Toʼon u testigoʼon Jéeobaeʼ k-tsʼáaik ojéeltbil le baʼax tu kaʼansaj Jesúsoʼ, jeʼex tu beetil xan le apóstoloʼoboʼ. Teʼ xookaʼ yaan u tsoʼolol jujunpʼéel tiʼ le baʼaxoʼob k-creerkoʼ.

1.   Dios. K-adorartik le juntúuliliʼ jaajil Diosoʼ, le maas Nojoch Diosoʼ yéetel le Máax beetmil tuláakal baʼaloʼ. U kʼaabaʼeʼ Jéeoba (Salmo 83:18; Apocalipsis 4:11). Letiʼe Dios tu adorartaj xan Abrahán, Moisés yéetel Jesúsoʼ (Éxodo 3:6; 32:11; Juan 20:17).

2.   Le Bibliaoʼ. K-creertik Dios beet u tsʼíibtaʼal le Biblia utiaʼal u yantaltoʼonoʼ (Juan 17:17; 2 Timoteo 3:16). Le baʼaxoʼob k-creerkoʼ chʼaʼan tiʼ le 66 libroʼob yaan teʼ Bibliaoʼ, wa le Tsʼíiboʼob ich Hebreo yéetel le Tsʼíiboʼob ich Griegoo’. Le profesor Jason BeDuhnoʼ tu yaʼaleʼ le Testigoʼoboʼ ku creerkoʼob yéetel ku beetkoʼob le baʼax ku yaʼalik le Bibliaoʼ. Letiʼobeʼ maʼatech u jelbesikoʼob junpʼéel baʼal mix tech u maaskuntikoʼob. a

    Toʼoneʼ k-creertik le baʼax ku yaʼalik le Bibliaoʼ, chéen baʼaleʼ maʼatech t-tuklik wa tuláakal le baʼax ku yaʼalikoʼ jach yaan yúuchul jeʼex tsʼíibtaʼanikoʼ.

3.   Jesús. Toʼoneʼ k-kuxtal jeʼex tu kaʼansil Jesúsoʼ yéetel k-beetik le baʼax tu kaʼansoʼ. Le oʼolal jeʼel u páajtal u yaʼalaʼal u discípuloʼoneʼ (Hechos 11:26). Tsʼoʼoleʼ k-respetartik tumen letiʼ salvartoʼon yéetel k-creertik de ke u Hijo Dios (Mateo 20:28; Hechos 5:31). Le Bibliaoʼ maʼatech u kaʼansik wa Jesúseʼ Dios mix xan wa parte tiʼ le Trinidadoʼ (Juan 14:28).

4.   U Reino Dios. Junpʼéel gobierno yaan teʼ kaʼanoʼ, maʼ tu puksiʼikʼal máak yaniʼ. K-creerkeʼ u gobierno Dioseʼ yaan u tselik u gobierno wíinik yéetel yaan u béeykuntik le baʼax u tukultmaj utiaʼal le Luʼumaʼ (Daniel 2:44; Mateo 6:9, 10). Le baʼaloʼobaʼ jach taʼaytak u yúuchul tumen le profecíaʼob yaan teʼ Bibliaoʼ ku yeʼesik «kuxaʼanoʼon tu tsʼook kʼiinoʼob» (2 Timoteo 3:1-5; Mateo 24:3-14).

    U Reyil le reinoaʼ Jesucristo yéetel 1914 ka káaj u gobernar (Apocalipsis 11:15).

5.   U salvartaʼal máak. Úuchik u kʼubik u kuxtal Jesúseʼ jeʼel u páajtal u perdonartaʼal u kʼeban máakeʼ yéetel jeʼel u kʼamik kuxtal minaʼan u xuuleʼ (Mateo 20:28; Hechos 4:12). Chéen baʼaleʼ utiaʼal u kʼamik máak u yutsileʼ unaj u tsʼáaik u fe tiʼ Jesús, u kʼexik u kuxtal yéetel u yokjaʼ (Mateo 28:19, 20; Juan 3:16; Hechos 3:19, 20). Le baʼaxoʼob ku beetik máakoʼ ku yeʼesik wa yaan u fe (Santiago 2:24, 26). U jaajileʼ chéen yoʼolal u nojoch utsil Dioseʼ jeʼel u páajtal u salvarkuba máakeʼ (Gálatas 2:16, 21).

