Eclesiastés 9:1-18
9 Teen túuneʼ tin jach ilaj tuláakal baʼal, ka tin wileʼ tu kʼab u jaajil Dios yaan le utsul máakoʼob yéetel le máaxoʼob yaan u naʼatoʼoboʼ bey xan le baʼaxoʼob ku beetkoʼoboʼ.+ Le máakoʼoboʼ maʼ u yojloʼob bukaʼaj yaabilaj yéetel pʼektajil yanchaj antes tiʼ letiʼobiʼ.
2 Tuláakloʼob junpʼéeliliʼ bix u tsʼoʼokoloʼob.+ Le utsul máak yéetel le kʼasaʼan máakoʼ,+ le máax ku beetik baʼax maʼalob yéetel le máax maʼalob yanil tu táan Diosoʼ bey xan le máax maʼ maʼalob yanil tu táan Diosoʼ. Le máaxoʼob ku beetkoʼob sacrificioʼoboʼ bey xan le máaxoʼob maʼatech u beetkoʼob sacrificioʼoboʼ. Le máax ku beetik baʼax maʼaloboʼ bey jeʼex le máax ku beetik baʼax maʼ maʼaloboʼ. Le máax ku jáan beetik junpʼéel juramentooʼ bey jeʼex le máax maʼ tu jáan beetik junpʼéel juramentooʼ.
3 Lelaʼ junpʼéel baʼal jach yaj ku yúuchul way yóokʼol kaabeʼ: tuláakal máak junpʼéeliliʼ bix u tsʼoʼokol.+ U puksiʼikʼal máakeʼ chuup yéetel baʼaloʼob kʼaastak. Tuláakal u kʼiiniloʼob u kuxtaleʼ bey chokochajaʼan u pooleʼ, kéen tsʼoʼokkeʼ ku kíimil.
4 Jeʼel máaxak kuxaʼaneʼ yaan esperanza tiʼ, tumen juntúul peekʼ kuxaʼaneʼ maas maʼalob yanil ke juntúul kimen león.+
5 Tumen le máaxoʼob kuxaʼanoʼoboʼ u yojloʼob yaan u kíimloʼob,+ pero le kimenoʼoboʼ maʼ u yojloʼob mix baʼaliʼ,+ mix baʼal xan ken u kʼamoʼob,* yéetel yaan u tuʼubsaʼaloʼob.+
6 Tsʼoʼok xan u xuʼulul le yaabilaj yéetel le celos ku yuʼubikoʼob kaʼachoʼ, yéetel wa yaan máax u pʼekmoʼob kaʼacheʼ tsʼoʼok xan u xuʼulul. Junpuliʼ maʼ tu páajtal u beetkoʼob mix junpʼéel tiʼ le baʼaloʼob ku beetaʼal way yóokʼol kaabeʼ.+
7 Xeen, jaant a woʼoch yéetel kiʼimak óolal, ukʼ vino yéetel junpʼéel puksiʼikʼal kiʼimak u yóol,+ tumen u jaajil Dioseʼ tsʼoʼok u yilik maʼalob baʼax ka beetik.+
8 Mantatsʼ ka a búukint sak nookʼ,* yéetel maʼ u xuʼulul a tsʼáaik aceite ta pool.+
9 Kiʼimakchajak a wóol yéetel a watan,+ le máax jach a yaabiltmoʼ. Bey unaj a beetik ichil tuláakal u kʼiiniloʼob a kunel kuxtal tsʼaʼantech tumen Dios way yóokʼol kaabeʼ. Bey unaj a beetik ichil tuláakal u kʼiiniloʼob a kunel kuxtaloʼ, tumen letiʼe boʼol ken a kʼam mientras kuxaʼanechoʼ yéetel letiʼe boʼol ken a kʼam ikil a tsʼáaik a wóol meyaj way yóokʼol kaabeʼ.+
10 Tuláakal baʼax tiaʼan ta kʼab a beetkeʼ, beet yéetel u jaajil a wóol, tumen teʼ Muknal*+ tuʼux ka binoʼ minaʼan meyajiʼ, minaʼan tuukuliʼ, minaʼan kaanbaliʼ yéetel minaʼan naʼatiʼ.
11 Way yóokʼol kaabeʼ tsʼoʼok xan in wilkeʼ le máaxoʼob chich u yáalkaboʼoboʼ maʼ mantatsʼ letiʼob ganartik junpʼéel carreraiʼ, le máaxoʼob yaan páajtalil tiʼoboʼ maʼ mantatsʼ ku ganarkoʼob junpʼéel baʼateliʼ,+ le máaxoʼob yaan u naʼatoʼoboʼ maʼ mantatsʼ yaan baʼal u jaantoʼobiʼ, le máaxoʼob yaʼab baʼal u yojloʼoboʼ maʼ mantatsʼ yaan ayikʼalil tiʼobiʼ,+ le máaxoʼob kaanbalnajaʼanoʼoboʼ maʼ mantatsʼ ku bin utsil tiʼobiʼ,+ tumen tiʼ tuláakal máak junsúutuk u jáan úuchul wa baʼax.
12 Máakeʼ maʼ u yojel baʼax kʼiin u kíimiliʼ.+ Jeʼex u lúubul le kayoʼob tiʼ junpʼéel red yéetel jeʼex u lúubul le chʼíichʼoʼob tiʼ junpʼéel trampaoʼ bey xan u lúubul máak tiʼ junpʼéel nojoch loobiloʼ, chéen ken jáan taalak tu yóokʼol.
13 Teen xaneʼ kʼuchen in wil uláakʼ junpʼéel baʼal yoʼolal le naʼat yaan way yóokʼol kaabeʼ, lelaʼ jach tu beetaj u jaʼakʼal in wóol:
14 yaan kaʼach junpʼéel kaajeʼ chéen junpʼíit xiiboʼob yaniʼ. Ka túun taal baʼateltbil tumen juntúul rey jach yaan páajtalil tiʼ. Le reyoʼ tu baʼpachtaj le kaajoʼ, jejeláas baʼax tu beetaj utiaʼal u kʼalik u paach.
15 Teʼ kaajoʼ ilaʼab juntúul máak óotsil pero yaan u naʼat, letiʼ túuneʼ tu salvartaj le kaaj yoʼolal u naʼatoʼ, pero ka máan kʼiineʼ tuʼubsaʼab le máakoʼ.+
16 Teen túuneʼ tin waʼalaj: «Maas maʼalob le naʼat ke le páajtaliloʼ,+ chéen baʼaleʼ le naʼat yaan tiʼ juntúul máax óotsiloʼ mix baʼal u yilaʼal, yéetel maʼatech u beetaʼal u cuentail baʼax ku yaʼalik».+
17 Maas maʼalob ka u chʼenxikint máak u chaambel tʼaan le máax yaan u naʼatoʼ ke u yawat tʼaan le máax ku gobernar tu yóokʼol le j-maʼ naʼatoʼoboʼ.
18 Le naʼatoʼ maas maʼalob ke u nuʼukuliloʼob baʼateʼel, pero tak chéen juntúul máax ka u beet baʼax maʼ maʼalobeʼ jeʼel u kʼaskúuntik yaʼab baʼaloʼob maʼalobtakeʼ.+
Notas
^ Wa «náajaltoʼob».
^ U kʼáat u yaʼaleʼ junpʼéel nookʼ ku yeʼesik kiʼimak u yóol máak, maʼ junpʼéel nookʼ ku yeʼesik yaachajaʼan u yóol máakiʼ.
^ Ilawil página 2572.
