Le maʼ yaʼab u bin u kíimsaʼal Jesusoʼ, letiʼeʼ tu yaʼalaj: «U maʼalob péektsilil le Reinoaʼ yaan u kʼaʼaytaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, ken tsʼoʼokkeʼ letiʼ túun ken taalak u xuul» (Mateo 24:14). ¿Bix túun kun kʼaʼaytbil le maʼalob péektsil tuláakal yóokʼol kaaboʼ? Yaan u seguer u beetaʼal jeʼex úuchik u kʼaʼaytaj Jesús le ka taal way Luʼumeʼ (Lucas 8:1).

K-xíimbaltik le máakoʼob tu yotochoʼoboʼ. Jesuseʼ tu kaʼansaj tiʼ u disipuloʼob ka u kʼaʼaytoʼob le maʼalob péektsil joonaj joonajiloʼ (Mateo 10:11-13; Baʼaxoʼob 5:42; 20:20). Letiʼeʼ tu yaʼalaj xan tiʼob tak tuʼuxoʼob jeʼel u páajtal u kʼaʼaytajoʼobeʼ (Mateo 10:5, 6; 2 Corintoiloʼob 10:13). Le kʼaʼaytaj ku beetaʼal teʼ kʼiinoʼobaʼ jach maʼalob bix táan u beetaʼal yéetel tiʼ cada múuchʼulileʼ tsʼaʼan tak tuʼux ku náakal u kʼaʼaytaj. Ikil u beetaʼal beyaʼ ku tsʼaʼabal kʼaj óoltbil baʼax ken u beet Jesús yéetel ku kʼaʼaytaʼal le maʼalob péektsil tiʼ tuláakal máak jeʼex tu yaʼalil ka beetaʼakoʼ (Baʼaxoʼob 10:42).

K-ilik kʼaʼaytaj jeʼel tuʼuxak yaan máakeʼ. Jesuseʼ tu yeʼesaj unaj xan k-kʼaʼaytaj tuláakal tuʼux, letiʼeʼ kʼaʼaytajnaj tu jáal kʼáaʼnáab bey xan tu jáal junpʼéel chʼeʼen (Marcos 4:1; Juan 4:5-15). Toʼon xaneʼ k-tsikbaltik baʼax ku yaʼalik le Biblia jeʼel tuʼuxak ku páajtaleʼ: teʼ calleʼoboʼ, teʼ tuʼuxoʼob ku yúuchul koonoloʼ, teʼ parqueʼoboʼ wa tak tiʼ teléfono. Tsʼoʼoleʼ ken páajchajak xaneʼ k-kʼaʼaytaj tiʼ k-vecinoʼob, tiʼ k-éet j-meyajoʼob, tiʼ k-éet j-xookoʼob yéetel tiʼ k-láakʼtsiloʼob. Leloʼ tsʼoʼok u beetik u yuʼubaʼal tumen u millonesil máakoʼob le maʼalob péektsil jeʼel u salvartikoʼonoʼ (Salmo 96:2).

Tukult tiʼ máax jeʼel a tsikbaltik u maʼalob péektsilil u Reino Dioseʼ yéetel le utsiloʼob jeʼel u kʼamkoʼ. Ilawil a tsikbaltik ken béeychajak.

• ¿Máakalmáak le «maʼalob péektsilil» unaj u kʼaʼaytaʼaloʼ?

• U j-jaajkunajoʼob Jéeobaeʼ, ¿bix u kʼaʼaytajoʼob jeʼex úuchik u beetik Jesusoʼ?