Gálatas 2:1-21
2 Ka tsʼoʼok u máan 14 añoseʼ binen tu kaʼatéen tu kaajil Jerusalén yéetel Bernabé,+ tsʼoʼoleʼ tin bisaj xan Tito tin wéetel.+
2 Binen Jerusalén tumen Yuumtsil eʼesten unaj in biniʼ, ka tin tsʼáaj u yojéelt le sukuʼunoʼob le baʼaloʼob maʼalobtak kin tsikbaltik tiʼ le j-táanxel luʼumiloʼoboʼ. Chéen baʼaleʼ lelaʼ maʼ tin beetaj tu táan tuláakaliʼ, chéen tu táan le máaxoʼob jach ku respetartaʼaloʼob teʼ múuchʼuliloʼ, utiaʼal in wojéeltik wa maʼalob le bix in meyajtik Diosoʼ wa maʼ. Wa maʼ maʼalobeʼ chéen kunel le baʼax tin beetoʼ.
3 Pero Tito+ le máax yaan kaʼach tin wéeteloʼ kex griegoeʼ maʼ obligartaʼab u circuncidartubaiʼ.*+
4 Chéen baʼaleʼ le problemaaʼ yanchaj tu yoʼolal le máaxoʼob ku yaʼalikubaʼob sukuʼunoʼob ookoʼob taʼakumbail ichil le múuchʼuliloʼ.+ Letiʼobeʼ chéen ook u yiloʼob bix u meyajtoʼon le libertad+ yaantoʼon yoʼolal Cristo Jesúsoʼ, utiaʼal beyoʼ ka u esclavizartoʼonoʼob tu kaʼatéen tiʼ le leyoʼ.+
5 Chéen baʼaleʼ toʼoneʼ maʼ t-chaʼajtiʼobiʼ+ mix tak chéen junsúutuk,* utiaʼal beyoʼ maʼ a náachkuntaʼaleʼex tiʼ le baʼaloʼob maʼalobtak yéetel jaajtak kaʼansaʼabteʼexoʼ.
6 Tsʼoʼoleʼ le máaxoʼob jach ku respetartaʼaloʼob teʼ múuchʼuliloʼ, máakoʼob jach kʼaj óolaʼanoʼobeʼ,+ mix baʼal túumben tu kaʼansoʼobten. U jaajileʼ jeʼel máaxakoʼob kaʼacheʼ teneʼ junpʼéeliliʼ bix in wilkoʼob, tumen Dioseʼ maʼatech u paktik máak chéen yoʼolal bix u yilaʼal.
7 Le máakoʼobaʼ tu yiloʼob tiʼ teen aʼalaʼan ka xiʼiken tu yiknal le máaxoʼob maʼ judíoʼoboʼ*+ utiaʼal ka in tsikbalttiʼob le baʼaloʼob maʼalobtak ku taal u kʼiiniloʼ, jeʼex kʼubéentaʼanil xan tiʼ Pedro ka xiʼik tu yiknal le judíoʼoboʼ.*
8 Le Máax tsʼáa u páajtalil tiʼ Pedro utiaʼal u beetik u apóstolil ichil le judíoʼoboʼ* letiʼ xan tsʼáaten u páajtalil in beetik in apóstolil ichil le j-táanxel luʼumiloʼoboʼ.+
9 Le ka tu yiloʼob xan le nojoch utsil tsʼaʼab tiʼ tenoʼ,+ Santiago,+ Cefas* yéetel Juan, le máaxoʼob kʼaj óolaʼanoʼob bey u nuuktakil* le múuchʼuliloʼ, tu tichʼaj u x-noʼoj kʼaboʼob tiʼ teen yéetel tiʼ Bernabé+ utiaʼal u yeʼeskoʼob maʼalob u yilkoʼob ka xiʼikoʼon yiknal le j-táanxel luʼumiloʼoboʼ, chéen baʼaleʼ letiʼobeʼ yiknal le judíoʼoboʼ.*
10 Chéen tu kʼubéentoʼob tiʼ toʼon ka k-chʼaʼ en cuenta le máaxoʼob óotsiloʼoboʼ. Lelaʼ letiʼe baʼax xan jach in tsʼaamaj in wóol in beetoʼ.+
11 Chéen baʼaleʼ le ka taal Cefas*+ tu kaajil Antioquíaeʼ+ tu táan u yich tin waʼalaj maʼ maʼalob baʼax ku beetkiʼ.
12 Tumen antes tiʼ u kʼuchul jujuntúul máakoʼob ku biskubaʼob yéetel Santiagoeʼ,+ Cefaseʼ suuk kaʼach u janal yéetel le j-táanxel luʼumiloʼoboʼ,+ chéen baʼaleʼ le ka kʼuch le máakoʼobaʼ letiʼeʼ xuʼul u beetik yéetel náachchaj tiʼ le j-táanxel luʼumiloʼoboʼ, tumen sajak kaʼach tiʼ le máaxoʼob circuncidartaʼanoʼoboʼ.+
13 U maasil le judíoʼoboʼ tu beetoʼob xan le baʼax tu beetaj Cefas yéetel u kaʼapʼéel ichiloʼ, ka tsʼoʼokeʼ tak Bernabé joʼopʼ xan u beetik beyoʼ.
