Juan 20:1-31
20 Jach jaʼatskab tu yáax kʼiinil le semanaoʼ María Magdalenaeʼ bin teʼ muknaloʼ,+ láayliʼ éeʼjochʼeʼeneʼ, ka tu yilaj luʼsaʼan le tuunich tu jool le muknaloʼ.+
2 Ka túun bin áalkabil tu yiknal Simón Pedro bey xan tu yiknal le discípulo yaabiltaʼan tumen Jesúsoʼ,+ ka tu yaʼalajtiʼob: «Tsʼoʼok u luʼsaʼal Yuumtsil teʼ muknaloʼ,+ tsʼoʼoleʼ maʼ k-ojel tuʼux tsʼaʼabiʼ».
3 Pedro yéetel le uláakʼ juntúul discípulo túunoʼ binoʼob teʼ tuʼux yaan le muknaloʼ.
4 Tu kaʼatúulaloʼob jóokʼ u yáalkaboʼob, chéen baʼaleʼ le uláakʼ juntúul discípulooʼ tumen maas chich u yáalkabeʼ tu pʼataj Pedro, ka túun kʼuch yáax letiʼ tu yiknal le muknaloʼ.
5 Ka chʼeenebnajeʼ tu yilaj tiʼ pekekbal le nookʼoʼob de lino ikil baʼakʼik Jesúsoʼ,+ chéen baʼaleʼ maʼ ookiʼ.
6 Ka túun kʼuch Simón Pedro, le máax ku taal kaʼach paachil tiʼoʼ, ka ook ichil le muknaloʼ. Ka tu yilaj tiʼ pekekbal luʼum le nookʼoʼob de linooʼ.
7 Le nookʼ xan bakʼaʼan kaʼach tu pooloʼ maʼ junmúuchʼ yanil kaʼach yéetel u maasil nookʼoʼoboʼ, baʼaxeʼ táanxel tuʼux kopokbal.
8 Le uláakʼ juntúul discípulo yáax kʼuchoʼ ook xan teʼ muknaloʼ, le ka tu yilaj le baʼax úuchoʼ tu creertaj le baʼax aʼalaʼabtiʼoboʼ.
9 Tumen letiʼobeʼ maʼ u naʼatoʼob kaʼach wa yaan u kaʼa líiʼsaʼal Jesús ichil le kimenoʼob jeʼex u yaʼalmil u Tʼaan Diosoʼ.+
10 Le discípuloʼob túunaʼ suunajoʼob tu yotochoʼob.
11 Chéen baʼaleʼ Maríaeʼ pʼáat waʼatal naatsʼ tiʼ le muknaloʼ, letiʼeʼ táan kaʼach u yokʼol. Le táan u yokʼoloʼ chʼeenebnaj ichil le muknaloʼ,
12 ka tu yilaj kaʼatúul ángeloʼob+ júulsak u nookʼoʼob kulukbaloʼob teʼ tuʼux tsʼaʼab u wíinklil Jesúsoʼ, juntúuleʼ teʼ tuʼux tsʼaʼab u pooloʼ, uláakʼ juntúuleʼ teʼ tuʼux tsʼaʼab u yookoʼoboʼ.
13 Ka tu kʼáatoʼob tiʼ María: «Koʼolel, ¿baʼaxten ka wokʼol?». Letiʼeʼ tu núukajtiʼob: «Tsʼoʼok u bisaʼal in Yuumtsil, tsʼoʼoleʼ maʼ in wojel tuʼux tsʼaʼabiʼ».
14 Ka tsʼoʼok u yaʼalik lelaʼ tu sutubaeʼ ka tu yilaj tiʼ waʼalakbal Jesúsiʼ, chéen baʼaleʼ maʼ tu kʼaj óoltaj wa letiʼiʼ.+
15 Jesúseʼ tu kʼáatajtiʼ: «Koʼolel, ¿baʼaxten ka wokʼol? ¿Máax ka kaxtik?». Maríaeʼ tumen tu tuklaj letiʼe máax ku meyaj teʼ parcelaoʼ tu yaʼalajtiʼ: «Yuumtsil, wa teech biseʼ aʼalten tuʼux ta tsʼáaj, ka xiʼiken in chʼaʼe».
16 Jesúseʼ tu yaʼalajtiʼ: «¡María!». Maríaeʼ tu sutubaeʼ ka tu yaʼalajtiʼ ich hebreo: «¡Rabóni!» (lelaʼ u kʼáat u yaʼal: «¡J-Kaʼansaj!»).
17 Jesúseʼ tu yaʼalajtiʼ: «Xuʼuluk a chʼuytal tiʼ teen, tumen maʼ kʼuchuk u kʼiinil in bin tu yiknal le Taataoʼ. Xeen tu yiknal in sukuʼunoʼob+ ka a waʼaltiʼob: ‹Teneʼ yaan in bin tu yiknal in Taata,+ letiʼeʼ a Taataʼex xan, in Dios+ yéetel a Dioseʼex xan›».
