá ti dara àgbà, kí àìsàn tó dé.

 Àmọ́ ká sọ pé ọ̀dọ́ ṣì ni ẹ́ tí dádì tàbí mọ́mì ẹ fi bẹ̀rẹ̀ sí í ṣàìsàn tó le ńkọ́? Wo ohun táwọn ọ̀dọ́ méjì tírú ẹ̀ ṣẹlẹ̀ sí sọ.

•  Ohun tó ṣẹlẹ̀ sí Emmaline

•  Ohun tó ṣẹlẹ̀ sí Emily

 Àrùn kan tó ń jẹ́ Ehlers-Danlos syndrome (EDS) ń ṣe mọ́mì mi. Àwọn oríkèé ara, awọ ara àtàwọn òpó ẹ̀jẹ̀ inú ara ni àrùn yìí máa ń bà jẹ́, ó sì máa ń roni lára gan-an.

 Àìsàn yìí ò gbóògùn, ara mọ́mì ò sì yá rárá. Ṣe ló ń burú sí i láti ọdún mẹ́wàá sẹ́yìn. Kódà, ìgbà míì wà tí ẹ̀mí wọn fẹ́rẹ̀ẹ́ bọ́ torí pé ẹ̀jẹ̀ ara wọn lọlẹ̀ gan-an tàbí tí ìrora wọn dé góńgó débi pé ó ń ṣe wọ́n bíi kí wọ́n tiẹ̀ kú.

 Ẹlẹ́rìí Jèhófà ni èmi àtàwọn ará ilé mi, àwọn ará ìjọ wa sì dúró tì wá gan-an, wọn ò fi ìkankan nínú wa sílẹ̀! Bí àpẹẹrẹ, lẹ́nu àìpẹ́ yìí, ọmọbìnrin kan tó fẹ́rẹ̀ẹ́ tó mi lọ́jọ́ orí fi káàdì kan ránṣẹ́ sí ìdílé wa. Ó lóun fẹ́ jẹ́ ká mọ̀ pé òun nífẹ̀ẹ́ wa, ká sì jẹ́ kó dá wa lójú pé òun máa dúró tì wá. A ti dọ̀rẹ́ ara wa, ó sì ń múnú mi dùn!

 Ìrànlọ́wọ́ tí Bíbélì ń ṣe fún mi ò kéré. Bí àpẹẹrẹ, ọ̀kan lára ẹsẹ Ìwé Mímọ́ tí mo fẹ́ràn jù ni Sáàmù 34:18 tó sọ pé: “Jèhófà sún mọ́ àwọn oníròbìnújẹ́ ní ọkàn-àyà.” Òmíì ni Hébérù 13:6 tó sọ pé: “Jèhófà ni olùrànlọ́wọ́ mi; èmi kì yóò fòyà.”

 Ẹsẹ Ìwé Mímọ́ tí mo mẹ́nu bà ṣìkejì yẹn nítumọ̀ sí mi gan-an. Ohun tó máa ń dẹ́rù bà mí jù ni pé mọ́mì lè kú lọ́jọ́ kan. Mo nífẹ̀ẹ́ wọn gan-an, mo sì máa ń dúpẹ́ lójoojúmọ́ pé a ṣì jọ wà. Ẹsẹ Bíbélì yẹn jẹ́ kí n mọ̀ pé ohun yòówù kó ṣẹlẹ̀, Ọlọ́run máa dúró tì mí, torí náà, kò sídìí tó fi yẹ kí n máa bẹ̀rù.

 Nǹkan míì tún wà tó máa ń dẹ́rù bà mí. Ṣé ẹ rí i, tí obìnrin kan bá ní irú àrùn yìí, tó wá bímọ, ọmọ náà máa kó o lára ẹ̀. Ohun tó fà á tí mọ́mì mi fi ní àrùn yẹn nìyẹn, wọ́n kó o látara ìyá wọn. Ẹ sì ti mọ ohun tó túmọ̀ sí fún èmi náà, mo ti kó o lára mọ́mì. Àmọ́ Hébérù 13:6 fi dá mi lójú pé Jèhófà máa tún jẹ́ “olùrànlọ́wọ́ mi” lọ́tẹ̀ yìí.

 Ohun tí mò ń ṣe báyìí ni pé mo mọyì ohun tí mo ní lọ́wọ́lọ́wọ́, mi ò da ara mi láàmú nípa ohun tó ti ṣẹlẹ̀ kọjá, mi ò sì yọ ara mi lẹ́nu nípa ohun tó máa ṣẹlẹ̀. Ká sòótọ́, tí mo bá ń rántí àwọn ohun tí mọ́mì máa ń ṣe tẹ́lẹ̀ àmọ́ tí wọn ò lè ṣe mọ́ báyìí, ó máa ń bà mí nínú jẹ́. Àmọ́ Bíbélì sọ pé àwọn àdánwò tá à ń kojú jẹ́ “fún ìgbà díẹ̀,” ó sì “fúyẹ́” tá a bá fi wé ìgbà tá a máa wà láàyè títí láé, tá ò sì ní ṣàìsàn mọ́.​—2 Kọ́ríńtì 4:​17; Ìṣípayá 21:​1-4.

