XOOK 15
¿Baʼax meyajiloʼob ku beetik le ancianoʼob teʼ múuchʼuliloʼ?
Ichil u j-jaajkunajoʼob Jéeobaeʼ maʼatech u boʼotaʼal le máaxoʼob ku kaʼansajoʼoboʼ. Baʼaleʼ jeʼex beetaʼabik teʼ yáax siglooʼ, ku tsʼaʼabal ancianoʼob noʼojaʼanoʼob utiaʼal ka u kanáantoʼob «u múuchʼulil Dios» (Baʼaxoʼob 20:28). Letiʼob nuʼuktik yéetel kanáantik le múuchʼuliloʼoboʼ, lelaʼ ku beetkoʼob yéetel kiʼimak óolal maʼ tumen táan u obligartaʼaloʼobiʼ mix tumen u kʼáat u náajaltoʼob taakʼin chéen beyoʼ, baʼaxeʼ jach ku tsʼáaik u yóol u beetoʼob le meyajaʼ (1 Pedro 5:1-3). ¿Baʼax ku beetkoʼob utiaʼal k-utsil?
Ku kanáantkoʼonoʼob. Le ancianoʼoboʼ ku nuʼuktikoʼob yéetel ku kanáantkoʼob le múuchʼulil utiaʼal ka pʼáatak naatsʼ tiʼ Jéeobaoʼ. Tumen u yojloʼob Dios tsʼaamil u beetoʼob le meyaj jach kʼaʼanaʼanaʼ, maʼatech u yilkoʼob ka beetaʼak chéen baʼax u kʼáatoʼob, baʼaxeʼ ku kaxtikoʼob k-utsil yéetel k-kiʼimak óolal (2 Corintoiloʼob 1:24). Jeʼel bix juntúul j-kanan taman ku yilik u jach kanáantik cada juntúul tiʼ le mejen tamanoʼoboʼ, le ancianoʼoboʼ ku yilik u kʼaj óoltikoʼob cada juntúul tiʼ le máaxoʼob yanoʼob teʼ múuchʼuliloʼ (Proverbios 27:23).
Ku kaʼanskoʼonoʼob k-beet baʼax u kʼáat Dios. Cada semanaeʼ, le ancianoʼoboʼ ku nuʼuktikoʼob le muchʼtáambaloʼob ku beetaʼal teʼ múuchʼuliloʼ, lelaʼ ku beetaʼal utiaʼal u muʼukʼaʼantal k-fe (Baʼaxoʼob 15:32). Letiʼobeʼ jach u kʼubmaj u yóol u meyajtoʼob Dios, ku nuʼuktikoʼob xan le kʼaʼaytajoʼ, ku kʼaʼaytajoʼob t-éetel yéetel ku yaʼalikoʼob bix jeʼel u páajtal k-beetik maas maʼalobeʼ.
Ku líiʼskoʼob u yóol cada juntúul. Utiaʼal u yáantkoʼob cada juntúul tiʼ toʼon u maas meyajt Dioseʼ, le ancianoʼoboʼ ku bin u xíimbaltoʼonoʼob t-otoch yéetel ku tsikbaloʼob t-éetel teʼ Najil Reinooʼ. Ku líiʼskoʼob k-óol bey xan ku yáantkoʼonoʼob yéetel le baʼax ku yaʼalik le Bibliaoʼ (Santiago 5:14, 15).
Tsʼoʼoleʼ kex jejeláas meyaj ku beetik le ancianoʼob teʼ múuchʼuliloʼ, u maas yaʼabil tiʼ letiʼobeʼ ku meyajoʼob utiaʼal u tsʼáaikoʼob baʼaxoʼob kʼaʼabéet tiʼ u familiaʼob bey xan ku kanáantkoʼob. Jach unaj k-eʼesik tsiikil tiʼ le sukuʼunoʼob jach yaʼab meyaj ku beetkoʼobaʼ (1 Tesalonicailoʼob 5:12, 13).
-
¿Baʼax meyajiloʼob ku beetik le ancianoʼob teʼ múuchʼuliloʼ?
-
¿Bix u yáantkoʼob cada juntúul tiʼ toʼon?