18 María Magdalena túuneʼ bineʼ ka tu tsikbaltaj tiʼ le discípuloʼob le baʼax úuchoʼ, tu yaʼalaj: «¡Tsʼoʼok in wilik le Yuumtsiloʼ!». Ka túun tu yaʼalajtiʼob le baʼax tu yaʼalaj Jesúsoʼ.+
19 Ka tsʼoʼok u yáakʼabtal teʼ kʼiin jeʼeloʼ, tu yáax kʼiinil le semanaoʼ, le discípuloʼoboʼ tumen saajkoʼob kaʼach tiʼ le judíoʼoboʼ tu chʼotoʼob tubeel u joonajil le naj tuʼux yanoʼoboʼ. Jesús túuneʼ téek chíikpaj chúumuk tiʼ letiʼobeʼ ka tu yaʼalajtiʼob: «Yanakteʼex jeetsʼelil».+
20 Ka tsʼoʼok u yaʼalik lelaʼ tu yeʼesajtiʼob u kʼaboʼob bey xan u chʼalaʼatel.+ Le discípuloʼob túunoʼ kiʼimakchaj u yóoloʼob ka tu yiloʼob le Yuumtsiloʼ.+
21 Jesúseʼ tu kaʼa aʼalajtiʼob: «Yanakteʼex jeetsʼelil.+ Jeʼex úuchik in túuxtaʼal tumen le Taataoʼ+ bey xan in túuxtikeʼexoʼ».+
22 Ka tsʼoʼok u yaʼalik lelaʼ tu yustoʼobeʼ ka tu yaʼalajtiʼob: «Kʼameʼex espíritu santo.+
23 Wa ka perdonarkeʼex u kʼeban jeʼel máaxakeʼ yaan u perdonartaʼaltiʼ, jeʼel máaxak xan maʼ ta perdonarkeʼex u kʼebaneʼ maʼ kun perdonartbiltiʼ».
24 Chéen baʼaleʼ Tomás+ juntúul tiʼ le 12 apóstoloʼoboʼ, le ku yaʼalaʼaltiʼ gemelooʼ, minaʼan kaʼach ichiloʼob le ka taal Jesús tu yiknaloʼoboʼ.
25 Le u maasil discípuloʼoboʼ táan kaʼach u yaʼalikoʼobtiʼ: «¡Tsʼoʼok k-ilik le Yuumtsiloʼ!». Chéen baʼaleʼ Tomáseʼ tu yaʼalajtiʼob: «Wa maʼ tin wilik u joolil le clavos tu kʼaboʼob yéetel wa maʼ tin woksik in dedo tu joolil le clavosoʼ bey xan wa maʼ tin woksik in kʼab tu chʼalaʼateloʼ+ junpuliʼ maʼ ken in creerte».
26 Ocho kʼiinoʼob túun úuchuk lelaʼ u discípuloʼobeʼ tiʼ yanoʼob tu kaʼatéen ichil le najoʼ, Tomáseʼ tiʼ yaan kaʼach ichiloʼobeʼ. Kex chʼotaʼan tubeel le najoʼ Jesúseʼ téek chíikpaj chúumuk tiʼ letiʼobeʼ ka tu yaʼalaj: «Yanakteʼex jeetsʼelil».+
27 Ka túun tu yaʼalaj tiʼ Tomás: «Tsʼáa a dedo teʼelaʼ, ilawil in kʼaboʼob, tichʼ xan a kʼabeʼ ka a woks tin chʼalaʼatel utiaʼal ka xuʼuluk u kaʼapʼéelchajal a tuukul yéetel ka a creerte».
28 Tomáseʼ tu núukaj: «¡In Yuumtsil, in Dios!».
29 Jesúseʼ tu yaʼalajtiʼ: «¿Beoraaʼ ka creertik tumen tsʼoʼok a wilken? Kiʼimak u yóol le máaxoʼob ku creerkoʼob baʼax ku yaʼalaʼaltiʼob kex maʼatech u yilkoʼoboʼ».
30 U jaajileʼ Jesúseʼ tu beetaj xan yaʼab uláakʼ milagroʼob tu táan le discípuloʼoboʼ, chéen baʼaleʼ maʼ tsʼíibtaʼan teʼ rolloaʼ.+
31 Pero leloʼobaʼ tsʼoʼok u tsʼíibtaʼal utiaʼal ka a creerteʼex Jesúseʼ letiʼ le Cristooʼ, u Paal Dios. Le kéen a creerteʼexeʼ yaan u yantalteʼex kuxtal tu yoʼolal u kʼaabaʼ.+
