Salmos 77:1-20
Utiaʼal máax ku nuʼuktaj. Jedutún. Le kʼaayaʼ Asaf tsʼíibte.+
77 Yaan in kʼáatik áantaj tiʼ Dios.
Tiʼ Dios ken in kʼáat áantaj, letiʼ túuneʼ yaan u yuʼubiken.+
2 Tu kʼiinil táan in muʼyajeʼ kin kaxtik Jéeoba.+
Bul áakʼab in tichʼmaj in kʼab tu tojil.
Maʼ tu páajtal u líiʼsaʼal in wóol.
3 Teneʼ ku kʼaʼajalten baʼaxoʼob ku beetik Dios yéetel kin tsʼíiboltik ka u yeʼesten u yutsil.+
Teneʼ chiʼichnaken yéetel tsʼoʼok u pʼáatal minaʼan in muukʼ.+ (Séla)
4 Maʼ ta chaʼik u múutsʼul in wich.
Jach yaj baʼax ku yúuchulten, hasta maʼ tu páajtal in tʼaan.
5 Kin tuukul tiʼ le baʼaxoʼob uchaʼan úuchjeakiloʼ,+tiʼ le baʼaloʼob tsʼoʼok yaʼab años úuchkoʼ.
6 De áakʼabeʼ ku kʼaʼajalten le kʼaay kin beetik kaʼachoʼ.+
Kin búuyul tin tuukul.+
Kin máansik tin tuukul tuláakal baʼal.
7 ¿Yaan wa u xúumpʼatkoʼon Jéeoba?+
¿Mix bikʼin wa u kaʼa eʼesiktoʼon u yutsil?+
8 ¿Mix bikʼin wa u kaʼa eʼesiktoʼon u nojoch yaabilaj?
¿Mix bikʼin wa u beetik le baʼax tsʼoʼok u prometerkoʼ?
9 ¿Tsʼoʼok wa u tuʼubul tiʼ Dios u yeʼesik u yutsil?+
¿Tsʼoʼok wa u xuʼulul u chʼaʼik óotsilil tumen jach pʼujaʼan? (Séla)
10 ¿Kʼaʼabéet wa u seguer in waʼalik: «Jach táaj chiʼichnaken+tumen le Maas Nojoch Diosoʼ tsʼoʼok u xuʼulul u yáantkoʼon»?
11 Jéeoba,* yaan in kʼaʼajsik le baʼaxoʼob a beetmoʼ.
Yaan in kʼaʼajsik tuláakal le nukuch baʼaloʼob a beetmaj úuchjeakiloʼ.
12 Yaan in tuukul tiʼ tuláakal le meyajoʼob ka beetkoʼ,yaan in máansik tin tuukul le baʼaxoʼob ka beetkoʼ.+
13 In Dios, a beeloʼobeʼ jach limpio yaniloʼob.
In Dios, minaʼan uláakʼ dios jeʼex techeʼ.+
14 Teech u jaajil Dios, ka beetik nukuch baʼaloʼob,+tsʼoʼok a weʼesik tiʼ le kaajoʼob bukaʼaj a poderoʼ.+
15 Yéetel a podereʼ* ta salvartaj a kaajal,+u paalal Jacob yéetel u paalal José. (Séla)
16 In Dios, tu yilech le kʼáaʼnáaboʼ.
Ka tu yilech le kʼáaʼnáaboʼ tu woʼoltuba u jaʼil.+
Tu woʼoltuba le taamkach jaʼoʼ.
17 Káaj u kʼáaxal jaʼ,kíilbalnaj le múuyaloʼ,léembalnaj le rayoʼoboʼ, beyoʼob flechaʼob ku kʼakʼatmáanoʼobeʼ.+
18 Kíilbalnaj le cháak+ jeʼex u juum u ruedailoʼob u carroiloʼob baʼateleʼ.
Sáasilchaj le luʼum tu yoʼolal le rayoʼoboʼ.+
Kíilbalnaj le luʼumoʼ, tu tíituba.+
19 Ta beetaj a beel ich kʼáaʼnáab,+ta beetaj a beel ich yaʼabkach jaʼ,pero maʼ páajchaj u yilaʼal tuʼux máanechiʼ.
20 Ta bisaj a kaajal jeʼex u bisaʼal tamanoʼobeʼ,+ta waʼalaj ka kanáantaʼakoʼob tumen* Moisés yéetel Aarón.+
Notas
^ Ich hebreoeʼ ku yaʼalaʼal kaʼach «Jah». Lelaʼ u abreviaciónil le kʼaabaʼ Jéeobaoʼ.
^ Ich hebreoeʼ ku yaʼalaʼal kaʼach «a kʼabeʼ».
^ Ich hebreoeʼ ku yaʼalaʼal kaʼach «ta pʼatoʼob tu kʼab».