¿Tu puksiʼikʼal máak wa yaan u Reino Dios?

PAX ICH

Baʼax ku yaʼalik le Bibliaoʼ

U Reino Dioseʼ maʼ junpʼéel baʼal yaan tu puksiʼikʼal le máaxoʼob adorarkoʼ. a Le Bibliaoʼ ku yaʼalikeʼ u Reino Dioseʼ tiaʼan teʼ kaʼanoʼ (Mateo 4:17). Ku yaʼalik xaneʼ junpʼéel gobierno táan u gobernar desde teʼ kaʼanoʼ. Koʼox ilik jujunpʼéel baʼaxoʼob ku yaʼalik le Bibliaoʼ.

U Reino Dioseʼ yaan u Reyil yéetel yaan xan uláakʼ máaxoʼob kun gobernar tu yéetel. Yaan máaxoʼob ken u gobernarte, yéetel yaan xan u tsʼáaik leyoʼob. Tsʼoʼoleʼ yaan xan u yilik ka beetaʼak baʼax u kʼáat Dios teʼ kaʼanoʼ bey xan way Luʼumeʼ (Mateo 6:10; Apocalipsis 5:10).
U Reino Dioseʼ yaan u gobernartik u «kajnáaliloʼob tuláakal kaajoʼob, luʼumoʼob bey [xan] le máaxoʼob ku tʼankoʼob jejeláas idiomaʼoboʼ» (Daniel 7:13, 14). Maʼ chéen máakoʼob yéey utiaʼal u gobernariʼ, baʼaxeʼ Dios tsʼaamil utiaʼal u nuʼuktik tuláakal le máakoʼoboʼ (Salmo 2:4-6; Isaías 9:7).
Jesúseʼ tu yaʼalaj tiʼ u apóstoloʼob yaan u yantaloʼob tu yéetel tu Reino Dios. ¿Baʼax ken u beetoʼobiʼ? Jesúseʼ tu yaʼalajtiʼob: «Yaan a kutaleʼex tiʼ tronoʼob». Yéetel le tʼaanoʼobaʼ táan u yaʼaliktiʼob yaan u gobernaroʼob tu yéetel (Lucas 22:28, 30).
U Reino Dioseʼ yaan u xuʼulsik tiʼ le máaxoʼob pʼekmil Diosoʼ (Salmo 2:1, 2, 8, 9; 110:1, 2; 1 Corintios 15:25, 26).

Jeʼex túun k-ilkoʼ le Bibliaoʼ maʼ tu kaʼansik wa u Reino Dioseʼ chéen junpʼéel baʼax yaan tu puksiʼikʼal máak. Le Bibliaoʼ ku kaʼansikeʼ «le baʼaloʼob maʼalobtak ken u beet le Reinooʼ» unaj u kʼuchul t-puksiʼikʼal yéetel unaj u péeksikoʼon k-beet baʼax maʼalob (Mateo 13:19; 24:14).

¿Baʼaxten Jesúseʼ tu yaʼalaj «U Reino Dioseʼ tiaʼan ichileʼexeʼ»?

Yaan jujunpʼéel bibliaʼobeʼ bey u traducirkoʼob le baʼax ku yaʼalik Lucas 17:21: «U Reino Dioseʼ tiaʼan ichileʼexeʼ». Le oʼolal yaʼab máakoʼobeʼ ku tuklikoʼobeʼ u Reino Dioseʼ tiaʼan ichil u puksiʼikʼal máakeʼ. Chéen baʼaleʼ utiaʼal k-naʼatik jach baʼax u kʼáat u yaʼal le tekstooʼ kʼaʼabéet k-ojéeltik tiʼ baʼax táan kaʼach u tʼaan Jesús.

Le kʼasaʼan máakoʼobaʼ ku tuklikoʼob kaʼach tiʼ yaan u Reino Dios tu puksiʼikʼaloʼobeʼ

Le baʼax tu yaʼalaj Jesús teʼ tekstooʼ táan kaʼach u yaʼalik tiʼ le fariseoʼoboʼ. Letiʼobeʼ joʼopʼ u múuchʼ tuklikoʼob bix jeʼel u páajtal u kíimskoʼob Jesúseʼ (Mateo 12:14; Lucas 17:20). ¿Táan wa túun kaʼach u yaʼalik Jesús de ke tiaʼan u Reino Dios tu puksiʼikʼal le máakoʼobaʼ? Maʼatech, tumen letiʼeʼ tu yaʼalajtiʼob: «A puksiʼikʼaleʼexeʼ chuup yéetel kʼasaʼanil bey xan yéetel tuus» (Mateo 23:27, 28).

Yaan uláakʼ bibliaʼobeʼ ku yeʼeskoʼob jach baʼax ku tsʼáaik naʼatbil le baʼax tu yaʼalaj Jesús teʼ Lucas 17:21. Le Quiliʼich Biblia ich Mayaoʼ ku yaʼalik: «U rey Dioseʼ ichileʼex yaan». Le Biblia U Tʼaan Dios utiaʼal u Kajnáaliloʼob le Túumben Luʼumoʼ ku yaʼalik: «U Reino Dioseʼ chúumuk tiʼ teʼex yaan». Le ka tu yaʼalaj Jesús le tʼaanoʼobaʼ tiʼ yaan kaʼach chúumuk tiʼ letiʼobeʼ yéetel tsʼokaʼaniliʼ u yéeyaʼal tumen Dios utiaʼal u beetik u Reyil tiʼ u Reino Dioseʼ (Lucas 1:32, 33).

a Yaʼab religiónoʼob kaʼansikeʼ u Reino Dioseʼ tiaʼan ichil u puksiʼikʼal máakeʼ. Junpʼéel religión yaan Estados Unidoseʼ tu yaʼaleʼ u Reino Dioseʼ «tiaʼan tu puksiʼikʼal yéetel ichil u kuxtal le máakoʼoboʼ». Teʼ libro Jesús de Nazaret, le papa Benedicto XVI tu yaʼalaj: «U Reino Dioseʼ ku yantal tu puksiʼikʼal máax ku yuʼubik u tʼaan Dios. Chéen bey jeʼel u páajtal u kʼuchul tu puksiʼikʼal máakoʼ».