Mateo 22:1-46
22 Ka tʼaanaj Jesús tu kaʼatéeneʼ tu tsikbaltajtiʼob lelaʼ:
2 «U Reinoil kaʼaneʼ jeʼel u páajtal u keʼetel yéetel juntúul rey tu beetaj u festejoil u tsʼoʼokol u beel u paaleʼ.+
3 Le reyoʼ tu yaʼalaj tiʼ u esclavoʼob ka xiʼik u tʼanoʼob le máaxoʼob u yaʼalmajtiʼob ka xiʼikoʼob teʼ tsʼoʼokol beeloʼ, chéen baʼaleʼ letiʼobeʼ maʼ tu yóotoʼob taaliʼ.+
4 Le oʼolal tu kaʼa túuxtaj uláakʼ u esclavoʼob, letiʼeʼ tu yaʼalajtiʼob: ‹Aʼaleʼex tiʼ le máaxoʼob in waʼalmajtiʼob ka taalakoʼoboʼ: «¡Ilawileʼex! Tsʼoʼok in beetik janal, tsʼoʼok in kíimsik in waakaxoʼob yéetel le uláakʼ in waalakʼoʼob tin polokkíintoʼoboʼ, tsʼoʼok u listochajal tuláakal. Koʼoteneʼex teʼ tsʼoʼokol beeloʼ»›.
5 Chéen baʼaleʼ le máaxoʼob bin tʼanbiloʼ maʼ tu beetoʼob u cuentailiʼ, yaneʼ bin tu kool, uláakʼeʼ bin koonol.+
6 U maasiloʼobeʼ tu machoʼob le esclavoʼoboʼ, tu jaʼajatsʼoʼobeʼ ka tu kíimsoʼob.
7 Le rey túunoʼ jach kʼuuxilnajeʼ ka tu túuxtaj u soldadoʼob utiaʼal ka u kíimsoʼob le máaxoʼob kíims u esclavoʼoboʼ yéetel utiaʼal ka u tóokoʼob u kaajaloʼob.+
8 Ka tsʼoʼokeʼ tu yaʼalaj tiʼ u esclavoʼob: ‹U jaanlil le tsʼoʼokol beeloʼ tsʼoʼok u listochajal, chéen baʼaleʼ le máaxoʼob in waʼalmajtiʼob ka taalakoʼoboʼ maʼ u náajaltmaj u taaloʼobiʼ.+
9 Le oʼolaleʼ xeeneʼex teʼ noj bejoʼoboʼ, jeʼel máaxak ka a wileʼexeʼ aʼaleʼextiʼ ka taalak teʼ tsʼoʼokol beeloʼ›.+
10 Le esclavoʼob túunoʼ binoʼob teʼ bejoʼoboʼ ka tu yaʼaloʼob ka taalak le bukaʼaj máakoʼob tu yiloʼoboʼ, yanoʼobeʼ kʼasaʼanoʼob yéetel uláakʼoʼobeʼ utsoʼob. Bey túunoʼ le tuʼux ku beetaʼal le tsʼoʼokol beeloʼ chuʼup yéetel le máakoʼob binoʼoboʼ.*
11 Ka ook le rey u yil le máaxoʼob taaloʼoboʼ tu yilaj juntúul máak maʼ maʼalob le nookʼ u takmaj utiaʼal le kʼiin jeʼeloʼ.
12 Ka túun tu yaʼalajtiʼ: ‹Amigo, ¿bix ookikech wa le nookʼ a búukintmoʼ maʼ maʼalob utiaʼal le kʼiin jeʼelaʼ?›. Chéen baʼaleʼ le máakoʼ mix baʼal tu núukaj.
13 Le rey túunoʼ tu yaʼalaj tiʼ le máaxoʼob meyajtikoʼ: ‹Kʼaxeʼex u kʼaboʼob yéetel u yookoʼobeʼ ka a jóoʼs a píikchʼinteʼex teʼ táankab tuʼux éeʼjochʼeʼenoʼ. Teʼeloʼ tiʼ kun okʼol yéetel tiʼ ken u karachʼt u kojiʼ›.
