प्रेषितहरूका कार्य ११:१-३०
११ अब यहुदियामा भएका प्रेषितहरू र भाइहरूले अन्यजातिका मानिसहरूले पनि परमेश्वरको वचन स्विकारेछन् भनी सुने।
२ त्यसैले जब पत्रुस यरुसलेम आए, तब खतनाका समर्थकहरूले+ तिनको आलोचना गर्न थाले।*
३ उनीहरूले यसो भने: “तपाईँले खतना नगरेका मानिसहरूको घरमा गएर तिनीहरूसँगै खानपिन गर्नुभयो।”
४ तब पत्रुसले उनीहरूलाई घटनाको पूरै विवरण यसरी सुनाउन थाले:
५ “जोप्पा सहरमा म प्रार्थना गर्दै थिएँ। तब मैले एउटा दर्शनमा* ठूलो तन्नाजस्तो केही चिज आकाशबाट झर्दै गरेको देखेँ। त्यसको चारै कुना समातेर त्यसलाई झारिँदै थियो र त्यो सीधै मकहाँ आयो।+
६ त्यसलाई नियालेर हेर्दा मैले त्यसमा पृथ्वीका चारखुट्टे जनावर, जङ्गली जन्तु, घस्रने जन्तु अनि आकाशका चराहरू देखेँ।
७ अनि मलाई यसो भनेको आवाज मैले सुनेँ: ‘उठ पत्रुस, मारेर खाऊ!’
८ तर मैले भनेँ: ‘नाइँ प्रभु किनकि अपवित्र अनि अशुद्ध थोक मैले कहिल्यै मुखमा हालेको छैनँ।’
९ अनि दोस्रो पटक आकाशबाट फेरि यस्तो आवाज आयो, ‘परमेश्वरले शुद्ध पार्नुभएको कुरालाई तिमी अपवित्र भन्न छोड।’
१० तेस्रो पटक पनि त्यस्तै आवाज आयो अनि सबै थोक फेरि आकाशतिरै लगियो।
११ त्यत्ति नै खेर सिजरियाबाट मकहाँ पठाइएका तीन जना मानिस हामी बसेको घरको ढोकामा टुप्लुक्क आइपुगे।+
१२ अनि पवित्र शक्तिले मलाई कुनै शङ्का नगरी तिनीहरूसित जाऊ भन्यो। यी छ जना भाइ पनि मसँगै आए अनि हामी ती मानिसको घरभित्र पस्यौँ।
१३ “अनि तिनले आफ्नो घरमा स्वर्गदूत आएर यसो भनेको कुरा हामीलाई सुनाए: ‘जोप्पामा मानिसहरू पठाएर पत्रुस भनिने सिमोनलाई बोलाऊ+
१४ अनि तिनले तिमीलाई ती कुराहरू बताउनेछन्, जसद्वारा तिमी र तिम्रो घरमा हुनेहरूको उद्धार हुनेछ।’
१५ जब मैले बोल्न थालेँ, तब पवित्र शक्ति तिनीहरूमाथि आयो,+ जसरी सुरुमा हामीमाथि पनि आएको थियो।
१६ तब प्रभुले भन्ने गर्नुभएको यो वचन मैले सम्झेँ, ‘युहन्नाले पानीमा बप्तिस्मा गराए+ तर तिमीहरूको बप्तिस्मा पवित्र शक्तिद्वारा हुनेछ।’+
१७ प्रभु येसु ख्रिष्टमाथि विश्वास गरेर हामीले परमेश्वरबाट जुन वरदान सित्तैँमा पायौँ, त्यही वरदान यदि उहाँले तिनीहरूलाई पनि दिनुभयो भने परमेश्वरलाई रोक्न सक्ने* म को हुँ र?”+
१८ यी कुरा सुनेपछि उनीहरूले विरोध गर्न छोडे* अनि यसो भन्दै परमेश्वरको महिमा गरे: “अन्यजातिका मानिसहरूले पनि जीवन पाऊन् भनेर परमेश्वरले तिनीहरूलाई पश्चात्ताप गर्ने मौका दिनुभएको छ भनेर अब स्पष्ट भयो।”+
१९ स्तिफनसको घटनापछि आइपरेको सङ्कष्टले गर्दा तितरबितर भएकाहरू+ फोनिसिया, साइप्रस र एन्टिओकसम्मै पुगे तर तिनीहरूले यहुदीहरूलाई मात्र सुसमाचार सुनाए।+
२० तर तिनीहरूमध्ये कोही-कोही, जो साइप्रस र साइरेनीका थिए, तिनीहरू एन्टिओक आए र तिनीहरूले ग्रीकभाषीहरूलाई प्रभु येसुको सुसमाचार सुनाउन थाले।
२१ साथै यहोवा* परमेश्वर तिनीहरूको साथमा हुनुहुन्थ्यो र थुप्रै मानिसले प्रभुमा विश्वास गर्न थाले र उहाँको चेला बने।+
२२ तिनीहरूको खबर यरुसलेममा भएको मण्डलीको कानमा पुग्यो अनि उनीहरूले बर्णाबासलाई+ एन्टिओक पठाए।
२३ त्यहाँ पुगेर परमेश्वरको असीम अनुग्रह देखेपछि तिनी रमाए अनि तिनीहरू सबैलाई मनैदेखि प्रभुप्रति वफादार भइरहन प्रोत्साहन दिए।+
२४ तिनी असल मानिस थिए अनि पवित्र शक्ति र विश्वासले भरिपूर्ण थिए। अनि मानिसहरूको ठूलो जमातले प्रभुमा विश्वास गऱ्यो।+
२५ तब बर्णाबास सावललाई खोज्न टार्सस गए+
२६ अनि भेट्टाएपछि उनलाई एन्टिओक ल्याए। त्यसपछि तिनीहरू पूरै एक वर्ष त्यहाँको मण्डलीसित एकसाथ भेला भए र ठूलो जमातलाई सिकाए। यहीँ एन्टिओकमा पहिलो पटक चेलाहरूलाई ईश्वरीय निर्देशनद्वारा ‘ख्रिष्टियन’ भन्न थालियो।+
२७ ती दिनहरूमा केही भविष्यवक्ताहरू+ यरुसलेमबाट एन्टिओक आए।
२८ तिनीहरूमध्ये एक जनाको नाम अगाबस+ थियो। पवित्र शक्तिको निर्देशन पाएर तिनले सारा पृथ्वीभरि ठूलो अनिकाल पर्नेछ+ भनी भविष्यवाणी गरे। तिनले भनेजस्तै क्लौडियसको समयमा साँच्चै अनिकाल पऱ्यो।
२९ त्यसैले एन्टिओकका चेलाहरूले आ-आफ्नो औकातअनुसार यहुदियामा बस्ने भाइहरूलाई राहत सामग्री+ पठाउने निधो गरे।+
३० तिनीहरूले त्यसै गरे; तिनीहरूले बर्णाबास र सावलको हातमा ती सामग्री एल्डरहरूकहाँ* पठाए।+
फुटनोटहरू
^ वा “तिनीसित बहस गर्न थाले।”
^ वा “परमेश्वरको बाटोमा अवरोध पुऱ्याउने।”
^ शा., “उनीहरू चुप भए।”
^ अतिरिक्त लेख क५ हेर्नुहोस्।