 Ronú nípa èyí: Kí ló ń jẹ́ kí Emmaline mọ́kàn, kó sì máa retí pé nǹkan ṣì máa dáa? Kí ló lè jẹ́ kí ìwọ náà mọ́kàn tí nǹkan bá nira fún ẹ, kó o sì máa retí pé nǹkan ṣì máa dáa?

 Ìgbà tí mo wà nílé ẹ̀kọ́ girama ni ìṣesí dádì mi kọ́kọ́ yí pa dà bìrí, tí wọ́n bẹ̀rẹ̀ sí í soríkọ́. Àfi bíi pé kì í ṣe dádì tí mo mọ̀ tẹ́lẹ̀! Àtìgbà yẹn ni ìbànújẹ́ ti máa ń dorí dádì mi kodò, tí ẹ̀rù máa ń bà wọ́n láìnídìí, tí wọ́n á sì dédé máa kọ́kàn sókè. Ó ti tó ọdún mẹ́ẹ̀ẹ́dógún [15] báyìí tí wọ́n ti ń bá a yí. Ó máa ń dùn wọ́n gan-an pé àwọn ò láyọ̀, ìbànújẹ́ ni ṣáá, bẹ́ẹ̀ kò sóhun tó fà á, inú wọn kàn máa ń bà jẹ́ náà ni!

 Ẹlẹ́rìí Jèhófà ni wá, àwọn ará ìjọ wa sì dúró tì wá gbágbáágbá. Èèyàn dáadáa ni wọ́n, ọ̀rọ̀ wa sì yé wọn dáadáa. Ẹnikẹ́ni ò ṣe ohunkóhun rí tó máa jẹ́ kí dádì mi máa rò pé àwọn ò wúlò nínú ìjọ. Ohun tó ń ṣe dádì mi yìí ò rọrùn, àmọ́ wọ́n ń fara dà á, ìyẹn sì ti jẹ́ kí n túbọ̀ nífẹ̀ẹ́ wọn gan-an ju ti tẹ́lẹ̀ lọ.

 Mo rántí ìgbà tí àìsàn yìí ò tíì máa ṣe dádì, tí wọn kì í kọ́kàn sókè, tára ò máa ni wọ́n, mo rántí ìgbà tínú wọn ṣì máa ń dùn. Ọ̀rọ̀ wọn wá dà bí ẹni ń bá ẹni tí ò rí jà, ó máa ń ká mi lára gan-an kí n máa rí bí wọ́n ṣe ń jẹ̀rora lójoojúmọ́.

 Láìka gbogbo ìyẹn sí, dádì ń sapá gan-an kí wọ́n má bàa gbé e sára. Lẹ́nu àìpẹ́ yìí, nígbà tọ́rọ̀ náà dé góńgó, wọ́n pinnu pé àwọn á máa ka Bíbélì lójoojúmọ́, ì báà tiẹ̀ jẹ́ ẹsẹ mélòó kan. Ó sì ràn wọ́n lọ́wọ́ gan-an. Ohun kékeré lèèyàn máa pe ohun tí wọ́n ń ṣe yẹn, àmọ́ ohun tó ń gbẹ̀mí ẹni là ni. Ohun tí dádì ṣe lásìkò yẹn kí wọ́n lè fara dà á wú mi lórí gan-an.

 Ẹsẹ Ìwé Mímọ́ kan tí mo fẹ́ràn ni Nehemáyà 8:​10, tó sọ pé: “Ìdùnnú Jèhófà ni odi agbára yín.” Òótọ́ pọ́ńbélé lọ̀rọ̀ yẹn. Tí mo bá wà nípàdé, tí mo ń fetí sílẹ̀, tí mo sì ń lóhùn sí i, ó máa ń mú kí n láyọ̀ gan-an, ó sì máa ń tù mí nínú. Jálẹ̀ irú àwọn ọjọ́ yẹn, ṣe lára mi máa ń yá gágá. Mo ti kọ́ ọ lára dádì mi pé ohun yòówù ká máa bá fínra, Jèhófà kì í dá wa dáa. Ó máa dúró tì wá.

 Ronú nípa èyí: Báwo ni Emily ṣe ń ran dádì ẹ̀ lọ́wọ́ nígbà tí wọ́n ń ṣàìsàn? Ìrànlọ́wọ́ wo lo lè ṣe fún ẹni tó máa ń soríkọ́?