Juan 3:1-36
3 Yanchaj túun juntúul fariseo ku kʼaabaʼtik Nicodemo,+ letiʼeʼ juntúul u gobernanteil le judíoʼoboʼ.
2 Junpʼéel áakʼab túuneʼ letiʼeʼ bin tu yiknal Jesúseʼ+ ka tu yaʼalajtiʼ: «J-Kaʼansaj,+ k-ojleʼ techeʼ juntúul j-kaʼansajech túuxtaʼanech tumen Dios, tumen le milagroʼobaʼ+ mix máak jeʼel u páajtal u beetik wa minaʼan Dios tu yéeteleʼ».+
3 Jesúseʼ tu yaʼalajtiʼ: «Jach tu jaajil kin waʼaliktech: wa maʼ tu síijil máak tu kaʼatéeneʼ+ maʼ tu páajtal u yilik u Reino Dios».+
4 Nicodemoeʼ tu kʼáatajtiʼ: «¿Bix jeʼel u páajtal u síijil máak wa tsʼoʼok u chʼíijleʼ? Maʼ tu páajtal u yokol tu kaʼatéen tu jobnel u maama utiaʼal ka síijik, ¿máasaʼ?».
5 Jesús túuneʼ tu núukajtiʼ: «Jach tu jaajil kin waʼaliktech: utiaʼal u síijil máakeʼ kʼaʼabéet u yokjaʼ yéetel jaʼ+ bey xan u tsʼaʼabal espíritu santo tiʼ,+ wa maʼeʼ maʼ tu páajtal u yokol tu Reino Dios.
6 Le máax sijnáal tiʼ wíinikeʼ wíinik, le máax sijnáal tiʼ espíritu santoeʼ juntúul u paal Dios.
7 Maʼ u jaʼakʼal a wóol yoʼolal le baʼax tin waʼalajtechaʼ: teʼexeʼ unaj a síijleʼex tu kaʼatéen.
8 Le iikʼoʼ ku suʼusutkuba jeʼel tuʼuxak u kʼáateʼ yéetel ka wuʼuyik u xóob, chéen baʼaleʼ maʼ a wojel tuʼux u taaliʼ mix tuʼux ku biniʼ. Bey u yúuchul xan yéetel tuláakal le máaxoʼob ku síijloʼob tiʼ espíritu santooʼ».+
9 Nicodemoeʼ tu kʼáatajtiʼ: «¿Bix jeʼel u páajtal u yúuchul le baʼaloʼobaʼ?».
10 Jesús túuneʼ tu yaʼalajtiʼ: «Techeʼ juntúul j-kaʼansajech tiʼ u kaajil Israel, chéen baʼaleʼ, ¿maʼ a wojel le baʼaloʼobaʼ?
11 Jach tu jaajil kin waʼaliktech: toʼoneʼ k-tʼaan tiʼ baʼaxoʼob k-ojel yéetel k-aʼalik le baʼaxoʼob tsʼoʼok k-ilkoʼ, chéen baʼaleʼ teʼexeʼ maʼatech a creerkeʼex le baʼaxoʼob k-aʼalikoʼ.
12 Wa maʼ ta creerkeʼex le luʼumkabil baʼaloʼob tin waʼalajteʼexoʼ, ¿bix jeʼel a creerkeʼex le kaʼanilbeʼen baʼaloʼob wa ka in waʼalteʼexoʼ?
13 Tsʼoʼoleʼ mix máak naʼakak teʼ kaʼanoʼ,+ baʼaxeʼ chéen le máax tsʼoʼok u yéemel teʼ kaʼanoʼ,+ u Paal máak.
14 Jeʼex úuchik u líiʼsaʼal kaʼanal le kaan tumen Moisés teʼ desiertooʼ+ bey xan kun líiʼsbil kaʼanal u Paal máak,+
15 utiaʼal ka yanak kuxtal minaʼan u xuul tiʼ tuláakal le máaxoʼob ken u creertoʼoboʼ.+
16 Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal,+ utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul.+
17 Tumen Dioseʼ maʼ tu túuxtaj u Paal way yóokʼol kaab utiaʼal ka u juzgart yóokʼol kaabiʼ, baʼaxeʼ utiaʼal ka u salvart yóokʼol kaab.+
18 Le máax ku tsʼáaik u fe tiʼ letiʼeʼ maʼ kun juzgarbil.+ Le máax minaʼan u fejeʼ tsʼoʼok u juzgartaʼal, tumen maʼ tu tsʼáaj u fe tiʼ* u juntúuliliʼ Paal Diosiʼ.+
19 Lelaʼ letiʼe baʼax meyajnaj utiaʼal u juzgartaʼal wíinikoʼoboʼ: le sáasiloʼ tsʼoʼok u taal way yóokʼol kaabeʼ,+ chéen baʼaleʼ le máakoʼoboʼ maʼ tu yaabiltoʼob le sáasiloʼ, baʼaxeʼ tu yaabiltoʼob le éeʼjochʼeʼeniloʼ, tumen le baʼaxoʼob ku beetkoʼob kaʼachoʼ láaj kʼaastak.