14 Tumen yaʼab máaxoʼob tʼanaʼanoʼob, chéen baʼaleʼ chéen junpʼíit le yéeyaʼanoʼoboʼ».
15 Le fariseoʼob túunoʼ binoʼobeʼ ka tu múuchʼ tukultoʼob bix jeʼel u beetkoʼob u yaʼalik Jesús wa baʼax utiaʼal ka u tsʼáa tuʼux u takikoʼob u pooleʼ.+
16 Letiʼobeʼ tu túuxtoʼob jujuntúul tiʼ u discípuloʼob junmúuchʼ yéetel le máaxoʼob tsaypachtik Herodesoʼ,+ tu túuxtoʼob u yaʼaloʼob tiʼ Jesús: «J-Kaʼansaj, k-ojel ka waʼalik u jaajil yéetel ka kaʼansik u jaajil yoʼolal u beel Dios, yéetel maʼ ta kaxtik a lúubul utsil tiʼ mix máak, tumen maʼ ta juzgartik máak yoʼolal bix u yilaʼal.
17 Le oʼolaleʼ aʼaltoʼon, bix a wilik, ¿maʼalob wa ka boʼotaʼak le impuesto tiʼ Césaroʼ, wa maʼ?».
18 Chéen baʼaleʼ Jesúseʼ tumen u yojel kʼasaʼan máakoʼobeʼ tu yaʼalajtiʼob: «J-kaʼapʼéel icheʼex, ¿baʼaxten ka túuntkeʼex in wóol?
19 Eʼeseʼexten le taakʼin ikil u boʼotaʼal le impuestooʼ». Letiʼobeʼ tu taasoʼob junpʼéel denario tiʼ.
20 Letiʼ túuneʼ tu kʼáatajtiʼob: «¿Máax ku chíikpajal teʼelaʼ yéetel máax kʼaabaʼ tsʼíibtaʼaniʼ?».
21 Letiʼobeʼ tu yaʼaloʼob: «César, yéetel u kʼaabaʼ xan tsʼíibtaʼaniʼ». Jesús túuneʼ tu yaʼalajtiʼob: «Jeʼeloʼ boʼoteʼex tiʼ César le baʼaxoʼob u tiaʼal Césaroʼ, chéen baʼaleʼ tiʼ Dioseʼ boʼoteʼex le baʼaxoʼob u tiaʼal Diosoʼ».+
22 Ka tu yuʼuboʼob baʼax tu yaʼaleʼ jaʼakʼ u yóoloʼob, letiʼob túuneʼ tu pʼatoʼobeʼ ka binoʼob.
23 Teʼ kʼiin jeʼeloʼ le Saduceoʼob, le máaxoʼob ku yaʼalikoʼob maʼ kun kaʼa kuxkíintbil le kimenoʼoboʼ,+ náatsʼoʼob tu yiknaleʼ ka tu yaʼaloʼobtiʼ:+
24 «J-Kaʼansaj, Moiséseʼ tu yaʼalaj: ‹Wa juntúul xiib ku kíimil táanil tiʼ u yantal u paalaleʼ, u yíitsʼineʼ kʼaʼabéet u tsʼoʼokol u beel yéetel le u yatan pʼáatoʼ, utiaʼal beyoʼ ka yanak u paalal u sukuʼun›.+
25 Ichiloʼon túuneʼ yanchaj siete sukuʼuntsiloʼob; le yáax juntúuloʼ tsʼoʼok u beel, chéen baʼaleʼ kíim táanil tiʼ u yantal u paalal, ka túun tu pʼataj u yatan tiʼ u yáax íitsʼin.
26 Chéen baʼaleʼ bey xan úuchiktiʼoʼ, bey xan tiʼ le u kaʼatúuloʼ, bey xan tiʼ u maasiloʼoboʼ.
27 Ka tsʼoʼok u láaj kíimloʼobeʼ kíim xan le koʼoleloʼ.
28 Le kéen kaʼa kuxkíintaʼakoʼobeʼ, ¿máakalmáak tiʼ le siete sukuʼuntsiloʼob kun pʼáatal yéetel le koʼolelaʼ? Tumen tuláakloʼob tsʼoʼok u beeloʼob tu yéetel».
