1 Corintios 1:1-31
1 Teen Pablo, máax tʼaʼan utiaʼal u beetkuba u apóstol+ Cristo Jesús jeʼex u kʼáat Dioseʼ, tiaʼanen yéetel k-sukuʼun Sósteneseʼ.
2 Teneʼ kin tsʼíibtik junpʼéel carta tiʼ teʼex, le u múuchʼulil Dios yaan Corinto+ bey xan tiʼ tuláakal le máaxoʼob táan u chʼaʼchiʼitkoʼob u kʼaabaʼ k-Yuumtsil Jesucristo+ tuláakal tuʼuxoʼ. Jesucristoeʼ u Yuumtsiloʼob yéetel k-Yuumtsil xan. Dioseʼ tsʼoʼok u tʼankeʼex utiaʼal a wantaleʼex junmúuchʼ yéetel Cristo Jesús,+ yéetel tsʼoʼok u yéeyikeʼex utiaʼal ka pʼáatkeʼex santoil.
3 Ka yanakteʼex le nojoch utsil yéetel le jeetsʼelil ku taal tiʼ Dios k-Taataoʼ, bey xan tiʼ Yuumtsil Jesucristooʼ.
4 Mantatsʼ kin tsʼáaik gracias tiʼ in Dios ta woʼolaleʼex úuchik u yeʼesikteʼex u nojoch utsil tu yoʼolal Cristo Jesús.
5 Tumen junmúuchʼ yanileʼex yéetel Cristoeʼ tsʼoʼok u tsʼaʼabalteʼex tuláakal baʼal, tak u páajtalil a tsikbaltikeʼex u tʼaan Dios bey xan a kʼaj óoltikeʼex tubeel u tʼaan Dios.+
6 Bey túunoʼ le baʼax ku máan tsikbaltbil tu yoʼolal Cristooʼ+ tsʼoʼok u jach pʼáatal ta puksiʼikʼaleʼex.
7 Le oʼolal yaan tuláakal baʼax kʼaʼabéetteʼex mientras táan a yaayamtikeʼex u kʼuchul u kʼiinil u yeʼesik u poder k-Yuumtsil Jesucristo.+
8 Dioseʼ yaan u yáantkeʼex utiaʼal ka chúukpajak a wóoleʼex tak tu xuul, utiaʼal maʼ u yantal baʼax oʼolal u taʼakal a pooleʼex tu kʼiinil k-Yuumtsil Jesucristo.+
9 Dios, le máax tʼaneʼex utiaʼal ka a bisabaʼex* yéetel k-Yuumtsil Jesucristo u Paaloʼ, ku béeykuntik baʼax ku yaʼalik.+
10 Beora túunaʼ, sukuʼuneʼex, tu kʼaabaʼ k-Yuumtsil Jesucristoeʼ kin kʼáat óoltik tiʼ tuláakleʼex ka yanakeʼex de acuerdoil le kéen tʼaanakeʼex yéetel maʼ a jatskabaʼex.+ Baʼaxeʼ ka yanakteʼex junpʼéeliliʼ tuukul yéetel ka a chʼaʼtukleʼex junpʼéeliliʼ baʼal.+
11 In sukuʼuneʼex, lelaʼ kin waʼalikteʼex tumen jujuntúul tiʼ le máaxoʼob yanoʼob tu yotoch Cloeoʼ tu yaʼaloʼobteneʼ táan bin a jatskabaʼex.
12 Baʼax in kʼáat in waʼaleʼ, jujuntúul tiʼ teʼexeʼ táan bin u yaʼalik: «Teneʼ u discípuloen Pablo», «Teneʼ u discípuloen Apolos»,+ «Teneʼ u discípuloen Cefas»,* «Teneʼ u discípuloen Cristo».
13 Wa jaajeʼ, u kʼáat u yaʼaleʼ Cristoeʼ jaʼajatspajaʼan. Chéen baʼaleʼ, ¿máasaʼ maʼ Pablo kíimsaʼab tiʼ junpʼéel cheʼ ta woʼolaleʼexiʼ? ¿Tu kʼaabaʼ wa Pablo tsʼaʼab a wokjaʼex?
14 U maʼalobileʼ maʼ teen tsʼáa u yokjaʼ mix juntúul tiʼ teʼexiʼ, chéen Crispo+ yéetel Gayo+ tin tsʼáaj u yokjaʼob,
15 beyoʼ mix máak kun aʼalik wa tin kʼaabaʼ okjaʼanajeʼex.
16 U jaajileʼ tak le máaxoʼob yanoʼob tu yotoch Estéfanas+ tin tsʼáaj u yokjaʼoboʼ. Chéen maʼ kʼajaʼanten wa yaan uláakʼ máaxoʼob tin tsʼáaj u yokjaʼobiʼ.