6.   Le kaʼanoʼ. Jéeoba, Jesucristo yéetel le ángeloʼoboʼ teʼ kaʼan kajaʼanoʼoboʼ (Salmo 103:19-21; Hechos 7:55). b Tsʼoʼoleʼ yaan xan u bin 144, 000 máakoʼob teʼ kaʼan utiaʼal u gobernaroʼob yéetel Jesúsoʼ (Daniel 7:27; 2 Timoteo 2:12; Apocalipsis 5:9, 10; 14:1, 3).

7.   Le Luʼumoʼ. Beetaʼab tumen Dios utiaʼal u kuxtal le máakoʼob minaʼan u xuuloʼ (Salmo 104:5; 115:16; Eclesiastés 1:4). Le máaxoʼob ken u beetoʼob le baʼax ku yaʼalik Diosoʼ maʼ tun kʼojaʼantaloʼob yéetel kéen suʼutuk Paraísoil le Luʼumaʼ yaan u kuxtaloʼob minaʼan u xuuliʼ (Salmo 37:11, 34).

8.   U muʼyaj máak yéetel u beetaʼal loob. Le Bibliaoʼ ku yaʼalikeʼ juntúul u ángel Dioseʼ tu tsʼáajuba tu contra. Desde teʼ kʼiinoʼ káaj u muʼyaj máak yéetel u beetaʼal loob (Juan 8:44). Le ángelaʼ tu beetaj xan u tsʼáaikuba tu contra Dios Adán yéetel Eva, ka tsʼaʼab u kʼaabaʼ Diablo yéetel Satanás. Yoʼolal le baʼax tu beetoʼ le máakoʼoboʼ jach yaʼab u muʼyajoʼob (Génesis 3:1-6; Romanos 5:12). Jéeobaeʼ tsʼoʼok u chaʼik tiʼ Satanás ka u beet le baʼax maas maʼalob ku tuklikeʼ, chéen baʼaleʼ ichil junpʼíit kʼiineʼ yaan u pʼáatal minaʼan kʼasaʼanil.

9.   U kíimil máak. Kéen kíimik máakeʼ mix baʼal ku pʼáatal kuxaʼanil tiʼ (Salmo 146:4; Eclesiastés 9:5, 10). Le kimenoʼoboʼ maʼatech u tóokaʼaloʼob tumen Dios tiʼ junpʼéel infierno.

    Yaʼabkach máakoʼob kun kaʼa kuxkíintbil tumen Dios (Hechos 24:15). Chéen baʼaleʼ le máaxoʼob kun kaʼa kuxkíintbiloʼob maʼ tu beetkoʼob le baʼax ku yaʼalik Diosoʼ yaan u xuʼulsaʼaloʼob yéetel mix bikʼin kun kaʼa kuxkíintbiloʼob (Apocalipsis 20:14, 15).

10.   Le familiaoʼ. Jeʼex tu tsʼáajil Dios desde tu káajbaleʼ, chéen unaj u tsʼoʼokol u beel juntúul xiib yéetel juntúul koʼolel, toʼon xaneʼ bey k-ilik beetik teʼ kʼiinoʼobaʼ. Tsʼoʼoleʼ le máaxoʼob tsʼokaʼan u beeloʼoboʼ chéen jeʼel u páajtal u divorciarkubaʼob wa juntúul tiʼ letiʼobeʼ ku yantal baʼax u yil yéetel yaanal máax (Mateo 19:4-9). Toʼoneʼ k-ojleʼ le baʼax ku yaʼalik le Bibliaoʼ jach maʼalobtak, yéetel ku yáantik le familiaʼob utiaʼal ka yanak kiʼimak óolal tiʼoboʼ (Efesios 5:22–6:1).

11.   Le bix k-adorartik Diosoʼ. Maʼatech k-adorartik le cruzoʼ mix uláakʼ imagen (Deuteronomio 4:15-19; 1 Juan 5:21). Leloʼobaʼ chéen wa jaypʼéel tiʼ le bix k-adorartik Diosoʼ:

    •   K-orar tiʼ Dios (Filipenses 4:6).

    •   K-xokik le Bibliaoʼ yéetel k-xakʼalxoktik (Salmo 1:1-3).

    •   K-máansik t-tuukul le baʼax k-kanik teʼ Bibliaoʼ (Salmo 77:12).

    •   K-muchʼikba utiaʼal k-orar, k-xokik le Bibliaoʼ, k-múul kʼaay, k-tsolik baʼax k-naʼatik le kéen k-xok le Bibliaoʼ yéetel k-paklan líiʼsik k-óol (Colosenses 3:16; Hebreos 10:23-25).

