Yaʼab máakeʼ ku xuʼulul u muchʼkuba tu religión tumen maʼatech u núukaʼal le kʼáatchiʼob yaantiʼob yéetel le Bibliaoʼ mix tech u líiʼsaʼal u yóoloʼob. ¿Baʼaxten unaj a bin teʼ muchʼtáambaloʼob ku beetik u j-jaajkunajoʼob Jéeobaoʼ? ¿Baʼaxoʼob ken a wil ku beetaʼaliʼ?

Yaan u kiʼimaktal a wóol ken yanakech ichil máakoʼob yaan u yaabilajoʼob yéetel utsoʼob. Teʼ yáax siglooʼ, le máaxoʼob tsaypacht Jesusoʼ, tu muchʼubaʼob utiaʼal ka nuʼuktaʼakoʼob, utiaʼal u adorartoʼob Dios, u xokikoʼob u Tʼaan yéetel u paklan líiʼsik u yóoloʼob (Hebreoʼob 10:24, 25). Ken u muchʼubaʼobeʼ, ku yantaloʼob ichil máaxoʼob u yaabiltmubaʼob yéetel jach maʼalob bix u biskubaʼob (2 Tesalonicailoʼob 1:3; 3 Juan 14). Toʼon xaneʼ bey xan k-beetkoʼ, le oʼolal yaantoʼon kiʼimak óolal.

Ku taasik utsiloʼob u kanik máak u beet baʼax ku yaʼalik le Bibliaoʼ. Jeʼex suukaʼanil u beetaʼal úuchjeakileʼ, bejlaʼeʼ le xiiboʼob, le koʼoleloʼob yéetel le paalaloʼoboʼ ku muchʼkubaʼob utiaʼal u yuʼubikoʼob bix jeʼel u tsʼáaikoʼob ichil u kuxtaloʼob le baʼax ku yaʼalik le Bibliaoʼ (Deuteronomio 31:12; Nehemías 8:8). Tuláakal le máaxoʼob ku binoʼob teʼ muchʼtáambaloʼoboʼ jeʼel u páajtal u kʼaayoʼob yéetel u núukikoʼob le kʼáatchiʼob ku beetaʼaloʼ, lelaʼ ku tsʼáaik u páajtalil u tʼaan máak tiʼ le esperanza yaantiʼoʼ (Hebreoʼob 10:23).

Ku tsʼáaik u páajtalil k-muʼukʼaʼankúuntik k-fe tiʼ Dios. Apóstol Pabloeʼ tu yaʼalaj tiʼ junpʼéel múuchʼulil yanchaj teʼ kʼiinoʼob jeʼeloʼ: «Jach taak in wilkeʼex [...] utiaʼal k-paklan líiʼsik k-óoleʼex yoʼolal le fe yaantoʼoneʼexoʼ, utiaʼal beyoʼ ka muʼukʼaʼanchajak a fejeʼex bey xan le fe yaantenoʼ» (Romailoʼob 1:11, 12). K-antal yéetel le sukuʼunoʼob teʼ muchʼtáambaloʼoboʼ, ku muʼukʼaʼankúuntik k-fe yéetel ku yáantkoʼon utiaʼal maʼ u xuʼulul k-beetik baʼax ku yaʼalik le Bibliaoʼ.

¿Bix a wilik wa ka xiʼikech tuláakʼ muchʼtáambal a wil le baʼaxoʼob ku beetaʼaloʼoboʼ? Jach maʼalob kan kʼambiliʼ. Maʼatech u cobrartaʼal u yokol máakiʼ yéetel maʼatech u máan kʼáatbil taakʼiniʼ.

• ¿Bix u beetaʼal le muchʼtáambaloʼoboʼ?

• ¿Baʼax utsiloʼob ku taasik le muchʼtáambaloʼoboʼ?