တရားဝင်သောက်ခွင့် ရှိတယ်ဆိုရင် သင့်တော်တဲ့ ပမာဏနဲ့ သောက်သုံးတာကို ကျမ်းစာက မတားမြစ်ပါဘူး။ ဒါပေမဲ့ သောက်ကြူးတာကိုတော့ တားမြစ်ထားတယ်။​—ဆာလံ ၁၀၄:၁၅။ ၁ ကောရိန္သု ၆:​၁၀။

 တကယ်လို့ အစိုးရဥပဒေနဲ့ သင့်ရဲ့ မိဘတွေ တားမြစ်ထားတဲ့ကြားက အရက်သောက်ဖို့ ဖိအားပေးတာတွေ ကြုံလာရတယ် ဆိုရင်ကော။

•  သောက်ပြီးဘာဖြစ်မယ်ဆိုတာ စဉ်းစားပါ

•  စိတ်ပိုင်းဖြတ်ထားပါ

•  ရွယ်တူချင်းတွေ ပြောဆိုရာ

 ရွယ်တူချင်းတွေက အရက်သောက်တာ ပျော်စရာ သိပ်ကောင်းတယ်လို့ ပြောပါလိမ့်မယ်။ ဒါပေမဲ့ သောက်ပြီးတဲ့နောက် ဘာတွေ ဖြစ်သွားနိုင်သလဲ။

•  ဥပဒေအရ အရေးယူခံရနိုင်။ သင်က အစိုးရ ခွင့်ပြုထားတဲ့ အသက်အရွယ် မရောက်ခင် အရက်သောက်တယ်ဆိုရင် ဒဏ်ရိုက်ခံရတာ၊ ရာဇဝတ်မှုနဲ့ အရေးယူတာ၊ လိုင်စင်အသိမ်းခံရတာ၊ လူမှုရေးလုပ်ငန်းမှာ လုပ်ဆောင်ခိုင်းတာနဲ့ ထောင်ကျတာ ဖြစ်နိုင်ပါတယ်။​—ရောမ ၁၃:၃။

•  နာမည်ပျက်နိုင်။ အရက်က ကိုယ့်ကိုယ်ကို ချုပ်တည်းနိုင်စွမ်း ကျစေတယ်။ အဲဒီလိုအခြေအနေမျိုးမှာ နောက်ပိုင်း နောင်တရစေတဲ့ စကားမျိုး၊ လုပ်ရပ်မျိုးကို လုပ်မိစေနိုင်တယ်။ (သုတ္တံ ၂၃:၃၁-​၃၃) ဒီဆိုရှယ်မီဒီယာခေတ်မှာ သင့်ရဲ့လုပ်ရပ်က တစ်သက်လုံး နာမည်ပျက်သွားတာမျိုး ဖြစ်နိုင်ပါတယ်။

•  ခုခံကာကွယ်နိုင်မှု အားနည်းစေ။ အရက်ကြောင့် ကာယရေးနဲ့ လိင်ဆိုင်ရာစော်ကားမှုခံရဖို့ လွယ်ကူသွားစေတယ်။ အဲဒီအချိန်မှာ တခြားသူရဲ့ သြဇာလွှမ်းမိုးမှုအောက်ကို အလွယ်တကူ ကျရောက်သွားနိုင်ပြီး အန္တရာယ်ဖြစ်စေတဲ့၊ တရားမဝင်တဲ့ လုပ်ရပ်တွေ လုပ်မိသွားနိုင်တယ်။

•  အရက်စွဲသွားနိုင်။ လေ့လာတွေ့ရှိချက်တချို့အရ ငယ်ငယ်ရွယ်ရွယ်နဲ့ အရက်သောက်တဲ့သူတွေဟာ အရက်စွဲဖို့ ပိုလွယ်တယ်လို့ ဖော်ပြတယ်။ စိတ်ဖိစီးလို့၊ အထီးကျန်လို့၊ ပျင်းလို့ဆိုပြီး အကြောင်းအမျိုးမျိုးပြ အရက်သောက်တာက နောက်ဆုံး ဖြတ်ဖို့ ပိုခက်စေတယ်။

