Génesis 3:1-24
3 Le kaan+ túun kaʼachoʼ letiʼe baʼalcheʼ maas ku kanáantik bix u máan* tiʼ tuláakal u baʼalcheʼiloʼob kʼáax u beetmaj Jéeoba Diosoʼ. Le kaanoʼ tu yaʼalaj tiʼ le koʼoleloʼ: «¿Jach wa tu jaajil Dioseʼ tu yaʼalajteʼex maʼ unaj a jaantikeʼex u yich mix junkúul tiʼ le cheʼob yaan teʼ jardínaʼ?».+
2 Le koʼoleloʼ tu núukaj tiʼ le kaanoʼ: «Jeʼel u páajtal k-jaantik u yich le cheʼob yaan wayeʼ.+
3 Pero u yich le cheʼ yaan tu chúumukil le jardínaʼ Dioseʼ u yaʼalmaj:+ ‹Jach junpuliʼ maʼ unaj a jaantikeʼexiʼ mix unaj a machkeʼexiʼ, tumen wa ka beetkeʼexeʼ yaan a kíimleʼex›».
4 Le kaan túunoʼ tu yaʼalaj tiʼ le koʼoleloʼ: «U jaajileʼ maʼ kan kíimleʼex.+
5 Tumen Dioseʼ u yojleʼ le kʼiin ken a jaanteʼexeʼ yaan u pʼiʼilil a wicheʼex yéetel yaan a pʼáatleʼex jeʼex letiʼeʼ, ta juunaleʼex kun páajtal a chʼaʼtuklikeʼex* baʼax uts yéetel baʼax kʼaas».+
6 Le koʼolel túunoʼ tu yileʼ u yich le cheʼoʼ maʼalob utiaʼal jaantbil, kéen paktaʼakeʼ ku tsʼíiboltaʼal u jaantaʼal, tsʼoʼoleʼ jatsʼuts u yilaʼal. Le beetik tu chʼaʼaj u jaante.+ Le ka taal u yíichameʼ tu tsʼáaj xan tiʼ, letiʼ túuneʼ káaj u jaantik.+
7 Ka túun pʼiʼil u yichoʼob, ka tu tsʼáajoʼob cuentaeʼ minaʼan u nookʼoʼob. Le oʼolal tu chʼaʼajoʼob u leʼob higueraeʼ, tu chuyoʼobeʼ ka tu kʼaxaj tu nakʼoʼob utiaʼal u pixkubaʼob.+
8 Maʼ sáam tiʼ leloʼ, le taʼaytak u tʼúubul kʼiin yéetel le táan u síis óoltaloʼ, tu yuʼuboʼob táan u tʼaan Jéeoba Dios, letiʼeʼ táan kaʼach u máan teʼ jardínoʼ. Le máak túun yéetel u yatanoʼ tu taʼakubaʼob tu paach le cheʼob yaan teʼ jardín utiaʼal maʼ u yilaʼaloʼob tumen Jéeoba Diosoʼ.
9 Jéeoba Dios túuneʼ seguernaj u tʼanik le wíinik táan u yaʼalikoʼ: «¿Tuʼux yanech?».
10 Le wíinik túunoʼ tu núukaj: «Tin wuʼuyaj a tʼaan le táan a máan teʼ jardínoʼ, pero sajakchajen tumen minaʼan in nookʼ, le oʼolal tin taʼakinba».
11 Dios túuneʼ tu yaʼalajtiʼ: «¿Máax aʼaltech wa minaʼan a nookʼ?+ ¿Tsʼoʼok wa a jaantik u yich le cheʼ tin waʼalajtech maʼ a jaantikeʼ?».+
12 Le máakoʼ tu núukaj: «Le koʼolel ta tsʼáajtenoʼ letiʼ tsʼáaten u yich le cheʼoʼ, le oʼolal tin jaantaj».
13 Jéeoba Dios túuneʼ tu yaʼalaj tiʼ le koʼoleloʼ: «¿Baʼax le tsʼoʼok a beetik beyaʼ?». Le koʼoleloʼ tu núukaj: «Letiʼe kaan tusenoʼ, le oʼolal tin jaantaj».+
14 Jéeoba Dios túuneʼ tu yaʼalaj tiʼ le kaanoʼ:+ «Yoʼolal le baʼax tsʼoʼok a beetkaʼ, tiʼ tuláakal u baʼalcheʼiloʼob kʼáax yéetel tiʼ tuláakal le baʼalcheʼob ku yalakʼtaʼaloʼoboʼ, teech kin maldecirkech. Jilankil bíin máankech, yéetel luʼum bíin a jaant tuláakal u kʼiiniloʼob a kuxtal.
