Juan 17:1-26
17 Jesúseʼ ka tsʼoʼok u yaʼalik le baʼaloʼobaʼ tu líiʼsaj u yich kaʼaneʼ ka tu yaʼalaj: «In Yuum, tsʼoʼok u kʼuchul u yorail, beet u alabartaʼal a Paal utiaʼal xan ka u alabartech.+
2 Techeʼ tsʼoʼok a tsʼáaiktiʼ páajtalil tu yóokʼol tuláakal máak,+ letiʼ túuneʼ yaan u páajtal u tsʼáaik kuxtal minaʼan u xuul+ tiʼ tuláakal le máaxoʼob ta kʼubajtiʼoʼ.+
3 Lelaʼ letiʼe baʼax kun tsʼáaik kuxtal minaʼan u xuul+ tiʼ le máakoʼoboʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ,+ bey xan ka u kʼaj óoltoʼob Jesucristo,+ le máax ta túuxtoʼ.
4 Teneʼ tsʼoʼok in alabarkech way luʼumeʼ+ yéetel tsʼoʼok in beetik le meyaj ta kʼubéentajtenoʼ.+
5 Beora túunaʼ, in Yuum, tsʼáaten le páajtalil yaanten kaʼach ta tséeloʼ, le yaanten kaʼach táanil tiʼ u yantal yóokʼol kaaboʼ.+
6 Teneʼ tsʼoʼok in tsʼáaik kʼaj óoltbil a kʼaabaʼ tiʼ le máaxoʼob ta tsʼáajten way yóokʼol kaaboʼ.+ A tiaʼaloʼob kaʼachi chéen baʼaleʼ ta tsʼáajoʼobten, letiʼob xaneʼ tsʼoʼok u beetkoʼob le baʼax ka waʼalikoʼ.
7 Beoraaʼ tsʼoʼok u kʼuchul u yojéeltoʼobeʼ tuláakal le baʼaxoʼob ta tsʼáajtenoʼ tiʼ teech u taal.
8 Tumen le baʼaxoʼob ta waʼalajtenoʼ teneʼ tsʼoʼok in waʼaliktiʼob.+ Letiʼobeʼ tsʼoʼok u kʼamkoʼob yéetel tsʼoʼok u kʼuchul u yojéeltoʼobeʼ jach tu jaajil teen taaljaʼanen tʼaan ta kʼaabaʼ,+ yéetel tsʼoʼok u creerkoʼob teech túuxten.+
9 Kin kʼáat óolal tu yoʼolaloʼob, maʼ táan in kʼáat óolal yoʼolal le yóokʼol kaaboʼ, baʼaxeʼ yoʼolal le máaxoʼob ta tsʼáajtenoʼ tumen a tiaʼaloʼob.
10 Tuláakal xan le baʼaloʼob yaantenoʼ a tiaʼaloʼob,+ yéetel tuláakal le baʼaloʼob yaantechoʼ in tiaʼaloʼob. Letiʼobeʼ tsʼoʼok u alabarkenoʼob.
11 Tsʼoʼoleʼ teneʼ taʼaytak in lukʼul way yóokʼol kaab utiaʼal in bin ta wiknaleʼ, chéen baʼaleʼ letiʼobeʼ way kun pʼáatloʼob teʼ yóokʼol kaabaʼ.+ Le oʼolaleʼ Kiʼichkelem Yuum, kanáantoʼob+ yoʼolal a kʼaabaʼ, le a kʼaabaʼ tsʼoʼok in tsʼáaik kʼaj óoltbiloʼ. Beyoʼ yaan u pʼáatloʼob juntúuliliʼob jeʼex toʼon juntúuliliʼoneʼ.+
12 Le tiaʼanen kaʼach tu yéeteloʼoboʼ tin kanáantoʼob+ yoʼolal le a kʼaabaʼ ta tsʼáajtenoʼ. Teneʼ tsʼoʼok in kanáantkoʼob utiaʼal maʼ u xuʼulsaʼal tiʼ mix juntúuliʼ.+ Chéen baʼaleʼ utiaʼal ka béeychajak baʼax ku yaʼalik a Tʼaaneʼ chéen juntúul tsʼoʼok u kʼastaliʼ,+ tiʼ letiʼeʼ yaan u xuʼulsaʼal.+
13 Beoraaʼ táan in bin ta wiknal, chéen baʼaleʼ mientras tiaʼanen way yóokʼol kaabeʼ táan in waʼalik tuláakal le baʼaloʼobaʼ, utiaʼal beyoʼ ka u yuʼuboʼob le kiʼimak óolal kin wuʼuyikoʼ.+
14 Teneʼ tsʼoʼok in kaʼansiktiʼob le baʼax ka waʼalikoʼ, chéen baʼaleʼ tsʼoʼok u pʼektaʼaloʼob tumen le yóokʼol kaaboʼ, tumen letiʼobeʼ maʼ yóokʼol kaabiloʼobiʼ+ jeʼex teen maʼ yóokʼol kaabileneʼ.
