Hebreos 10:1-39
10 Le Leyoʼ ku chíikbesik+ le maʼalob baʼaloʼob kun taaloʼoboʼ,+ chéen baʼaleʼ maʼ táan u yeʼesik jach bixoʼobiʼ. Le oʼolaleʼ kex ka kʼuʼubuk sacrificioʼob cada añoeʼ junpuliʼ maʼ tu páajtal u pʼáatal jach limpioil le máaxoʼob ku natsʼkubaʼob tiʼ Diosoʼ.+
2 Tumen wa ka pʼáatkoʼob kaʼach jach limpioileʼ, ¿maʼ wa jeʼel u xuʼulul kaʼach u kʼuʼubul sacrificioʼobeʼ? Le máaxoʼob meyajtik Diosoʼ jeʼel u pʼáatal kaʼach limpioil u concienciaʼob le kéen tsʼoʼokok u perdonartaʼal u kʼebanoʼobeʼ.
3 Chéen baʼaleʼ maʼ bey u yúuchliʼ, le oʼolal cada año ku kʼuʼubul sacrificioʼob utiaʼal u kʼaʼajal tiʼ máak u kʼebanoʼob.+
4 U jaajileʼ u kʼiʼikʼel wakaxoʼob yéetel u kʼiʼikʼel chivoʼobeʼ maʼ tu páajtal u luʼsik le kʼebanoʼoboʼ.
5 Bey túunoʼ le ka taal Cristo way luʼumeʼ tu yaʼalaj tiʼ Dios: «‹Mix ofrenda mix sacrificio ta wóotaj a kʼame, chéen baʼaleʼ ta preparartajten junpʼéel wíinklil.
6 Maʼ utschaj ta tʼaan le tóokbil ofrendaʼoboʼ mix le ofrendaʼob yoʼolal le kʼebanoʼ›.+
7 Le oʼolal tin waʼalaj: ‹¡Ilawile! Teneʼ tsʼoʼok in taal, tsʼoʼok in taal utiaʼal ka in beet baʼax a kʼáat, in Dios.+ Teʼ rollooʼ yaan baʼax tsʼíibtaʼan tin woʼolaliʼ›».
8 Jeʼex k-ilkoʼ letiʼe tu yaʼalaj: «Mix ofrenda mix sacrificio ta wóotaj a kʼame. Maʼ utschaj ta tʼaan le tóokbil ofrendaʼoboʼ mix le ofrendaʼob yoʼolal le kʼebanoʼ». Leloʼobaʼ letiʼe sacrificioʼob ku yaʼalik le Ley ka kʼuʼubukoʼ.
9 Le oʼolal tu yaʼalaj: «¡Ilawile! Teneʼ tsʼoʼok in taal, tsʼoʼok in taal utiaʼal ka in beet baʼax a kʼáat».+ Bey túunoʼ letiʼeʼ tu luʼsaj le baʼaxoʼob ku beetaʼal kaʼachoʼ ka tu jeelintaj yéetel junpʼéel baʼax túumben.