20 Máax ku beetik baʼaloʼob kʼaastakeʼ u pʼekmaj le sáasiloʼ yéetel maʼ tu taal tuʼux yaan le sáasiloʼ, utiaʼal maʼ u chíikpajal wa kʼaas le baʼaxoʼob ku beetkoʼ.
21 Chéen baʼaleʼ máax ku beetik baʼaloʼob maʼalobtakeʼ ku taal tuʼux yaan le sáasiloʼ,+ utiaʼal ka chíikpajak táan u beetik baʼaloʼob maʼalobtak jeʼex uts tu tʼaan Dioseʼ».
22 Ka tsʼoʼok u yaʼalik le baʼaloʼobaʼ Jesús yéetel u discípuloʼobeʼ binoʼob tu mejen kaajiloʼob Judea. Teʼ túunoʼ Jesúseʼ pʼáat wa jaypʼéel kʼiinoʼob tu yéeteloʼobiʼ, yéetel táan kaʼach u tsʼaa okjaʼ.+
23 Chéen baʼaleʼ Juaneʼ táan kaʼach u tsʼaa okjaʼ tu kaajil Enón naatsʼ tiʼ u kaajil Salim, tumen teʼeloʼ yaan kaʼach yaʼab jaʼiʼ.+ Le máakoʼob túunoʼ seguernaj u binoʼob utiaʼal ka tsʼaʼabak u yokjaʼob,+
24 tumen teʼ kʼiinoʼob jeʼeloʼ Juaneʼ maʼ kʼaʼalak cárceliʼ.+
25 U discípuloʼob Juan túuneʼ káaj u baʼateltʼaanoʼob yéetel juntúul judío yoʼolal le u pʼáatal máak limpioil tu táan Diosoʼ.
26 Ka túun taaloʼob tu yiknal Juaneʼ ka tu yaʼaloʼobtiʼ: «J-Kaʼansaj, le máak yaan kaʼach ta wéetel teʼ tuláakʼ u tséel le Jordánoʼ, le máax tiʼ tʼaanajecheʼ,+ táan u tsʼaa okjaʼ. Tsʼoʼoleʼ tuláakal le máakoʼoboʼ táan u binoʼob tu yiknal».
27 Juaneʼ tu yaʼalaj: «Maʼ tu páajtal u yantal mix baʼal tiʼ máak wa maʼ Dios tsʼaamiltiʼiʼ.
28 Tak teʼexeʼ a wuʼuymeʼex in waʼalik: maʼ teen le Cristooʼ+ chéen túuxtaʼaben táanil tiʼ letiʼ.+
29 Le máax ku tsʼoʼokol u beel yéetel le noviatsiloʼ letiʼe noviotsiloʼ.+ Chéen baʼaleʼ u amigo le noviotsiloʼ wa tiʼ waʼalakbal yéetel ku yuʼubik baʼax ku yaʼalik le noviotsiloʼ ku sen kiʼimaktal u yóol. Le oʼolaleʼ teneʼ jach táaj kiʼimak in wóol.
30 Letiʼeʼ yaan u seguer u yaʼabtal u discípuloʼob, chéen baʼaleʼ teneʼ yaan u seguer u pʼíittal in discípuloʼob».
31 Le máax ku taal kaʼanaleʼ+ tiʼ yaan yóokʼol u maasileʼ. Le máax luʼum u taaleʼ luʼumkabil, yéetel ku tʼaan tiʼ le baʼaloʼob yaan way luʼumeʼ. Le máax kaʼan u taaleʼ tiʼ yaan yóokʼol u maasileʼ,+
32 yéetel ku tʼaan tiʼ le baʼaxoʼob tsʼoʼok u yilik yéetel tsʼoʼok u yuʼubikoʼ,+ chéen baʼaleʼ mix máak creertik baʼax ku yaʼalik.+
33 Le máax tsʼoʼok u creertik baʼax ku yaʼalik Jesúseʼ tsʼoʼok u yilik jach jaaj* lelaʼ: Dioseʼ mantatsʼ ku yaʼalik u jaajil.+
34 Tumen Cristo, le máax túuxtaʼan tumen Diosoʼ, ku tʼaan tiʼ le baʼaxoʼob ku yaʼalik Diosoʼ,+ tumen Dioseʼ maʼ chéen junpʼíit espíritu santo ku tsʼáaikiʼ.*
35 Le Taatatsiloʼ u yaabiltmaj le Paaloʼ,+ yéetel tsʼoʼok u kʼubik tuláakal baʼal tu kʼab.+
36 Le máax ku tsʼáaik u fe tiʼ le Paaloʼ yaan u yantal kuxtal minaʼan u xuul tiʼ,+ le máax maʼ tu yuʼubik u tʼaan le Paaloʼ maʼ ken u yil le kuxtaloʼ,+ baʼaxeʼ u pʼujaʼanil Dios kun antal tu yóokʼol mantatsʼ.+
Notas
^ Ich griegoeʼ ku yaʼalaʼal kaʼach «tiʼ u kʼaabaʼ».
^ Ich griegoeʼ ku yaʼalaʼal kaʼach «tsʼoʼok u tsʼáaik u sello tiʼ».
^ Wa «maʼ tu pʼisik bukaʼaj espíritu santo ku tsʼáaik».