14 Chéen baʼaleʼ le ka tin wilaj táan u beetkoʼob baʼaloʼob ku bin tu contra le jaajil kaʼansaj ku tsʼaʼabal kʼaj óoltbiloʼ,+ tin waʼalaj tiʼ Cefas* tu táan tuláakal: «Wa teech kex judíoech maʼ táan a kuxtal jeʼex le judíoʼoboʼ, baʼaxeʼ táan a kuxtal jeʼex le j-táanxel luʼumiloʼoboʼ, ¿bix a táabal a obligart le j-táanxel luʼumiloʼob utiaʼal ka kuxlakoʼob jeʼex u kuxtal le judíoʼoboʼ?».+
15 Toʼoneʼ judíoʼon desde ka síijoʼon, yéetel maʼ beyoʼon jeʼex le j-kʼeban máakoʼob táanxel luʼumiloʼoboʼ.
16 Toʼoneʼ k-ojleʼ juntúul máakeʼ maʼatech u yilaʼal toj u kuxtal ikil u tsʼoʼokbesik baʼax ku yaʼalik le leyoʼ, baʼaxeʼ chéen yoʼolal u fe+ tiʼ Cristo Jesús.+ Le oʼolal toʼoneʼ tsʼoʼok k-tsʼáaik k-fe tiʼ Cristo Jesús utiaʼal ka aʼalaʼak toj k-kuxtal tu yoʼolal k-fe tiʼ Cristo, maʼ ikil k-beetik baʼax ku yaʼalik le leyoʼ, tumen mix máak ku yaʼalaʼal toj u kuxtal ikil u tsʼoʼokbesik baʼax ku yaʼalik le leyoʼ.+
17 Chéen baʼaleʼ wa ku yilaʼal j-kʼeban máakoʼon kex táan k-tsʼáaik k-óol utiaʼal ka aʼalaʼak toj k-kuxtal tumen Dios tu yoʼolal k-fe tiʼ Cristoeʼ, ¿u kʼáat wa túun u yaʼaleʼ Cristo animarkoʼon kʼebantal? ¡Jach junpuliʼ maʼ!
18 Wa táan in jel líiʼsik le baʼaxoʼob tin nikaj úuchjeakiloʼ, leloʼ ku yeʼesik kin bin tu contra le leyoʼ.
19 Tumen teneʼ kíimen tu yoʼolal le leyoʼ.+ Chéen baʼaleʼ yoʼolal lelaʼ kʼuchen kuxtal tu táan Dios.
20 Beora túunaʼ bajaʼanen tiʼ junpʼéel cheʼ yéetel Cristo.+ Bejlaʼeʼ maʼ teen le kuxaʼanenoʼ,+ baʼaxeʼ Cristo kuxaʼan junmúuchʼ tin wéetel. U jaajileʼ le kuxtal yaanten beoraaʼ letiʼe yaanten yoʼolal le fe in tsʼaamaj tiʼ u Paal Diosoʼ,+ máax tu yaabilten yéetel tu kʼubaj u kuxtal tin woʼolal.+
21 Teneʼ maʼ tin rechazartik* u nojoch utsil Dios,+ tumen wa tu yoʼolal le ley ku yaʼalaʼal toj u kuxtal máakoʼ, u jaajileʼ chéen kunel úuchik u kíimil Cristo.+
Notas
^ Ilawil página 2559.
^ Ich griegoeʼ ku yaʼalaʼal kaʼach «junpʼéel hora».
^ Wa «maʼ circuncidartaʼanoʼoboʼ».
^ Wa «le máaxoʼob circuncidartaʼanoʼoboʼ».
^ Wa «le máaxoʼob circuncidartaʼanoʼoboʼ».
^ Wa «le máaxoʼob circuncidartaʼanoʼoboʼ».
^ Wa «columnailoʼob».
^ Ku yaʼalaʼal xan Pedro tiʼ.
^ Ku yaʼalaʼal xan Pedro tiʼ.
^ Ku yaʼalaʼal xan Pedro tiʼ.
^ Wa «maʼ tin pʼatik juntséelil».
