Jach tu jaajil yaan. Letiʼeʼ juntúul ángel yaan kaʼach teʼ kaʼanoʼ, chéen baʼaleʼ tu tsʼáajuba tu contra Dios. Le Bibliaoʼ ku yaʼalikeʼ letiʼ «u gobernanteil le yóokʼol kaaboʼ» (Juan 14:30; Efesios 6:11, 12). Ku yaʼalik xaneʼ le Kʼaasilbaʼaloʼ yaan uláakʼ u kʼaabaʼob eʼesik jach bix letiʼ. Koʼox ilik jujunpʼéel bix u yaʼalaʼaltiʼ:

•   Satanáseʼ u kʼáat u yaʼal «máax ku tsʼáaikuba tu contra uláakʼ» (Job 1:6).

•   Diabloe’ u kʼáat u yaʼal «j-líiʼsaj tʼaan» (Apocalipsis 12:9).

•   Le Kaanoʼ, teʼ Bibliaoʼ u kʼáat u yaʼal «juntúul máak u yojel tuus» (2 Corintios 11:3).

•   Kʼaasilbaʼal (Mateo 4:3).

•   U taatail le tuusoʼ (Juan 8:44).

Le Kʼaasilbaʼaloʼ maʼ chéen ku chíikbesik baʼax kʼaasiʼ

 Yaan máaxoʼob tuklikeʼ le Kʼaasilbaʼaloʼ letiʼe kʼasaʼanil ku yeʼesik máakoʼ, hasta ku yaʼalikoʼobeʼ letiʼe kʼasaʼanil ku yeʼesik Dios binoʼ. Chéen baʼaleʼ Dioseʼ perfecto yéetel minaʼan mix junpʼíit kʼasaʼanil tiʼ. Tsʼoʼoleʼ le Bibliaoʼ ku yaʼalikeʼ juntéenjeakeʼ Dioseʼ tsikbalnaj yéetel le Kʼaasilbaʼaloʼ (Deuteronomio 32:4; Job 2:1-6). Juntéenjeak xaneʼ le Kʼaasilbaʼaloʼ tu tsʼáaj a pruebail Jesús, juntúul máak perfecto (Mateo 4:8-10; 1 Juan 3:5). Jeʼex túun k-ilkoʼ le Bibliaoʼ jach claro u yaʼalikeʼ le Kʼaasilbaʼaloʼ jach tu jaajil yaan, maʼ chéen ku yaʼalaʼaliʼ.

 Yaʼab máaxoʼob aʼalikeʼ maʼ jaaj wa yaan le Kʼaasilbaʼaloʼ. Chéen baʼaleʼ, ¿jach wa jaaj le baʼax ku yaʼalikoʼoboʼ? Junpuliʼ maʼ jaajiʼ. Le Bibliaoʼ ku yaʼalikeʼ le Kʼaasilbaʼaloʼ jejeláas bix u tusik máak utiaʼal ka creertaʼak baʼax ku yaʼalik (2 Tesalonicenses 2:9, 10). Satanáseʼ jach uts tu tʼaan u tusik máak utiaʼal u beetik u creertaʼal minaʼan letiʼ (2 Corintios 4:4).

  Baʼax ku creertaʼal: Lucifereʼ uláakʼ u kʼaabaʼ le Kʼaasilbaʼaloʼ.

 U jaajil: Le tʼaan ich hebreo «Lucifer» ku chíikpajal tiʼ jujunpʼéel bibliaʼoboʼ u kʼáat u yaʼal «ku léetsʼbal» (Isaías 14:12). Le tʼaanaʼ ku chíikpajal tiʼ junpʼéel profecía tuʼux ku yúuchul tʼaan tiʼ u familia u reyiloʼob Babilonia. Letiʼobeʼ mixbaʼalkuntaʼaboʼob tumen Dios tumen jach ku creerkubaʼob kaʼachi (Isaías 14:4, 13-20). Le oʼolaleʼ utiaʼal u pʼaʼastaʼaloʼob úuchik u xuʼulsaʼaloʼobeʼ le profecíaoʼ tu yaʼalaj tu yoʼolaloʼob: «Le estrella ku léetsʼbaloʼ».

  Baʼax ku creertaʼal: Le Kʼaasilbaʼaloʼ juntúul u j-meyaj Dios.

 U jaajil: Le Kʼaasilbaʼaloʼ u enemigo Dios, maʼ juntúul u j-meyajiʼ. Satanáseʼ u enemigo xan le máaxoʼob meyajtik Diosoʼ, le oʼolal ku chʼaʼpachtikoʼob yéetel ku beetik u yaʼalaʼal baʼaloʼob maʼ jaajtak tu contraʼobiʼ (1 Pedro 5:8; Apocalipsis 12:10).