Santiago 2:1-26
2 In sukuʼuneʼex, wa teʼex a tsʼaamaj a fejeʼex tiʼ kiʼichkelem Yuumtsil Jesucristoeʼ, ¿baʼaxten túun ka yéeyikeʼex tiʼ máaxoʼob ken a weʼes a wutsileʼex?+
2 Wa le tuʼux muchʼukbaleʼex ku yokol juntúul máak chuup u kʼab yéetel anilloʼob de oro yéetel u búukintmaj junpʼéel jatsʼuts nookʼ, chéen baʼaleʼ ku yokol xan juntúul máak óotsil yéetel éekʼ u nookʼeʼ,
3 teʼexeʼ maas maʼalob a wilkeʼex le máax u búukintmaj le jatsʼuts nookʼoʼ yéetel ka waʼalikeʼextiʼ: «Techeʼ kulen teʼ jach maʼalob lugaraʼ». Chéen baʼaleʼ tiʼ le óotsiloʼ ka waʼalikeʼex: «Techeʼ pʼáatkech waʼatal teʼelaʼ», wa ka waʼalikeʼex xan: «Techeʼ kulen tu tséel le kʼáancheʼ tuʼux kin tʼalkúuntik in wookoʼ».+
4 Wa bey a beetkeʼexoʼ, ¿maʼ wa túun tsʼoʼok a pʼáatleʼex jeʼex le kʼasaʼan juezoʼob+ chéen ku yeʼesik u yutsiloʼob tiʼ junjaats máakoʼoboʼ?+
5 In yaabilaj sukuʼuneʼex, uʼuyeʼex lelaʼ, Dioseʼ tu yéeyaj le máaxoʼob óotsiloʼob tu táan u máakiloʼob yóokʼol kaab utiaʼal ka ayikʼalchajkoʼob yéetel fe,+ utiaʼal beyoʼ ka u kʼamoʼob le Reino u yaʼalmaj Dios u tsʼáaik tiʼ le máaxoʼob yaabiltmiloʼ.+
6 Chéen baʼaleʼ teʼexeʼ tsʼoʼok a mixbaʼalkúuntikeʼex le máak óotsiloʼ. ¿Maʼ wa letiʼe ayikʼal máakoʼob loobiltikeʼex+ yéetel ku jíiltik u biseʼex tu táan le juezoʼoboʼ?
7 ¿Maʼ wa letiʼob ku tʼaanoʼob tu contra u kiʼichkelem kʼaabaʼ le máax tʼaneʼexoʼ?
8 Le oʼolaleʼ wa ka tsʼoʼokbeskeʼex le nojoch ley* ku yaʼalik: «Kʼaʼabéet a yaabiltik a wéet máakil jeʼel bix a yaabiltikabaeʼ»,+ jach maʼalob baʼax ka beetkeʼex.
9 Chéen baʼaleʼ wa maʼ tu xuʼulul a weʼeskeʼex utsil chéen tiʼ junjaats máakoʼobeʼ+ táan a kʼebantaleʼex, yéetel le leyoʼ ku yeʼesik kʼasaʼan máakeʼex.+
10 Wa yaan máax táan u tsʼoʼokbesik tuláakal le Leyoʼ chéen baʼaleʼ ku fallar tiʼ junpʼéel baʼax ku yaʼalik le Leyoʼ u jaajileʼ tsʼoʼok u tsʼáaikuba tu contra tuláakal le Leyoʼ.+
11 Tumen le máax aʼal: «Maʼ unaj a tusik a núupiʼ»*+ tu yaʼalaj xan: «Maʼ unaj a kíimsik mix máakiʼ».+ Bey túunoʼ wa maʼ ta tusik a núup chéen baʼaleʼ ka kíimsik wa máaxeʼ tsʼoʼok a bin tu contra le leyoʼ.
12 Seguernak a tʼaaneʼex yéetel a kuxtaleʼex jeʼex u beetik le máaxoʼob kun juzgarbiloʼob tumen le ley ku jáalkʼabtik máakoʼ.+
13 Tumen máax maʼatech u chʼaʼik óotsilileʼ maʼ xan kun chʼaʼabil óotsilil tiʼ kéen juzgartaʼak.+ Tumen u chʼaʼabal óotsilileʼ nojoch baʼal u yilaʼal le kéen juzgartaʼak máak.