29 Jesúseʼ tu núukajtiʼob: «Teʼexeʼ maʼ maʼalob bix a tuukuleʼexiʼ, tumen maʼ a kʼaj óoleʼex u Tʼaan Diosiʼ yéetel maʼ a kʼaj óoleʼex le páajtalil yaan tiʼ Diosoʼ,+
30 tumen kéen kaʼa kuxkíintaʼak le kimenoʼoboʼ mix le xiiboʼob, mix le koʼoleloʼob kun tsʼoʼokol u beeloʼoboʼ, baʼaxeʼ yaan u kuxtaloʼob jeʼex le ángeloʼob yanoʼob teʼ kaʼanoʼ.+
31 Dioseʼ tu yaʼalajteʼex yaan u kaʼa kuxkíintaʼal le kimenoʼoboʼ. ¿Maʼ wa ta xokeʼex le baʼax tu yaʼalajteʼexaʼ?:
32 ‹Teen u Dios Abrahán, u Dios Isaak yéetel u Dios Jacob›.+ Letiʼeʼ maʼ u Dios kimenoʼobiʼ, baʼaxeʼ u Dios máaxoʼob kuxaʼanoʼob».+
33 Le yaʼabkach máakoʼob túunoʼ ka tu yuʼuboʼob lelaʼ pʼáat jaajap u chiʼob yoʼolal bix u kaʼansaj.+
34 Le fariseoʼoboʼ ka tu yuʼuboʼob bix maʼakik u chiʼ le saduceoʼob tumen Jesúsoʼ muchʼlajoʼob tu yiknal.
35 Juntúul tiʼ letiʼob jach u yojel kaʼach baʼax ku yaʼalik le Leyoʼ tu kʼáataj tiʼ Jesús utiaʼal u probartik:
36 «J-Kaʼansaj, ichil le baʼaxoʼob ku yaʼalik le Leyoʼ, ¿máakalmáak u maas nojchil?».+
37 Letiʼeʼ tu yaʼalajtiʼ: «‹Kʼaʼabéet a yaabiltik Jéeoba yéetel tuláakal a puksiʼikʼal, yéetel tuláakal a kuxtal bey xan yéetel tuláakal a tuukul›.+
38 Lelaʼ letiʼe mandamiento maas nojochoʼ yéetel letiʼe yáax baʼax ku yaʼalik le Leyoʼ.
39 Le u kaʼapʼéeloʼ chíikaʼan tiʼ le yáax junpʼéeloʼ, letiʼ lelaʼ: ‹Kʼaʼabéet a yaabiltik a wéet máakil jeʼex a yaabiltikabaeʼ›.+
40 Tuláakal le Ley yéetel tuláakal le baʼax kaʼansaʼab tumen le profetaʼoboʼ ku taaloʼob tiʼ le kaʼapʼéel mandamientoʼobaʼ».+
41 Ka tsʼoʼokeʼ Jesúseʼ tu kʼáataj tiʼ le fariseoʼoboʼ:+
42 «¿Baʼax ka tuklikeʼex yoʼolal le Cristooʼ? ¿Máax paaliʼ?». Letiʼobeʼ tu núukoʼob: «U paal* David».+
43 Jesús túuneʼ tu kʼáatajtiʼob: «¿Baʼaxten túun Davideʼ nuʼuktaʼab tumen Dios+ ka u yaʼal Yuumtsil tiʼ Cristo? Si Davideʼ tu yaʼalaj:
44 ‹Jéeobaeʼ tu yaʼalaj tiʼ in Yuumtsil: «Kulen tin x-noʼoj kʼab utiaʼal ka a páaʼt in tsʼáaik a enemigoʼob tu yáanal a wookoʼob»›.+
45 Le oʼolaleʼ wa David ku yaʼalik Yuumtsil tiʼ le Cristooʼ, ¿baʼaxten túun ku yaʼalaʼal u paal?».+
46 Mix máak páajchaj u yaʼalik mix baʼal tu yoʼolal le baʼax tu kʼáatoʼ. Desde teʼ kʼiin jeʼeloʼ mix máak táab u beet uláakʼ kʼáatchiʼ tiʼ Jesús.
Notas
^ Wa «le máakoʼob kulukbaloʼob yiknal le mesaoʼ».
^ Ich griegoeʼ le tʼaanaʼ u kʼáat xan u yaʼal «chʼiʼibal» wa «áabil».