•  သေဆုံးနိုင်။ အမေရိကန်မှာ၊ အရက်သောက်ပြီး ကားမောင်းတာကြောင့် ၅၂ မိနစ်တိုင်းမှာ လူတစ်ဦး သေဆုံးနေရတယ်။ ၅ နှစ်တာ အတွင်းမှာ အသက် ၂၁ နှစ်အောက် လူငယ် ၁၅၀၀ ကျော်ဟာ အရက်နဲ့ပတ်သက်တဲ့ ယာဉ်မတော်တဆမှုတွေကြောင့် သေဆုံးနေကြရတယ်။ ကိုယ်တိုင် မသောက်သည့်တိုင် အရက်သောက်ထားသူ မောင်းတဲ့ကားကို စီးတယ်ဆိုရင် အန္တရာယ်ကြုံရနိုင်ပါတယ်။

 မသင့်တော်ဘဲ အရက်သောက်တဲ့ကိစ္စမှာ ကိုယ်ဘာလုပ်မယ်ဆိုတာ ကြိုတင်ဆုံးဖြတ်ထားရင် နောက်ဆက်တွဲပြဿနာတွေ၊ အန္တရာယ်တွေကို ရှောင်နိုင်တယ်။

 ကျမ်းစာလမ်းညွှန်ချက်– “သမ္မာသတိရှိသောသူသည် အမှုကိုမြော်မြင်၍ ပုန်းနေတတ်၏။” (သုတ္တံ ၂၂:၃) ကားမမောင်းခင်နဲ့ အာရုံစိုက်ရမယ့် အလုပ်ကိုမလုပ်ခင် အရက်သောက်တာက ပညာမဲ့ရာကျပါတယ်။

 စိတ်ပိုင်းဖြတ်ချက်– ‘ငါအရက်သောက်မယ်ဆိုရင် တရားဥပဒေခွင့်ပြုတဲ့ အသက်အရွယ်နဲ့ သင့်တော်တဲ့ အခြေအနေမျိုး ဖြစ်ရမယ်။’

 ကျမ်းစာလမ်းညွှန်ချက်– “တစ်စုံတစ်ယောက်၏ စေစားမှုကို ခံသောသူသည် စေစားသူ၏ကျွန်ဖြစ် . . . ၏။” (ရောမ ၆:​၁၆၊ ခမ) သူငယ်ချင်းတွေ သောက်လို့ လိုက်သောက်တာဆိုရင် သူတို့က ကိုယ့်ကို ထိန်းချုပ်နေတာနဲ့ တူသွားတယ်။ သင်က အပျင်းပြေဖို့ ဒါမှမဟုတ် ဖိစီးမှုကြောင့် သောက်တာဆိုရင် ပြဿနာတွေ ဖြေရှင်းနိုင်တဲ့ အရည်အချင်း မရှိသေးဘူးဆိုတာကို ပြနေတာပဲ။

 စိတ်ပိုင်းဖြတ်ချက်– ‘သူငယ်ချင်းတွေက အရက်သောက်ဖို့ ဖိအားပေးတာကို ငါ လက်မခံဘူး။’

 ကျမ်းစာလမ်းညွှန်ချက်– ‘စပျစ်ရည်သောက်ကြူးသောသူကို အပေါင်းအဖော်မလုပ်နှင့်။’ (သုတ္တံ ၂၃:၂၀) မကောင်းတဲ့ အပေါင်းအသင်းက ကိုယ့်ရဲ့ ဆုံးဖြတ်ချက်တွေကို လွှမ်းမိုးသွားတတ်တယ်။ အရက်ယမကာကို တလွဲအသုံးပြုနေတဲ့သူတွေနဲ့ အတူရှိနေတာက သင့်အတွက် အန္တရာယ်ရှိစေနိုင်တယ်။

 စိတ်ပိုင်းဖြတ်ချက်– ‘အရက်ယမကာကို တလွဲအသုံးပြုတဲ့သူတွေနဲ့ ရင်းရင်းနှီးနှီးမပေါင်းဘူး။’