14 In sukuʼuneʼex, wa yaan máax ku yaʼalik yaan u fe, chéen baʼaleʼ maʼ tu yeʼesik yéetel baʼaxoʼob ku beetkeʼ, ¿baʼax utsil ku taasik leloʼ?+ ¿Máasaʼ maʼ kun salvarbil tumen le fe yaantiʼoʼ?+
15 Koʼox aʼalikeʼ tiʼ juntúul sukuʼun wa juntúul kiikeʼ minaʼan le nookʼ yéetel le janal kʼaʼabéettiʼ utiaʼal le kʼiinoʼ,
16 chéen baʼaleʼ juntúul ichileʼexeʼ ku yaʼaliktiʼ: «Xiʼiktech utsil, tepʼaba yéetel jaanen tubeel», chéen baʼaleʼ wa maʼ ta tsʼáaikeʼex baʼax kʼaʼabéettiʼeʼ, ¿baʼax u biilal leloʼ?+
17 Bey túun xanoʼ wa maʼ t-beetik mix baʼal utiaʼal k-eʼesik yaantoʼon fejeʼ k-fejeʼ kimen yanil.+
18 Maʼ xaaneʼ yaan máax jeʼel u yaʼalikeʼ: «Techeʼ yaan a fe, teneʼ kin beetik baʼaloʼob maʼalobtak. Techeʼ maʼ tu páajtal a weʼesik wa yaan a fe tumen maʼatech a beetik baʼaloʼob maʼalobtak, pero teneʼ jeʼel u páajtal in weʼesik yaan in fe yéetel le baʼaxoʼob kin beetkoʼ».
19 Techeʼ ka creertik chéen juntúul Dios yaan, ¿máasaʼ? Jach maʼalob baʼax ka beetik. Chéen baʼaleʼ tak le demonioʼob creertik leloʼ yéetel ku kikilankiloʼob tumen jach saajkoʼob.+
20 Chéen baʼaleʼ, j-maʼ naʼat, ¿maʼ wa a wojleʼ le fe maʼatech u yeʼesaʼaloʼ mix baʼal u biilal?
21 ¿Maʼ wa aʼalaʼab toj u kuxtal k-taata Abrahán tu yoʼolal le baʼax tu beetoʼ? Letiʼeʼ tu tsʼáaj Isaak, u hijo, yóokʼol le altar utiaʼal u kʼuboʼ.+
22 Jeʼex a wilkeʼexoʼ yéetel le baʼax tu beetoʼ tu yeʼesaj yaan u fe. Bey túunoʼ u fejeʼ jach chúukaʼanchaj tu yoʼolal baʼaxoʼob tu beetaj.+
23 Béeychaj túun le baʼax ku yaʼalik u Tʼaan Diosaʼ: «Abraháneʼ tu tsʼáaj u fe tiʼ Jéeobaeʼ ka ilaʼab bey juntúul máak toj u kuxtaleʼ»,+ le oʼolal aʼalaʼabtiʼ «u amigo Jéeoba».+
24 Jeʼex a wilkeʼexoʼ juntúul máakeʼ ku yaʼalaʼal toj u kuxtal tu yoʼolal le baʼaloʼob maʼalobtak ku beetkoʼ, maʼ chéen tu yoʼolal u fejiʼ.
25 Bey túun xanoʼ, Rahab, le koʼolel chéen bey u máanoʼ, ¿maʼ wa aʼalaʼab toj u kuxtal tu yoʼolal le baʼaloʼob maʼalobtak tu beetoʼ? Letiʼeʼ tu kʼamaj tu yotoch le máaxoʼob binoʼob u chʼúuktoʼob le kaajoʼ, yéetel tu yaʼalajtiʼob ka u chʼaʼob yaanal bej.+
26 U jaajileʼ junpʼéel wíinklil minaʼan u muukʼil u kuxtaleʼ kimen yanil,+ le fe xanoʼ wa maʼ tu yeʼesik máak yéetel baʼaxoʼob ku beetkeʼ kimen yanil.+
Notas
^ Ich griegoeʼ ku yaʼalaʼal kaʼach «u ley le rey».
^ Lelaʼ u kʼáat u yaʼal u yantal baʼax u yil juntúul íichamtsil wa juntúul atantsil yéetel máax maʼ u núupiʼ.