    •   K-tsikbaltik baʼax ken u beet u Reino Dios (Mateo 24:14).

    •   K-áantik le máaxoʼob kʼaʼabéet áantajtiʼoboʼ (Santiago 2:14-17).

    •   K-beetik najoʼob tuʼux ku adorartaʼal Dios yéetel k-ilik ka tsʼaʼabak mantenimiento tiʼob (Salmo 127:1).

    •   K-áantaj tuʼux ku yúuchul loob (Hechos 11:27-30).

12.   Bix u meyaj le Testigoʼoboʼ. Cada Testigoeʼ yaan u múuchʼulil wa u yojel tuʼux unaj u muchʼkuba. Cada múuchʼulileʼ ku nuʼuktaʼal tumen uláakʼ Testigoʼob ku yaʼalaʼaltiʼob ancianoʼob. Letiʼobeʼ maʼatech u taaskubaʼob bey u maas nojchiloʼobeʼ yéetel maʼatech u boʼotaʼaloʼob (Mateo 10:8; 23:8). Maʼatech k-tsʼáaik diezmo mix tech k-kʼáatik taakʼin tiʼ u maasil (2 Corintios 9:7). Le meyaj ku beetaʼalaʼ ku béeychajal yéetel taakʼin siibil u beetaʼal yéetel maʼatech u yaʼalaʼal u kʼaabaʼ le máaxoʼob síikoʼ.

     Junmúuchʼ sukuʼunoʼob ku yaʼalaʼaltiʼ Cuerpo Gobernanteeʼ letiʼob nuʼuktik tuláakal le meyaj ku beetaʼal tumen u testigoʼob Jéeoba tiʼ tuláakal yóokʼol kaaboʼ (Mateo 24:45).

13.   K-múuchʼ meyaj. Jeʼel tuʼuxak kajaʼanoʼoneʼ junpʼéeliliʼ baʼal k-creertik (1 Corintios 1:10). K-ilik k-bisikba tubeel kex jeʼel tuʼux kajaʼanoʼoneʼ, kex óotsiloʼon wa kex ayikʼaloʼon (Hechos 10:34, 35; Santiago 2:4). Tsʼoʼoleʼ le baʼax k-chʼaʼtuklik k-beetkoʼ ku nuʼuktaʼal tumen le baʼax ku yaʼalik le Bibliaoʼ (Romanos 14:1-4; Hebreos 5:14).

14.   Le bix k-kuxtaloʼ. Letiʼe yaabilaj péeksikoʼon k-beet tuláakal baʼaloʼ (Juan 13:34, 35). Maʼatech k-beetik junpʼéel baʼax kʼaas u yilik Dios. Le oʼolal toʼoneʼ maʼatech k-chaʼik ka tsʼaʼabaktoʼon kʼiʼikʼ t-wíinklil (Hechos 15:28, 29; Gálatas 5:19-21). K-yaabiltmaj tuláakal máak le oʼolal maʼatech k-bin tiʼ guerraʼob (Mateo 5:9; Isaías 2:4). K-respetartik le gobiernoʼoboʼ yéetel wa yaan baʼax ku yaʼalikoʼob ka k-beet maʼ tu bin tu contra u Tʼaan Dioseʼ k-beetik (Mateo 22:21; Hechos 5:29).

15.   Bix k-ilik u maasil. Jesúseʼ tu yaʼalaj: «Kʼaʼabéet a yaabiltik a wéet máakil jeʼex a yaabiltikabaeʼ». Tu yaʼalaj xaneʼ toʼoneʼ «maʼ yóokʼol kaabiloʼo[niʼ]» (Mateo 22:39; Juan 17:16). Toʼoneʼ maʼatech k-oksikba tiʼ política mix tech u yantal baʼax k-il yéetel le u maasil religiónoʼoboʼ, kex beyoʼ k-tratarkoʼob maʼalob (Gálatas 6:10; 2 Corintios 6:14). Tsʼoʼoleʼ k-respetartik le baʼax ku chʼaʼtuklik u beetik cada máakeʼ (Romanos 14:12).

 Wa a kʼáat a wojéelt uláakʼ baʼaloʼob tu yoʼolal u testigoʼob Jéeobaeʼ ooken teʼ sitio yaantoʼon ich Internetoʼ. Jeʼel u páajtal xan a tsʼíib tu najil Beteleʼ, a bin le tuʼux ku muchʼkuba le Testigoʼoboʼ wa a kʼáatik tiʼ juntúul Testigo a kʼaj óol.