10 Úuchik u beetaʼal «baʼax u kʼáat»+ Dioseʼ toʼoneʼ tsʼoʼok k-pʼáatal limpioil, tumen Cristoeʼ tu kʼubaj u wíinklil juntéeniliʼeʼ.+
11 Tuláakal sacerdoteeʼ sáamsamal ku bin teʼ tuʼux ku meyaj utiaʼal u páajtal u adorartaʼal Diosoʼ+ bey xan utiaʼal ka u kʼub sacrificioʼob yaʼab u téenel.+ U jaajileʼ le baʼaloʼobaʼ junpuliʼ maʼ tu páajtal u luʼsik tuláakal le kʼebanoʼoboʼ.+
12 Chéen baʼaleʼ Cristoeʼ utiaʼal u luʼsik le kʼebanoʼob utiaʼal mantatsʼoʼ chéen junpʼéeliliʼ sacrificio tu kʼubaj. Ka tsʼoʼokeʼ kulaj tu x-noʼoj kʼab Dios.+
13 Desde teʼ kʼiin jeʼeloʼ káaj u páaʼtik u tsʼaʼabal u enemigoʼob bey junpʼéel kʼáancheʼ utiaʼal u tsʼáaik u yookoʼobeʼ.+
14 Tumen chéen yéetel junpʼéeliliʼ sacrificioeʼ letiʼeʼ tsʼoʼok u pʼatik jach limpioil utiaʼal mantatsʼ le máaxoʼob táan u yilaʼal ka pʼáatkoʼob limpioiloʼ.+
15 Leloʼ bey xan u yeʼesiktoʼon le espíritu santooʼ, tumen tu yaʼalaj:
16 «Jéeobaeʼ ku yaʼalik: ‹Lelaʼ letiʼe pacto ken in beet tu yéeteloʼob le kéen tsʼoʼokok le kʼiinoʼob jeʼeloʼ. Yaan in tsʼáaik in leyoʼob tu puksiʼikʼaloʼob, yéetel yaan in tsʼíibtik tu tuukuloʼob›».+
17 Tu yaʼalaj xan: «Maʼ ken in kaʼa kʼaʼajs u kʼebanoʼob mix le baʼaloʼob kʼaastak u beetmoʼoboʼ».+
18 Le oʼolaleʼ tumen tsʼoʼok u perdonartaʼal le baʼaloʼobaʼ maʼ kʼaʼabéet u kaʼa kʼuʼubul ofrendaʼob yoʼolal le kʼebanoʼ.
19 Le oʼolaleʼ, sukuʼuneʼex, tu yoʼolal u kʼiʼikʼel Jesúseʼ maʼ saajkoʼon bin teʼ bej ku bin teʼ Cuarto Maas Jach Santooʼ.+
20 Le túumben bejaʼ junpʼéel bej ku biskoʼon tiʼ kuxtal, yéetel Jesús jeʼekʼabttoʼon le ka táatsʼmáan teʼ cortinaoʼ,+ le cortinaaʼ u wíinklil.
21 Tsʼoʼoleʼ tumen yaantoʼon juntúul nojoch sacerdote ku meyaj tu yotoch Dioseʼ+
22 koʼoneʼex natsʼikba yiknal Dios yéetel u jaajil u yóol k-puksiʼikʼal bey xan yéetel junpʼéel fe muʼukʼaʼan. Lelaʼ ku béeytal k-beetik tumen tsʼoʼok u pʼaʼatal limpioil k-puksiʼikʼal úuchik u pʼoʼobol k-conciencia bey xan k-wíinklil.+
23 Maʼ unaj k-chʼaʼik saajkil k-aʼal tu táan máakoʼob baʼax k-páaʼtikiʼ,+ tumen le máax tsʼaamiltoʼon le promesaoʼ jach yaan u béeykuntik baʼax u yaʼalmaj.
24 Koʼoneʼex ilik bix jeʼel k-paklan áantikbaʼex utiaʼal ka yanak yaabilaj ichiloʼoneʼex bey xan utiaʼal ka k-beeteʼex baʼaloʼob maʼalobtakeʼ.+
25 Tsʼoʼoleʼ maʼ unaj u xuʼulul k-muchʼikbaʼex+ jeʼex suuk u beetik jujuntúul máakoʼobeʼ, baʼaxeʼ unaj k-paklan líiʼsik k-óol.+ Tuláakal le baʼaloʼobaʼ unaj k-ilik maas beetkoʼob tumen naatsʼ yanil le kʼiin u yaʼalmaj Diosoʼ.+
