Mateo 20:1-34
20 Tumen u Reinoil kaʼaneʼ bey jeʼex u yuumil junpʼéel parcelaeʼ. Letiʼeʼ jóokʼ jach jaʼatskab utiaʼal u contratartik máakoʼob utiaʼal ka meyajnakoʼob teʼ tuʼux u pakʼmaj uvaoʼ.+
2 Ka tsʼoʼok u tsikbaltik yéetel le j-meyajoʼob junpʼéel denario ken u boʼottiʼob le kʼiinoʼ, tu túuxtoʼob teʼ tuʼux u pakʼmaj uvaoʼ.
3 Ka jóokʼ tu kaʼatéen teʼ kʼíiwik óoliʼ teʼ hora óoxpʼéeloʼ* tu yilaj uláakʼ máakoʼob minaʼan meyaj tiʼob waʼalakbaloʼobiʼ,
4 ka tu yaʼalajtiʼob: ‹Xeeneʼex xan meyaj teʼ tuʼux in pakʼmaj uvaoʼ, jeʼel in boʼotikteʼex le bajux unajoʼ›.
5 Letiʼob túuneʼ binoʼob. Ka tsʼoʼokeʼ le u yuumil le parcelaoʼ jóokʼ óoliʼ teʼ hora seisoʼ* bey xan óoliʼ teʼ hora nueveoʼ* ka tu tʼanaj uláakʼ j-meyajoʼob.
6 Tu tsʼookeʼ jóokʼ teʼ kʼíiwik óoliʼ teʼ hora onceoʼ* ka tu yilaj yaan uláakʼ máakoʼob waʼalakbaloʼobiʼ ka tu yaʼalajtiʼob: ‹¿Baʼaxten bul kʼiin way waʼalakbaleʼexeʼ yéetel maʼ táan a meyajeʼexiʼ?›.
7 Letiʼobeʼ tu núukoʼob: ‹Tumen mix máak u contratartoʼon›. Letiʼeʼ tu yaʼalajtiʼob: ‹Xeeneʼex xan meyaj teʼ tuʼux in pakʼmaj uvaoʼ›.
8 Ka káaj u yáakʼabtaleʼ u yuumil le paakʼaloʼ tu yaʼalaj tiʼ le máax u tsʼaamaj u yil le meyajoʼ: ‹Tʼan le máakoʼoboʼ ka a yáax boʼot le kʼuchoʼob tu tsʼookoʼ,+ tu tsʼookeʼ ka boʼotik le yáax taaloʼoboʼ›.
9 Le ka taal le máakoʼob ookoʼob meyaj teʼ hora onceoʼ cada juntúuleʼ tsʼaʼab junpʼéel denario tiʼ.
10 Le oʼolaleʼ ka taal le máaxoʼob yáax ookoʼob meyajoʼ tu tukloʼobeʼ maas yaʼab kun tsʼaabiltiʼobiʼ, chéen baʼaleʼ tiʼ cada juntúuleʼ boʼotaʼab xan junpʼéel denario.
11 Le ka boʼotaʼaboʼobeʼ káaj u tʼaanoʼob tu contra u yuumil le parcelaoʼ.
12 Letiʼobeʼ tu yaʼaloʼob: ‹¡Le kʼuchoʼob tu tsʼookaʼ chéen junpʼéel hora meyajnajoʼob, chéen baʼaleʼ le bajux ta tsʼáajtiʼoboʼ letiʼe bajux xan ta tsʼáajtoʼon kex bul kʼiin meyajnajoʼon tu yáanal u chokoil le Kʼiinoʼ!›.
13 Chéen baʼaleʼ u yuumil le parcelaoʼ tu yaʼalaj tiʼ juntúul tiʼ letiʼobiʼ: ‹Amigo, maʼ táan in beetiktech mix junpʼéel kʼaasiʼ. ¿Maʼ wa ta waʼalajten jeʼel a taal meyaj tin wiknal yoʼolal junpʼéel denarioeʼ?+
14 Jeʼeloʼ chʼaʼ u tojol a meyajeʼ ka xiʼikech. Tiʼ le máax kʼuch tu tsʼookoʼ in kʼáat xan in tsʼáa le bukaʼaj tin tsʼáajtechoʼ.
