Hechos 3:1-26
3 Juntéenjeakeʼ bin Pedro yéetel Juan teʼ templo utiaʼal le oración ku beetaʼal teʼ hora nueveoʼ.*
2 Teʼ súutukoʼ táan xan u bisaʼal juntúul máak móoch u yook desde ka síiji. Le máakaʼ sáamsamal kaʼach u bisaʼal teʼ templooʼ yéetel ku pʼaʼatal naatsʼ tiʼ le joonaj ku kʼaabaʼtik Kiʼichkelmoʼ, teʼeloʼ tiʼ ku kʼáatik caridad tiʼ le máaxoʼob ku yookloʼob teʼ templooʼ.
3 Le máakaʼ ka tu yilaj jach nukaʼaj okol Pedro yéetel Juan teʼ templooʼ káaj u kʼáatiktiʼob u caridad.
4 Chéen baʼaleʼ paktaʼab tumen Pedro yéetel Juaneʼ ka aʼalaʼabtiʼ tumen Pedro: «Paktoʼoniʼ».
5 Le máak túunaʼ tu paktoʼobeʼ ka joʼopʼ u páaʼtik u tsʼaʼabal wa baʼax tiʼ.
6 Chéen baʼaleʼ Pedroeʼ tu yaʼalajtiʼ: «Minaʼanten plata mix oro, baʼaxeʼ kin tsʼáaiktech le baʼax yaantenaʼ: ¡Tu kʼaabaʼ Jesucristo le Nazarenooʼ líiʼkech ka xíimbalnakech!».+
7 Ka túun tu machaj le máak tu x-noʼoj kʼaboʼ ka tu líiʼsaj.+ Le máak túunoʼ tu séebaʼanil yanchaj u muukʼ u yook bey xan u kaal u yook.+
8 Letiʼeʼ síitʼnajeʼ ka waʼalaji,+ ka joʼopʼ u xíimbal. Le ka ook tu yéeteloʼob teʼ templooʼ táan u xíimbal, táan u síitʼ yéetel táan u alabartik Dios.
9 Tuláakal le máakoʼoboʼ tu yiloʼob táan u xíimbal yéetel táan u alabartik Dios.
10 Ka tu tsʼáajoʼob cuentaeʼ letiʼe máak suuk kaʼach u kutal u kʼáat caridad teʼ templooʼ, teʼ joonaj ku kʼaabaʼtik Kiʼichkelmoʼ.+ Le máakoʼoboʼ jach jaʼakʼ u yóoloʼob yéetel jach kiʼimakchaj u yóoloʼob yoʼolal le baʼax tsʼoʼok u yúuchloʼ.
11 Le máakoʼ u chʼuymuba kaʼach tiʼ Pedro yéetel tiʼ Juan. Tuláakal túun le máakoʼoboʼ, tumen jach táaj kiʼimak u yóoloʼobeʼ, tu muchʼubaʼob tu yiknaloʼob teʼ lugar ku kʼaabaʼtik u columnaʼob Salomónoʼ.+
12 Ka tu yilaj Pedro lelaʼ tu yaʼalaj tiʼ le máakoʼoboʼ: «Xiibeʼex tiʼ u luʼumil Israel, ¿baʼaxten ku jaʼakʼal a wóoleʼex tu yoʼolal lelaʼ? ¿Baʼaxten bey a paktikoʼoneʼexaʼ? ¿Ka tuklikeʼex chéen tiʼ toʼon taal u páajtalil k-beetik lelaʼ? ¿Ka tuklikeʼex wa chéen tumen jach k-tsʼaamaj k-óol meyajt Dios le oʼolal páajchaj u xíimbal le máakaʼ?
13 Maʼ beyiʼ, baʼaxeʼ u Dios k-úuchben taataʼob, u Dios Abrahán, Isaak yéetel Jacobeʼ+ tsʼoʼok u tsʼáaik páajtalil tiʼ Jesús,+ le máax meyajtikoʼ.+ Letiʼeʼ ta kʼubeʼex+ tiʼ Pilato yéetel maʼ ta wóoteʼex ka u jáalkʼabtiʼ.
