Hebreos 5:1-14
5 Tumen tuláakal nojoch sacerdote ku yéeyaʼal ichil wíinikoʼobeʼ ku meyajtik Dios utiaʼal u yutsil le máakoʼoboʼ,+ utiaʼal xan ka u kʼub sacrificioʼob bey xan le uláakʼ baʼaloʼob ku tsʼaʼabal yoʼolal u kʼeban máakoʼ.+
2 Le sacerdoteaʼ jeʼel u páajtal u chʼaʼik óotsilil tiʼ le máaxoʼob maʼ u yóoliliʼob ku beetkoʼob baʼax kʼaasoʼ, tumen letiʼeʼ láayliʼ xan ku kʼebantaleʼ.
3 Le oʼolaleʼ kʼaʼabéet u kʼubik kíimsbil baʼalcheʼob tu yoʼolal u kʼebanoʼob letiʼ bey xan tu yoʼolal u kʼebanoʼob le kaajoʼ.+
4 Tsʼoʼoleʼ mix máak ku páajtal u chʼaʼtuklik tu juunal u beetik le nojoch yéetel jatsʼuts meyajaʼ, baʼaxeʼ chéen ken tʼaʼanak tumen Dios jeʼex tʼaʼanik Aaróneʼ.+
5 Bey túun xanoʼ Cristoeʼ maʼ tu yéeyuba chéen tu juunal+ utiaʼal ka kʼuchuk u beetuba u maas nojchil le sacerdoteʼoboʼ, baʼaxeʼ yéeyaʼab tumen Dios, tumen letiʼeʼ tu yaʼalajtiʼ: «Techeʼ in hijoech, bejlaʼeʼ tsʼoʼok in kʼuchul in beetinba a taata».+
6 Ichil le baʼaxoʼob tsʼíibtaʼanoʼoboʼ Dioseʼ tu yaʼalaj xan: «Techeʼ sacerdoteech utiaʼal mantatsʼ jeʼel bix Melquisedekeʼ».+
7 Cristoeʼ le ka kuxlaj bey wíinik way luʼumeʼ sen kʼáat óolnaj yéetel tuláakal u puksiʼikʼal tiʼ le Máax jeʼel u páajtal u salvartik tiʼ le kíimiloʼ. Lelaʼ tu beetaj yéetel kʼaʼamkach tʼaan bey xan yéetel u jaʼil u yich.+ Letiʼeʼ chʼenxikintaʼab baʼax tu kʼáataj, tumen u chʼaʼamaj saajkil tiʼ Dios.
8 Kex letiʼ u Paal Dioseʼ Cristoeʼ tu kanaj u yuʼub tʼaan yoʼolal le baʼaxoʼob tu muʼyajtoʼ.+
9 Le ka tsʼoʼok u beetik tuláakal baʼax kʼubéentaʼabtiʼeʼ+ pʼaʼat tu kʼab u salvartik utiaʼal mantatsʼ le máaxoʼob uʼuyik u tʼaanoʼ.+
10 Dioseʼ tsʼoʼok u yéeyik utiaʼal ka u beetuba u maas nojchil le sacerdoteʼob jeʼel bix tu beetaj Melquisedekeʼ.+
11 Yaʼab baʼax jeʼel u páajtal k-aʼalikteʼex tu yoʼolal Cristoeʼ chéen baʼaleʼ ku talamtal k-tsolikteʼex tumen istikyaj a naʼatkeʼex.
12 Ku páaʼtaʼaleʼ teʼexeʼ tsʼoʼok a pʼáatleʼex jeʼex juntúul j-kaʼansajeʼ, chéen baʼaleʼ beoraaʼ kʼaʼabéet u kaʼansaʼalteʼex tu kaʼatéen le baʼaxoʼob ta yáax kaneʼex tiʼ u tʼaan Diosoʼ.+ Teʼexeʼ tsʼoʼok u kaʼa kʼaʼabéettal a tséentaʼaleʼex yéetel leche, maʼ yéetel chichich janaliʼ.
13 Tuláakal máax ku seguer u tséentkuba yéetel lecheeʼ maʼ u kʼaj óol baʼax ku kaʼansik u tʼaan Dios yoʼolal le justiciaoʼ. Juntúul máak beyaʼ bey juntúul chan paaleʼ.+
14 Chéen baʼaleʼ le chichich janaloʼ utiaʼal nukuch máakoʼob, tumen letiʼobeʼ sáamsamal táan u yilik u yiijtal u tuukuloʼob. Bey túunoʼ letiʼobeʼ jeʼel u páajtal u kʼaj óoltikoʼob baʼax maʼalob bey xan baʼax maʼ maʼalobeʼ.