15 ¿Maʼ wa tu páajtal in beetik jeʼel baʼaxak in kʼáat yéetel in taakʼineʼ? ¿Yaaj ta wóol* tumen teneʼ kin weʼesik in wutsil?›.+
16 Bey túunoʼ le máaxoʼob yanoʼob tu tsʼookoʼ yaan u máanoʼob táanil, yéetel le yanoʼob táaniloʼ yaan u pʼáatloʼob tu tsʼook».+
17 Le táan u binoʼob Jerusalénoʼ Jesúseʼ tu bisaj junpáayil u 12 discípuloʼobeʼ ka tu yaʼalajtiʼob:+
18 «¡Ilawileʼex! Táan k-bin Jerusalén, teʼeloʼ u Paal máakeʼ yaan u kʼuʼubul tiʼ u nuuktakil le sacerdoteʼoboʼ bey xan tiʼ le escribaʼoboʼ, yéetel yaan u yaʼalaʼal ka kíimsaʼak.+
19 Yaan xan u kʼuʼubul tiʼ le máaxoʼob maʼ judíoʼoboʼ utiaʼal ka pʼaʼastaʼak, ka jaʼajatsʼaʼak yéetel ka kíimsaʼak tiʼ junpʼéel cheʼ;+ chéen baʼaleʼ tu yóoxpʼéel kʼiineʼ yaan u líiʼsaʼal».+
20 U yatan Zebedeo+ yéetel u paalaloʼobeʼ náatsʼoʼob tu yiknal Jesús. Le koʼoleloʼ xolaj tu táan Jesús yéetel tu kʼáataj junpʼéel baʼal tiʼ.+
21 Jesúseʼ tu yaʼalajtiʼ: «¿Baʼax taak a kʼáatik?». Le koʼoleloʼ tu núukaj: «In kʼáat ka kulak le in kaʼatúul paalaloʼob ta tséel teʼ ta Reinooʼ, juntúuleʼ ta x-noʼoj yéetel uláakʼeʼ ta x-tsʼíik».+
22 Jesúseʼ tu yaʼalaj tiʼ u paalaloʼob Zebedeo: «Teʼexeʼ maʼ a wojleʼex baʼax ka kʼáatkeʼexiʼ. ¿Jeʼel wa u páajtal a wukʼikeʼex le copa jach taʼaytak in wukʼikoʼ?».+ Letiʼobeʼ tu núukoʼob: «Jeʼel u páajtaleʼ».
23 Jesúseʼ tu yaʼalajtiʼob: «U jaajileʼ yaan a wukʼikeʼex in copa,+ chéen baʼaleʼ maʼ teen aʼalik máax kun kutal tin x-noʼoj wa tin x-tsʼíikiʼ, in Taata kun yéeyik máaxoʼob kun kutaloʼobiʼ».+
24 Le ka tu yuʼuboʼob lelaʼ le uláakʼ diez discípuloʼoboʼ kʼuuxilnajoʼob yéetel le kaʼatúul sukuʼuntsiloʼobaʼ.+
25 Chéen baʼaleʼ Jesúseʼ tu tʼanoʼob tu yiknaleʼ ka tu yaʼalajtiʼob: «Teʼexeʼ a wojleʼexeʼ le máaxoʼob ku gobernaroʼoboʼ ku nojbaʼalkúuntkubaʼob tu yóokʼol le kaajoʼoboʼ, yéetel le máaxoʼob yaan autoridad tiʼoboʼ ku tsʼáaikoʼob le kaajoʼob yáanal u páajtaliloʼoboʼ.+
26 Chéen baʼaleʼ ichileʼexeʼ maʼ unaj u yúuchul beyoʼ,+ baʼaxeʼ le máax u kʼáat u beetuba u maas nojchil ichileʼexeʼ unaj u meyajtikeʼex.+
27 Le máax xan u kʼáat le primer lugar ichileʼexoʼ unaj u beetkuba a esclavoʼex.+
28 Jeʼex u Paal máakeʼ maʼ taal utiaʼal ka meyajtaʼakiʼ, baʼaxeʼ taal utiaʼal ka u meyajt+ u maasil bey xan utiaʼal u tsʼáaik u kuxtal bey junpʼéel boʼol utiaʼal u salvartaʼal yaʼab máakoʼobeʼ».+
29 Le ka jóokʼ Jesús yéetel u discípuloʼob tu kaajil Jericóeʼ yaʼab máakoʼob binoʼob tu paach.
30 Le táan u binoʼoboʼ yaan kaʼach kaʼatúul máakoʼob chʼóopoʼob kulukbaloʼob tu jáal le bejoʼ. Le máakoʼobaʼ ka tu yuʼuboʼob táan u máan Jesús teʼeloʼ tu kʼaʼam aʼaloʼob: «¡Yuumtsil, u Paal* David, chʼaʼtoʼon óotsilil!».+
31 Chéen baʼaleʼ kʼeʼeyoʼob tumen le yaʼabkach máakoʼoboʼ ka aʼalaʼabtiʼob ka u mak u chiʼob, chéen baʼaleʼ letiʼobeʼ maas kʼaʼamchaj u yawatoʼob, tu yaʼaloʼob: «¡Yuumtsil, u Paal David, chʼaʼtoʼon óotsilil!».
32 Jesús túuneʼ jeʼeli, tu tʼanoʼobeʼ ka tu yaʼalajtiʼob: «¿Baʼax a kʼáateʼex ka in beet ta woʼolaleʼex?».
33 Letiʼobeʼ tu núukoʼob: «Yuumtsil, k-kʼáat ka yanak u sáasilil k-ich».
34 Jesús túuneʼ tu jach chʼaʼaj óotsilil tiʼobeʼ ka tu machaj u yich le máakoʼoboʼ,+ teʼ súutuk jeʼeloʼ yanchaj u sáasilil u yichoʼob. Ka tsʼoʼokeʼ le kaʼatúul máakoʼobaʼ binoʼob tu paach Jesús.
Notas
^ Kex láas 9:00 jaʼatskab. Úuchjeakileʼ le horaʼoboʼ ku káajal u xoʼokol desde ken tíipʼik kʼiin.
^ Kex láas 12:00 chúumuk kʼiin.
^ Kex láas 3:00 u chíinil kʼiin.
^ Kex láas 5:00 u chíinil kʼiin.
^ Ich griegoeʼ ku yaʼalaʼal kaʼach «kʼasaʼan a wich».
^ Ich griegoeʼ le tʼaanaʼ u kʼáat xan u yaʼal «chʼiʼibal» wa «áabil».