26 Wa t-óoliliʼ k-kʼebantal kex tsʼoʼok k-kanik tubeel le jaajoʼ+ minaʼan uláakʼ sacrificio utiaʼal u perdonartaʼal k-kʼebanoʼob.+
27 Juntúul máax ku beetik beyoʼ chéen unaj u páaʼtik yéetel saajkil u kʼuchul u kʼiinil le juiciooʼ bey xan u yeʼesik u nojoch pʼujaʼanil Dios utiaʼal u xuʼulsik le máaxoʼob pʼekmiloʼ.+
28 Jeʼel máaxak maʼ tu tsʼoʼokbesik le baʼax ku yaʼalik u Ley Moisésoʼ maʼ unaj u chʼaʼabal óotsilil tiʼiʼ, baʼaxeʼ unaj u kíimil le kéen tsʼoʼokok u probartaʼal baʼax tu beetaj tumen kaʼatúul wa óoxtúul máak.+
29 Jeʼeloʼ ¿maʼ wa túun maas nojoch castigo ku náajmatik juntúul máax tsʼoʼok u pepeʼchaʼatik u Paal Diosiʼ? Juntúul máak beyoʼ tsʼoʼok u mixbaʼalkúuntik le kʼiʼikʼ kun béeykuntik le pactooʼ,+ le kʼiʼikʼ meyajnaj utiaʼal u pʼaʼatal limpioiloʼ, yéetel tsʼoʼok u tsʼáaikuba tu contra le espíritu santo beetik u chʼaʼabal óotsilil tiʼoʼ.+
30 Toʼoneʼ k-ojel Dios aʼalmil lelaʼ: «Teen kin vengartik le baʼax ku beetkoʼoboʼ, teen ken in tsʼáa baʼax ku náajmatikoʼob». Tsʼíibtaʼan xan lelaʼ: «Jéeobaeʼ yaan u juzgartik u kaajal».+
31 U jaajileʼ yaayaj baʼal* u lúubul máak tu kʼab le kuxaʼan Diosoʼ.
32 Teʼexeʼ unaj a kʼaʼajsikeʼexeʼ le ka eʼesaʼabteʼex le sáasil ku taal tiʼ Diosoʼ+ ta sen muʼyajteʼex yaayaj baʼaloʼob, kex beyoʼ maʼ xuʼul a meyajtikeʼex Diosiʼ.
33 Yaan kʼiineʼ jóoʼsaʼabeʼex tu táan máakoʼob utiaʼal u yaʼalaʼalteʼex baʼal yéetel utiaʼal u beetaʼal a muʼyajeʼex, yéetel yaan kʼiineʼ ta wáanteʼex* le máaxoʼob tu muʼyajtoʼob le baʼaloʼobaʼ.
34 Teʼexeʼ ta chʼaʼajeʼex óotsilil tiʼ le máaxoʼob oksaʼanoʼob kaʼach cárceloʼ, tsʼoʼoleʼ tumen a wojleʼex yaanteʼex junpʼéel baʼal maas maʼalob yéetel maʼ tu kʼastaleʼ+ yéetel kiʼimak óolal ta chaʼajeʼex u toʼokol le baʼaxoʼob yaanteʼexoʼ.+
35 Le oʼolaleʼ maʼ u xuʼulul a tʼaaneʼex yéetel u jaajil a wóoleʼex. Wa ka beetkeʼex beyoʼ yaan a kʼamkeʼex yaʼab utsiloʼob.+
36 Kʼaʼabéet u chúukpajal a wóoleʼex a meyajteʼex Dios,+ utiaʼal beyoʼ le kéen tsʼoʼokok a beetkeʼex le baʼax u kʼáatoʼ ka a wileʼex u béeytal le baʼax u yaʼalmajteʼexoʼ.
37 Tumen «chéen junpʼíit kʼiin u bin»,+ yéetel «le máax táan u taaloʼ yaan u kʼuchul, jach tu yorail ken kʼuchuk».+
38 «Chéen baʼaleʼ le máax toj u kuxtal tin táaneʼ yaan u seguer u kuxtal tu yoʼolal u fe»,+ chéen baʼaleʼ «wa ku náachtal tiʼ teneʼ maʼ ken u kiʼimakkúunt u yóol in puksiʼikʼal».+
39 Toʼoneʼ maʼ beyoʼon jeʼex le máaxoʼob ku náachtaloʼob tiʼ Dios yéetel ku xuʼulsaʼaltiʼoboʼ,+ baʼaxeʼ beyoʼon jeʼex le máaxoʼob yaan u fejoʼob ku salvartik u kuxtaloʼoboʼ.