15 Teneʼ kin kʼáatiktech maʼ ka a jóoʼsoʼob tiʼ le yóokʼol kaaboʼ, baʼaxeʼ ka a kanáantoʼob tiʼ le Kʼaasilbaʼaloʼ.*+
16 Letiʼobeʼ maʼ yóokʼol kaabiloʼobiʼ+ jeʼex teen maʼ yóokʼol kaabileneʼ.+
17 Santificartoʼob* tu yoʼolal le jaajoʼ,+ a tʼaaneʼ letiʼ u jaajil.+
18 Jeʼex teech ta túuxten way yóokʼol kaabeʼ teen xaneʼ tsʼoʼok in túuxtikoʼob teʼ yóokʼol kaaboʼ.+
19 Teneʼ tak beoraaʼ tsʼoʼok in pʼáatal santoil, beyoʼ yaan u bin utsil tiʼob yéetel yaan u pʼáatloʼob santoil tu yoʼolal le jaajoʼ.
20 Teneʼ kin kʼáat óolal tiʼ teech maʼ chéen yoʼolal le jeʼeloʼobaʼ, baʼaxeʼ tak tu yoʼolal le máaxoʼob ken u tsʼáa u fejoʼob tiʼ teen yoʼolal le baʼax kun kaʼansbiltiʼoboʼ.
21 Beyoʼ tuláakloʼobeʼ yaan u pʼáatloʼob juntúuliliʼob.+ In Yuum, techeʼ junmúuchʼ yanilech tin wéetel yéetel teneʼ junmúuchʼ yanilen ta wéetel.+ Kin kʼáatiktech xaneʼ ka pʼáatkoʼob junmúuchʼ yaniloʼob t-éetel, beyoʼ le yóokʼol kaaboʼ yaan u creertik teech túuxten.
22 Tsʼoʼoleʼ teneʼ tsʼoʼok in beetik u respetartaʼaloʼob jeʼex úuchik a beetik in respetartaʼaleʼ, utiaʼal beyoʼ ka pʼáatkoʼob juntúuliliʼob jeʼex toʼon juntúuliliʼoneʼ.+
23 Teneʼ junmúuchʼ yanilen tu yéeteloʼob yéetel techeʼ junmúuchʼ yanilech tin wéetel, beyoʼ letiʼobeʼ yaan u pʼáatloʼob juntúuliliʼob. Le yóokʼol kaab túunoʼ yaan u yojéeltik teech túuxten yéetel ta yaabiltoʼob jeʼex úuchik a yaabiltikeneʼ.
24 In Yuum, le máaxoʼob ta tsʼáajtenoʼ in kʼáat ka yanakoʼob xan tin wéetel teʼ tuʼux kin antaloʼ+ utiaʼal ka u yiloʼob le páajtalil tsʼoʼok a tsʼáaiktenoʼ, tumen ta yaabilten táanil tiʼ u káajal yóokʼol kaab.*+
25 In Yuum, techeʼ toj tuláakal baʼax ka beetik. U jaajileʼ le yóokʼol kaaboʼ maʼ kʼuchuk u kʼaj óoltechiʼ,+ chéen baʼaleʼ teneʼ tsʼoʼok in kʼaj óoltikech,+ yéetel le jeʼeloʼobaʼ u yojloʼob teech túuxten.
26 Teneʼ tsʼoʼok in tsʼáaik u kʼaj óoltoʼob a kʼaabaʼ, yéetel yaan u seguer in tsʼáaik kʼaj óoltbil,+ utiaʼal ka u yeʼesoʼob yaabilaj jeʼex le yaabilaj ta weʼesajtenoʼ bey xan utiaʼal ka yanaken junmúuchʼ tu yéeteloʼob».+
Notas
^ Ich griegoeʼ ku yaʼalaʼal kaʼach «le j-Kʼasaʼanoʼ».
^ Lelaʼ u kʼáat u yaʼaleʼ u tsʼaʼabaloʼob junpáayil utiaʼal u meyajtikoʼob Dios.
^ Teʼelaʼ táan u yúuchul tʼaan tiʼ le kʼiinoʼob ka káaj u yantal u paalal Adán yéetel Evaoʼ.