14 Teʼexeʼ maʼ ta kʼameʼex le máax santo yéetel utsoʼ, yéetel ta sen kʼáateʼex ka jáalkʼabtaʼak juntúul j-kiimsaj wíinik.+
15 Chéen baʼaleʼ ta kíimseʼex le Máax yéeyaʼan utiaʼal u tsʼáaik le kuxtaloʼ.+ Pero letiʼeʼ tsʼoʼok u líiʼsaʼal tumen Dios ichil le kimenoʼoboʼ, yéetel toʼoneʼ k-ojel jach jaaj bey úuchikoʼ.+
16 Le oʼolaleʼ yoʼolal u kʼaabaʼ Jesús yéetel yoʼolal k-fe tiʼ letiʼeʼ le máak a kʼaj óoleʼex yéetel ka wilkeʼexaʼ tsʼoʼok u yantal u muukʼ. Jach beyoʼ tu yoʼolal k-fe tiʼ Jesúseʼ le máakaʼ jeʼex a wilkeʼexaʼ tsʼoʼok u yutstal.
17 Sukuʼuneʼex, beoraaʼ in wojel ta beeteʼex leloʼ tumen maʼ a wojleʼex baʼax ka beetkeʼexiʼ,+ jeʼex xan tu beetil le máaxoʼob gobernarkeʼexoʼ.+
18 Chéen baʼaleʼ yéetel le baʼax úuchoʼ Dioseʼ tu béeykuntaj le baʼaxoʼob tu yaʼalaj úuchjeakil tiʼ le profetaʼob ka u tsikbaltoʼoboʼ. Letiʼobeʼ tu yaʼaloʼobeʼ yaniliʼ u muʼyaj le Cristooʼ.+
19 Le oʼolaleʼ kʼex a tuukuleʼex+ yéetel utskíint a kuxtaleʼex+ utiaʼal ka perdonartaʼak* a kʼebaneʼex.+ Bey túunoʼ Jéeobaeʼ yaan u beetik u yantalteʼex jeetsʼelil,
20 yéetel yaan u túuxtikteʼex Jesús, le Cristo yéeyaʼan a tiaʼaleʼexoʼ.
21 Letiʼeʼ unaj u pʼáatal kaʼan tak ken kʼuchuk u kʼiinil u yutskíintaʼal tuláakal baʼal jeʼex tu kʼubéentil Dios tiʼ u profetaʼob úuchjeakiloʼ.
22 Tak Moiséseʼ tu yaʼalaj: ‹Jéeoba a Dioseʼ yaan u beetik u yantal juntúul profeta ichil a sukuʼuneʼex, juntúul profeta jeʼex teneʼ.+ Teʼex túuneʼ unaj a wuʼuyikeʼex tuláakal le baʼax ken u yaʼalteʼexoʼ.+
23 Le máax maʼ ken u yuʼub u tʼaan le Profetaaʼ yaan u xuʼulsaʼaltiʼ ichil u kaajal Dios›.+
24 Tsʼoʼoleʼ desde profeta Samuel bey xan tuláakal le profetaʼob tsʼoʼok u tʼaanoʼoboʼ tsʼoʼok xan u jach tsʼáaikoʼob ojéeltbil le baʼax kun úuchul teʼ kʼiinoʼobaʼ.+
25 Teʼexeʼ u paalaleʼex le profetaʼoboʼ yéetel tiʼ teʼex pʼaʼat le pacto* tu beetaj Dios yéetel a úuchben taataʼex+ le ka tu yaʼalaj tiʼ Abrahán: ‹Tu yoʼolal a chʼiʼibaleʼ* yaan u bendecirtaʼal tuláakal le familiaʼob yanoʼob way luʼumeʼ›.+
26 Dioseʼ ka tsʼoʼok u yéeyik le Profetaoʼ* yáax ta wiknaleʼex+ tu túuxtaj utiaʼal ka u bendecirteʼex, yéetel utiaʼal ka u náachkunteʼex tiʼ le baʼaloʼob kʼaastak ka beetkeʼexoʼ».
Notas
^ Kex láas 3:00 u chíinil kʼiin. Úuchjeakileʼ le horaʼoboʼ ku káajal u xoʼokol desde ken tíipʼik kʼiin.
^ Ich griegoeʼ ku yaʼalaʼal kaʼach «utiaʼal ka tuʼupuk».
^ Wa «acuerdo».
^ Wa «descendenciaeʼ».
^ Teʼelaʼ táan u tʼaan tiʼ Jesús.
