Apocalipsis 20:1-15
20 Teneʼ tin wilaj juntúul ángel táan u yéemel teʼ kaʼanoʼ, u machmaj u llaveil le taamkach jooloʼ+ bey xan junpʼéel nojoch cadena.
2 Letiʼeʼ tu machaj le nojoch kaanoʼ,+ le úuchben kaanoʼ,+ le ku yaʼalaʼal Kʼaasilbaʼal*+ yéetel Satanás+ tiʼoʼ, ka tu kʼaxaj tu yáamil 1,000 años.
3 Tsʼoʼoleʼ tu píikchʼintaj teʼ taamkach jooloʼ+ ka tu makaj yéetel ka tu sellartaj utiaʼal maʼ u seguer u tusik u kajnáaliloʼob luʼum, tak ken tsʼoʼokok le 1,000 añosoʼ. Le kéen tsʼoʼokkeʼ yaan u jáalkʼabtaʼal junpʼíit tiempo.+
4 Teneʼ tin wilaj tronoʼob. Tiʼ le máaxoʼob kulajoʼob teʼ tronoʼoboʼ tsʼaʼab páajtalil utiaʼal u juzgaroʼob. Tin wilaj le máaxoʼob kíimsaʼaboʼob* úuchik u tʼaanoʼob tu yoʼolal Jesús bey xan tu yoʼolal Diosoʼ. Le máakoʼobaʼ maʼ tu adorartoʼob le tsʼíitsʼik baʼalcheʼoʼ mix u imagenil yéetel maʼ tu chaʼaj u marcartaʼal u táanpoolaloʼob mix u kʼaboʼobiʼ.+ Le máakoʼobaʼ kaʼa kuxlajoʼob yéetel káaj u reinaroʼob tu yáamil 1,000 años yéetel Cristo.+
5 Lelaʼ letiʼe yáax máakoʼob kaʼa kuxkíintaʼaboʼoboʼ.+ (U maasil le kimenoʼoboʼ+ maʼ séeb kuxlajoʼobiʼ, tak ka tsʼoʼok le 1,000 añosoʼ).
6 Kiʼimak u yóol yéetel santo tuláakal máax ku táakpajal ichil le yáax máakoʼob ku kaʼa kuxkíintaʼaloʼoboʼ.+ Le kaʼa kíimiloʼ+ minaʼan páajtalil tu yóokʼoloʼob,+ baʼaxeʼ yaan u meyajoʼob bey sacerdoteʼob+ utiaʼal Dios bey xan utiaʼal Cristo, yéetel yaan u reinaroʼob tu yéetel ichil le 1,000 añosoʼ.+
7 Le kéen tsʼoʼokok le 1,000 añosoʼ, Satanáseʼ yaan u jáalkʼabtaʼal teʼ tuʼux kʼalaʼanoʼ.
8 Letiʼ túuneʼ yaan u jóokʼol u tus le kaajoʼob yanoʼob tu kantiʼitsil yóokʼol kaaboʼ, le jeʼeloʼobaʼ Gog yéetel Magog. Letiʼeʼ yaan u muchʼkíintikoʼob utiaʼal le guerraoʼ. Le máaxoʼob kun muchʼkíintbiloʼoboʼ jach táaj yaʼaboʼob jeʼex u arenail le kʼáaʼnáaboʼ.
9 Letiʼobeʼ binoʼob tiʼ tuláakal yóokʼol kaab yéetel tu baʼpachtoʼob u campamento le máaxoʼob santoʼoboʼ bey xan le kaaj yaabiltaʼanoʼ. Chéen baʼaleʼ éem kʼáakʼ desde teʼ kaʼanoʼ ka tóokaʼaboʼob.+
10 Le Kʼaasilbaʼal tuskoʼob kaʼachoʼ píikchʼintaʼab ichil le kʼáaʼnáab de kʼáakʼ yéetel azufreoʼ, teʼ tuʼux píikchʼintaʼab xan le tsʼíitsʼik baʼalcheʼ+ bey xan le maʼ jaajil profetaoʼ.+ Teʼeloʼ tiʼ kun beetbil u muʼyajoʼob* bul kʼiin yéetel bul áakʼab utiaʼal kʼiinoʼob minaʼan u xuuliʼ.
11 Tin wilaj xan junpʼéel nojoch sak trono bey xan le máax kulukbal yóokʼoloʼ.+ Tu táaneʼ púutsʼ le luʼum bey xan le kaʼanoʼ+ yéetel maʼ ilaʼab tuʼux tsʼoʼokoʼobiʼ.
12 Le máaxoʼob kimenoʼob kaʼachoʼ, le nuuktakoʼoboʼ bey xan le mejentakoʼoboʼ, tin wilaj waʼalakbaloʼob tu táan le tronooʼ, ka chóolaʼab le rolloʼoboʼ. Chéen baʼaleʼ chóolaʼab uláakʼ rollo, u rolloil le kuxtaloʼ.+ Le kimenoʼob túunoʼ juzgartaʼaboʼob tu yoʼolal le baʼax tu beetoʼoboʼ,+ jeʼex tsʼíibtaʼanil teʼ rolloʼoboʼ.
13 Le kʼáaʼnáaboʼ tu kʼubaj le kimenoʼob yaan ichiloʼ, le kíimil yéetel le Muknaloʼ* tu kʼuboʼob xan le kimenoʼob yaan ichiloʼoboʼ. Ka juzgartaʼab cada juntúul máak tu yoʼolal baʼax tu beetaj.+
14 Le ka tsʼoʼokeʼ le kíimil yéetel le Muknaloʼ* píikchʼintaʼaboʼob ichil le kʼáaʼnáab de kʼáakʼoʼ.+ Le kʼáaʼnáab de kʼáakʼoʼ+ letiʼe kaʼa kíimiloʼ.+
15 Tsʼoʼoleʼ tuláakal le máaxoʼob maʼ tsʼíibtaʼan u kʼaabaʼob tu libroil le kuxtaloʼ+ píikchʼintaʼaboʼob ichil le kʼáaʼnáab de kʼáakʼoʼ.+
Notas
^ Ich griegoeʼ ku yaʼalaʼal kaʼach «Diablo».
^ Ich griegoeʼ ku yaʼalaʼal kaʼach «kíimsaʼaboʼob yéetel báat».
^ Wa «kʼalbiloʼob».
^ Ilawil página 2572.
^ Ilawil página 2572.
