Apocalipsis 11:1-19
11 Ka túun tsʼaʼabten junpʼéel caña+ ku meyaj utiaʼal u yúuchul pʼiiseʼ ka aʼalaʼabten: «Líiʼkecheʼ ka a pʼis u templo Dios bey xan le altaroʼ yéetel xok jaytúul le máaxoʼob ku adoraroʼob teʼeloʼ.
2 Chéen baʼaleʼ u táankabil le templooʼ xúumpʼatte, maʼ a pʼisik, tumen tsʼoʼok u kʼuʼubul tu kʼab le j-táanxel luʼumiloʼoboʼ. Letiʼobeʼ yaan u pepeʼchaʼatikoʼob le kaaj santo+ tu yáamil 42 mesesoʼ.+
3 Tsʼoʼoleʼ yaan in túuxtik kaʼatúul in testigoʼob utiaʼal u profetizaroʼob tu yáamil 1,260 kʼiinoʼob, letiʼobeʼ u búukintmoʼob toʼotoch nookʼoʼob».*
4 Letiʼobeʼ ku keʼeteloʼob yéetel le kaʼakúul olivoʼoboʼ+ bey xan yéetel le kaʼapʼéel candelabroʼoboʼ,+ yéetel tiʼ waʼalakbaloʼob tu táan u Yuumtsilil le luʼumoʼ.+
5 Tsʼoʼoleʼ wa yaan máax u kʼáat u beet loob tiʼobeʼ ku jóokʼol kʼáakʼ tu chiʼob yéetel ku tóokik le máaxoʼob pʼekmiloʼoboʼ. Bey kun kíimsbil jeʼel máaxak ka u yóot u beet loob tiʼoboʼ.
6 Tiʼ le kaʼatúul testigoʼobaʼ tsʼaʼan u páajtalil u kʼalikoʼob kaʼan+ utiaʼal maʼ u kʼáaxal jaʼ+ teʼ kʼiinoʼob táan u profetizaroʼoboʼ, yéetel tsʼaʼan u páajtalil u sutkoʼob kʼiʼikʼil le jaʼoʼ+ bey xan utiaʼal ka u beetoʼob u taal u clasesil loob tu yóokʼol le luʼum jeʼel jaytéen u kʼáatoʼobeʼ.
7 Le kéen tsʼoʼokok u profetizaroʼobeʼ, le tsʼíitsʼik baʼalcheʼ ku jóokʼol tiʼ le taamkach jooloʼ yaan u baʼateʼel tu contraʼob, yaan u ganartaʼaloʼob yéetel yaan u kíimsaʼaloʼob.+
8 U kimen wíinkliloʼob túuneʼ yaan u pʼáatal pektal tu noj bejil le nojoch kaaj tuʼux clavartaʼab u Yuumtsiloʼob tiʼ junpʼéel cheʼoʼ, le kaaj ku keʼetel yéetel Sodoma bey xan yéetel Egiptooʼ.
9 Máakoʼob tiʼ jejeláas kaajoʼob, tribuʼob, idiomaʼob bey xan luʼumoʼobeʼ yaan u chaʼantikoʼob u kimen wíinklil le kaʼatúul testigoʼob ichil tres días y mediooʼ+ yéetel maʼ ken u chaʼob u muʼukloʼob.
10 U kajnáaliloʼob le luʼumoʼ yaan u kiʼimaktal u yóoloʼob yéetel yaan u kʼiinbesajoʼob tu yoʼolal le baʼax úuchoʼ, yéetel yaan u túuxtikoʼob regaloʼob tu baatsiloʼob, tumen jach beetaʼab u muʼyaj u kajnáaliloʼob luʼum tumen le kaʼatúul profetaʼobaʼ.
11 Le ka tsʼoʼok le tres días y mediooʼ le u muukʼil kuxtal ku taal tiʼ Diosoʼ ook tu wíinkliloʼobeʼ+ ka líikʼoʼob. Le máaxoʼob iloʼob túunoʼ jach sajakchajoʼob.
12 Tsʼoʼoleʼ tu yuʼuboʼob junpʼéel kʼaʼamkach tʼaan ku taal teʼ kaʼan táan u yaʼaliktiʼob: «Naʼakeneʼex wayeʼ». Ka naʼakoʼob teʼ kaʼan ichil le múuyaloʼ, ka ilaʼaboʼob* tumen le máaxoʼob pʼekmiloʼoboʼ.
13 Teʼ hora jeʼeloʼ tu sen tíituba le luʼumoʼ ka jutkʼaj u diez por cientoil le kaajoʼ. Siete mil máakoʼob kíimoʼob úuchik u tíitkuba le luʼumoʼ, yéetel u maasileʼ jach sajakchajoʼobeʼ ka joʼopʼ u alabarkoʼob u Diosil kaʼan.
14 Le u kaʼapʼéel baʼal kun muʼyajtbiloʼ+ tsʼoʼok u máan. ¡Ilawileʼex! Le u yóoxpʼéel baʼal kun muʼyajtbiloʼ táan u taal tu séebaʼanil.
15 Le u siete ángel xanoʼ tu yustaj u trompeta.+ Ka uʼuyaʼab u juum jejeláas tʼaanoʼob teʼ kaʼan táan u yaʼalikoʼob: «U reinoil yóokʼol kaabeʼ tsʼoʼok u kʼuchul u beetuba u Reino k-Dios+ yéetel u Reino u Cristo.+ Dioseʼ yaan u reinar utiaʼal kʼiinoʼob minaʼan u xuul».+
16 Le 24 ancianoʼob+ kulukbaloʼob tu tronoʼob tu táan Diosoʼ xolajoʼobeʼ ka chinlajoʼob u adorartoʼob Dios,
17 yéetel tu yaʼaloʼob: «K-tsʼáaiktech gracias, Jéeoba Dios, le Máax jach táaj yaan u poder, le máax yaan+ yéetel yaniliʼoʼ, tumen tsʼoʼok u káajal u meyajtech a nojoch páajtalil yéetel tsʼoʼok u káajal a reinar.+
18 Chéen baʼaleʼ u kajnáaliloʼob le luʼumoʼoboʼ pʼuʼujoʼob, ka ta weʼesaj xan a pʼujaʼanil, ka kʼuch u kʼiinil u juzgartaʼal le kimenoʼoboʼ bey xan u kʼiinil u tsʼaʼabal baʼax u náajaltmaj+ le profetaʼob meyajtikechoʼ,+ le máaxoʼob santoʼoboʼ bey xan tuláakal le máaxoʼob ku respetarkoʼob a kʼaabaʼoʼ, le mejentakoʼoboʼ bey xan le nuuktakoʼoboʼ. Kʼuch xan u kʼiinil a xuʼulsik tiʼ le máaxoʼob táan u kʼaskúuntikoʼob le luʼumoʼ».+
19 U Templo Dios yaan teʼ kaʼanoʼ jeʼepaji, ichil le templo túunoʼ chíikpaj u cajail le pacto* u beetmaj Diosoʼ.+ Ka joʼopʼ u léembal cháak, u yuʼubaʼal tʼaanoʼob, u kíilbal cháak, u kíilbal luʼum bey xan u sen kʼáaxal bat.
Notas
^ Ilawil «Toʼotoch nookʼ», página 2582.
^ Wa «táan kaʼach u yilaʼaloʼob».
^ Ilawil «U cajail pacto», página 2583.