17 Tumen teneʼ maʼ túuxtaʼaben tumen Cristo utiaʼal ka in tsʼáa okjaʼiʼ, baʼaxeʼ utiaʼal ka in tsikbalt le maʼalob baʼaloʼob ku taal tiʼ Diosoʼ.+ Maʼ túuxtaʼaben utiaʼal ka tʼaanaken jeʼex juntúul máak sen kaʼanchajaʼan u xookeʼ, beyoʼ maʼ ken in taas mix baʼalil le úuchik u kíimil Cristo tiʼ le u cheʼil le muʼyajoʼ.*
18 Tumen le u tsikbaltaʼal kíim Cristo tiʼ u cheʼil le muʼyajoʼ chéen kunel utiaʼal le máaxoʼob táan u kíimloʼoboʼ,+ chéen baʼaleʼ k-tiaʼal toʼon táan k-salvartaʼaleʼ le baʼax ku tsikbaltaʼaloʼ ku yeʼesik u páajtalil Dios.+
19 Tumen tsʼíibtaʼan: «Yaan in beetik u pʼáatal minaʼan u naʼat le máaxoʼob yaan u naʼatoʼoboʼ, yéetel maʼ ken in kʼam* le ojéelal yaan tiʼ le máaxoʼob yaʼab baʼax u yojloʼoboʼ».+
20 ¿Tuʼux túun yaan le máak yaan u naʼatoʼ? ¿Tuʼux yaan le escribaoʼ?* ¿Tuʼux yaan le máax ku baʼateltʼaan tu yoʼolal le yóokʼol kaabaʼ? ¿Maʼ wa tsʼoʼok u pʼatik Dios mix baʼalil le naʼat yaan teʼ yóokʼol kaabaʼ?
21 Le yóokʼol kaaboʼ tumen ku tuklik jach yaan u naʼateʼ maʼ kʼuch u kʼaj óolt Diosiʼ.+ Le oʼolal Dioseʼ yoʼolal le naʼat yaantiʼoʼ+ maʼalob tu yilil ka tsikbaltaʼak junpʼéel baʼax ku tuklaʼal mix baʼal u biilal,+ utiaʼal ka u salvart le máaxoʼob yaan u fejoʼoboʼ.
22 Le judíoʼoboʼ ku kʼáatkoʼob señaloʼob,+ yéetel le griegoʼoboʼ ku kaxtikoʼob naʼatil.
23 Chéen baʼaleʼ toʼoneʼ táan k-tsikbaltikeʼ Cristoeʼ baʼaj tiʼ cheʼ, lelaʼ ku beetik u tʼóochpajal le judíoʼoboʼ, yéetel utiaʼal le j-táanxel luʼumiloʼoboʼ mix baʼal u biilal.+
24 Chéen baʼaleʼ utiaʼal le máaxoʼob tʼanaʼanoʼoboʼ, judíoʼob yéetel griegoʼobeʼ, tiʼ Cristoeʼ ku chíikpajal u páajtalil Dios bey xan u naʼatil Dios.+
25 Tumen junpʼéel baʼax ku taal tiʼ Dios ku tuklaʼal mix baʼal u biilaleʼ, maas yaan u naʼat ke le máakoʼoboʼ; yéetel junpʼéel baʼax ku taal tiʼ Dios ku tuklaʼal minaʼan u muukʼeʼ, maas yaan u muukʼ ke le máakoʼoboʼ.+
26 Tumen jeʼex a wilkeʼexaʼ, sukuʼuneʼex, ichileʼex máaxeʼex tʼanaʼaneʼexeʼ, maʼ tʼaʼan yaʼab máakoʼob ku tuklaʼal yaan u naʼatoʼobiʼ,+ maʼ tʼaʼan yaʼab máakoʼob yaan páajtalil tiʼobiʼ mix xan tʼaʼan yaʼab máakoʼob síijoʼob ich ayikʼaliliʼ;*+
27 baʼaxeʼ Dioseʼ tu yéeyaj le máaxoʼob minaʼan u naʼatoʼob teʼ yóokʼol kaabaʼ utiaʼal u suʼlakkúuntik le máaxoʼob yaan u naʼatoʼoboʼ. Dioseʼ tu yéeyaj xan le máaxoʼob minaʼan u muukʼoʼob teʼ yóokʼol kaabaʼ utiaʼal u suʼlakkúuntik le máaxoʼob yaan u muukʼoʼoboʼ.+
28 Dioseʼ tu yéeyaj le baʼaloʼob mix baʼal u yilaʼal tumen le máakoʼoboʼ: baʼaloʼob minaʼan u biilaloʼob teʼ yóokʼol kaabaʼ yéetel baʼaloʼob pʼektaʼanoʼob, utiaʼal u mixbaʼalkúuntik le baʼaxoʼob kʼaʼanaʼantak utiaʼal le máakoʼoboʼ.+
29 Bey túunoʼ mix máak ka u nojbaʼalkúuntuba tu táan Dios.
30 Chéen baʼaleʼ tu yoʼolal letiʼeʼ teʼexeʼ junmúuchʼ yanileʼex yéetel Cristo Jesús. Jesúseʼ ku yeʼesiktoʼon u naʼat Dios bey xan u justicia Dios.+ Tu yoʼolal Jesúseʼ jeʼel u páajtal k-pʼáatal santoileʼ,+ yéetel letiʼeʼ jeʼel u páajtal u jáalkʼabtikoʼon tiʼ le kʼeban utiaʼal u salvarkoʼonoʼ;+
31 utiaʼal ka béeychajak le baʼax tsʼíibtaʼanaʼ: «Le máax ku nojbaʼalkúuntkubaeʼ u nojbaʼalkúuntuba tu yoʼolal Jéeoba».*+
Notas
^ Wa «táakpajkeʼex».
^ Ku yaʼalaʼal xan Pedro tiʼ.
^ Ilawil «U cheʼil muʼyaj», página 2584.
^ Wa «yaan in tsʼáaik juntséelil».
^ Lelaʼ juntúul máak jach u kʼaj óol baʼax ku yaʼalik le leyoʼ.
^ Wa «ichil u familia tsʼuuloʼobiʼ».
^ Ilawil página 2566.