2 Corintios 6:1-18
6 Toʼoneʼ u yéet meyajoʼon Dios+ yéetel tsʼoʼok k-kʼamik u nojoch utsil. Le oʼolaleʼ meyajnakteʼex maʼalob le nojoch utsil tsʼoʼok a kʼamkeʼexoʼ.+
2 Tumen letiʼeʼ ku yaʼalik: «Tu kʼiinil utiaʼal in weʼesik in wutsileʼ tin chʼenxikintech, yéetel tin wáantech tu kʼiinil in taasik salvación».+ ¡Ilawileʼex!, bejlaʼeʼ u kʼiinil in weʼesik in wutsil. ¡Ilawileʼex!, bejlaʼeʼ u kʼiinil in taasik salvación.
3 Jach junpuliʼ maʼ táan k-tsʼáaik baʼax oʼolal u tʼóochpajal máakiʼ, utiaʼal maʼ u yaʼalaʼal wa yaan baʼax kʼaas ichil le meyaj k-beetkoʼ.+
4 Baʼaxeʼ tiʼ tuláakal baʼax k-beetkeʼ k-eʼesik noʼojaʼanoʼon utiaʼal k-meyajtik Dios.+ Lelaʼ k-beetik ikil u chúukpajal k-óol tiʼ yaʼabkach baʼaloʼob, ikil k-máan tiʼ muʼyajiloʼob, tu kʼiiniloʼob yaan baʼaxoʼob ku bineltiktoʼon, ikil k-máansik problemas,+
5 ikil k-jaʼajatsʼaʼal, ikil k-sen kʼaʼalal cárcel,+ ikil u pʼuʼujul le máakoʼob t-contraoʼ, ikil u beetaʼal k-sen kíimsikba meyaj, ikil k-máansik áakʼaboʼob x-maʼ weenlil, ikil u pʼáatal minaʼan baʼal k-jaante,+
6 ikil k-bisik junpʼéel toj kuxtal, ikil u yantaltoʼon kʼaj óolalil, ikil u yantaltoʼon paciencia,+ ikil k-eʼesik utsil,+ ikil k-eʼesik yaantoʼon espíritu santo, ikil k-eʼesik yaabilaj yéetel x-maʼ kaʼapʼéel ichil,+
7 ikil k-aʼalik u jaajil, ikil u meyajtoʼon u páajtalil Dios,+ ikil k-machik yéetel x-noʼoj kʼab bey xan yéetel x-tsʼíik kʼab le u nuʼukuliloʼob baʼateʼel ku taal tiʼ le justiciaoʼ.+
8 Lelaʼ bey k-beetik kex wa táan k-respetartaʼal bey xan wa táan k-pʼaʼatal ich suʼtsilil, kex wa táan u yúuchul maʼalob tʼaan t-oʼolal bey xan wa maʼ táan u yúuchul maʼalob tʼaan t-oʼolaliʼ. Toʼoneʼ k-ilaʼal bey máaxoʼob ku tuusoʼobeʼ kex táan k-aʼalik u jaajil,
9 k-ilaʼal bey máaxoʼob maʼ kʼaj óolaʼanoʼobeʼ kex toʼoneʼ kʼaj óolaʼanoʼon, k-ilaʼal bey máaxoʼob ku náajmatik u kíimsaʼaloʼobeʼ, chéen baʼaleʼ ¡ilawileʼex!, láayliʼ kuxaʼanoʼoneʼ.+ Táan k-castigartaʼal, chéen baʼaleʼ maʼ kʼuʼubkoʼon utiaʼal kíimsbiliʼ.+
10 Bey triste yaniloʼoneʼ, chéen baʼaleʼ mantatsʼ kiʼimak k-óol. Bey óotsiloʼoneʼ, chéen baʼaleʼ táan k-ayikʼalkúuntik yaʼab máakoʼob. Bey mix baʼal yaantoʼoneʼ, chéen baʼaleʼ yaantoʼon tuláakal baʼal.+
11 Corintoileʼex, tsʼoʼok k-jeʼik k-chiʼ utiaʼal k-tʼankeʼex, yéetel tsʼoʼok k-jeʼik k-puksiʼikʼal tiʼ teʼex.
12 Toʼoneʼ maʼ táan k-taʼakikteʼex k-yaabilajiʼ,+ chéen baʼaleʼ teʼexeʼ táan a taʼakikeʼextoʼon a yaabilajeʼex.
13 Teʼexeʼ unaj a beetkeʼex jeʼex k-beetkoʼ —táan in tʼankeʼex bey in paalaleʼexeʼ— teʼex xaneʼ píiʼ jeʼekʼabt a puksiʼikʼaleʼex.+
14 Maʼ a nupkabaʼex yéetel máaxoʼob maʼatech u meyajtikoʼob Dios.*+ Tumen ¿baʼax yaan yil juntúul máak toj u kuxtal yéetel juntúul máak kʼasaʼan?+ Wa ¿baʼax yaan yil le sáasil yéetel le éeʼjochʼeʼeniloʼ?+
15 Tsʼoʼoleʼ ¿jeʼel wa u páajtal u múul meyaj Cristo yéetel Belialeʼ?*+ Wa ¿baʼax yaan yil juntúul máax meyajtik Dios* yéetel juntúul máax maʼatech u meyajtik?+
16 Tsʼoʼoleʼ ¿baʼax yaan yil u templo Dios yéetel le imagenoʼoboʼ?+ Tumen toʼoneʼ u temploʼon juntúul Dios kuxaʼan,+ jeʼex tu yaʼalil Dioseʼ: «Teneʼ yaan in kajtal tu yéeteloʼob,+ yéetel yaan in xíimbal ichiloʼob. Teneʼ yaan in beetkinba u Diosoʼob, letiʼobeʼ yaan u beetkubaʼob in kaajal».+
17 «Le oʼolaleʼ jóokʼeneʼex ichiloʼob yéetel náachkuntabaʼextiʼob, xuʼuluk a machkeʼex le baʼax maʼ limpio yaniloʼ»,+ ku yaʼalik Jéeoba; «teen túuneʼ yaan in kʼamkeʼex».+
18 «‹Teneʼ yaan in beetkinba taatatsil tiʼ teʼex,+ yéetel teʼexeʼ yaan a kʼuchul a beetabaʼex in hijoʼex yéetel teʼexeʼ in hijaʼex›,+ ku yaʼalik Jéeoba, le Máax jach táaj yaan u poderoʼ».
Notas
^ Ich griegoeʼ ku yaʼalaʼal kaʼach «Maʼ a tsʼáaikabaʼex yáanal junpʼéel u cheʼil kuuch chʼechʼebaʼan u bisaʼal».
^ Wa «juntúul máax chúukaʼan u yóol u meyajt Dios».
^ Lelaʼ junpʼéel kʼaabaʼ ich hebreo u kʼáat u yaʼal «Mix Baʼal u Biilal». Lelaʼ tiʼ u Kʼaasilbaʼal ku yaʼalaʼal.
