2 Corintios 9:1-15
9 Beora túunaʼ, tu yoʼolal le baʼax ku beetaʼal utiaʼal u yáantaʼal le máaxoʼob santoʼoboʼ,+ u jaajileʼ, teneʼ maʼ tin wilik wa jach kʼaʼabéet in tsʼíib tiʼ teʼex tu yoʼolal leloʼ.
2 Teneʼ in wojel jach taak a wáantajeʼex, le oʼolal kin nojbaʼalkúuntkinba ta woʼolaleʼex tu táan le macedoniailoʼoboʼ yéetel kin waʼaliktiʼobeʼ u luʼumil Acayaeʼ tsʼoʼok junpʼéel año u líiʼsuba utiaʼal áantaj. Óoliʼ tuláakal le macedoniailoʼob taakchaj u yáantajoʼob le ka tu yojéeltoʼob bix a tsʼáaik a wóoleʼex áantajoʼ.
3 Chéen baʼaleʼ táan in túuxtik le sukuʼunoʼobaʼ utiaʼal maʼ u pʼáatal chéen kunel le baʼax maʼalob tin waʼalaj ta woʼolaleʼexoʼ, baʼaxeʼ ka u yiloʼob jach jaaj a líiʼsmabaʼex jeʼex tin waʼaliloʼ.
4 Tumen wa ka kʼuchuk taal le macedoniailoʼob tin wéetel yéetel ka u yiloʼob maʼ a líiʼsmabaʼexeʼ jeʼel k-suʼlaktal úuchik k-confiar tiʼ teʼexeʼ. Chéen baʼaleʼ u jaajileʼ tak teʼex jeʼel a suʼlaktaleʼexeʼ.
5 Le oʼolal tin tuklaj kʼaʼabéet in líiʼsik u yóol le sukuʼunoʼob utiaʼal ka xiʼikoʼob ta wiknaleʼex táanil tiʼ k-kʼuchloʼ, yéetel ka a listokíinteʼex le baʼax a waʼalmaj a síikeʼexoʼ, beyoʼ ka ilaʼak ta puksiʼikʼaleʼex ku síijil a tsʼáaikeʼex, maʼ wa tumen obligarbil a beetaʼaleʼexiʼ.
6 Chéen baʼaleʼ tu yoʼolal lelaʼ, le máax chéen junpʼíit baʼax ku pakʼikeʼ chéen junpʼíit baʼax xan ken u joche yéetel le máax yaʼab baʼax ku pakʼikeʼ yaʼab baʼax xan ken u joche.+
7 Cada juntúuleʼ u beet jeʼex tsʼoʼok u chʼaʼtuklik ichil u puksiʼikʼaleʼ, maʼ yéetel kʼuuxiliʼ mix bey táan u obligartaʼaleʼ,+ tumen Dioseʼ u yaabiltmaj le máax ku síik wa baʼax yéetel kiʼimak óolaloʼ.+
8 Tsʼoʼoleʼ Dioseʼ jeʼel u páajtal u maas eʼesikteʼex u nojoch utsil utiaʼal ka yanakteʼex le baʼaxoʼob kʼaʼabéetteʼexoʼ bey xan utiaʼal ka yanakteʼex yaʼab baʼaloʼob utiaʼal a beetkeʼex utsil meyajoʼob.+
9 (Jeʼex tsʼíibtaʼanileʼ: «Tsʼoʼok u tʼoxik yaʼab baʼaloʼob, tsʼoʼok u tsʼáaik tiʼ le máaxoʼob óotsiloʼoboʼ. U justiciaeʼ utiaʼal mantatsʼ».+
10 Beora túunaʼ, le Dios ku tsʼáaik yaʼab semilla tiʼ le máax ku paakʼaloʼ bey xan waaj utiaʼal jaantbiloʼ, letiʼ xan kun tsʼáaik yéetel kun yaʼabkuntik le semilla utiaʼal a pakʼkeʼexoʼ yéetel letiʼ kun beetik u maas yaʼabtal u yich le baʼaloʼob maʼalobtak ka beetkeʼexoʼ).
11 Teʼexeʼ táan a kʼamkeʼex yaʼab utsiloʼob utiaʼal ka páajchajak a wáantajeʼex jejeláas bixi. Beyoʼ le kéen k-tʼox le baʼaxoʼob ka síikeʼexoʼ ku tsʼaʼabal gracias tiʼ Dios.
12 Tumen le baʼax ku beetaʼal utiaʼal u tsʼaʼabal áantajoʼ maʼ chéen ku beetaʼal utiaʼal u tsʼaʼabal baʼax kʼaʼabéet tiʼ le máaxoʼob santoʼoboʼ,+ baʼaxeʼ ku beetaʼal utiaʼal u yaʼabtal máaxoʼob ku tsʼáaikoʼob gracias tiʼ Dios.
13 Letiʼobeʼ ku alabarkoʼob Dios tumen le áantaj ka tsʼáaikeʼexoʼ ku yeʼesik táan a tsʼoʼokbeskeʼex le baʼaloʼob maʼalobtak ka tsikbaltikeʼex tu yoʼolal Cristooʼ.+
14 Letiʼobeʼ ku kʼáat óolaloʼob tiʼ Dios ta woʼolaleʼex tumen u yaabiltmeʼexoʼob yoʼolal le sen nojoch utsil tu yeʼesajteʼex Diosoʼ.
15 K-tsʼáaik gracias tiʼ Dios tu yoʼolal le jach táaj maʼalob baʼal ku síiktoʼonoʼ.