15 Yaan in beetik a pʼektikaba+ teech+ yéetel le koʼoleloʼ,+ yéetel yaan xan in beetik u pʼektikuba a chʼiʼibal*+ yéetel u chʼiʼibal+ letiʼ. Techeʼ yaan a chiʼik u tuunkuy u chʼiʼibal le koʼoleloʼ,+ yéetel u chʼiʼibal le koʼoleloʼ yaan u púuʼchaʼatik a pool».+
16 Tiʼ le koʼoleloʼ tu yaʼalaj: «Desde bejlaʼeʼ kéen pʼáatkech embarazadaeʼ yaan u bin u maas yaʼabtal bix a muʼyaj,* yéetel yaan a muʼyaj kéen síijik a paalal. Yaan a wuʼuyik jach kʼaʼabéettech a wíicham, yéetel letiʼeʼ yaan u píitmáan u autoridad ta wóokʼol».
17 Yéetel tiʼ Adáneʼ* tu yaʼalaj: «Bey tumen ta wuʼuyaj u tʼaan a watan yéetel ta jaantaj u yich le cheʼ tin waʼalajtech+ ‹maʼ unaj a jaantikoʼ›, kin maldecirtik le luʼum ta woʼolaloʼ.+ Yaan a kíimskaba meyaj tuláakal u kʼiiniloʼob a kuxtal utiaʼal ka yanak baʼal a jaante.+
18 Teʼ luʼumoʼ yaan u jóokʼol kʼiʼixoʼob yéetel kʼaakʼas xíiwoʼobiʼ, yaan xan a jaantik le xíiwoʼob yéetel u yich le cheʼob ken u tsʼáa le luʼumoʼ.
19 Yaan a náajaltik a woʼoch waaj yéetel u kʼíilkabil a táanpoolal tak ken suunakech teʼ luʼumoʼ, tumen tiʼ chʼaʼabechiʼ.+ Tumen luʼumech yéetel teʼ luʼum bíin suunakechoʼ».+
20 Ka tsʼoʼokeʼ Adáneʼ tu tsʼáaj u kʼaabaʼt Eva* tiʼ u yatan, tumen letiʼ kun kʼuchul u beetuba maamatsil tiʼ tuláakal máax kun kuxtal.+
21 Jéeoba Dios túuneʼ tu beetaj chowak nookʼoʼob de kʼéewel utiaʼal ka u búukint Adán yéetel u yatan.+
22 Tsʼoʼoleʼ Jéeoba Dioseʼ tu yaʼalaj: «Ilawile, le máakoʼ tsʼoʼok u kʼuchul u beetuba bey jeʼex juntúul tiʼ toʼoneʼ, tumen tsʼoʼok u kʼuchul u yojéelt* baʼax uts yéetel baʼax kʼaas.+ Beora túunaʼ yaan baʼax ken in beet utiaʼal maʼ u chʼaʼik u yich u cheʼil le kuxtal+ utiaʼal ka u jaant yéetel utiaʼal ka kuxlak mantatsʼoʼ».*
23 Yoʼolal leloʼ Jéeoba Dioseʼ tu tojolchʼintaj le máak tu jardínil Edén+ utiaʼal ka u meyajt le luʼum tuʼux chʼaʼab utiaʼal u beetaʼaloʼ.+
24 Bey túun úuchik u tojolchʼintik le máakoʼ. Yéetel tu lakʼinil u jardínil Edéneʼ Dioseʼ tu tsʼáaj querubínoʼob*+ bey xan junpʼéel espada ku tóochʼbal u kʼáakʼil yéetel mantatsʼ táan u pirinsuut. Lelaʼ tu beetaj utiaʼal u kʼatik le bej ku bisik máak tak tu cheʼil le kuxtaloʼ.
Notas
^ Wa «yaan u naʼat utiaʼal u beetik baʼax kʼaas».
^ Ich hebreoeʼ ku yaʼalaʼal kaʼach «a kʼaj óoltikeʼex».
^ Wa «descendencia».
^ Wa «a sufrir».
^ U kʼáat u yaʼal «Luʼumkabil Máak; Wíinik; Máakoʼob».
^ U kʼáat u yaʼal «Koʼolel Kuxaʼan».
^ Ich hebreoeʼ ku yaʼalaʼal kaʼach «u kʼaj óolt».
^ Wa «kʼiinoʼob minaʼan u xuul».
^ Ilawil página 2577.
