Uma uphila ngemithetho yeBhayibheli futhi ufuna ukuba umngani kaNkulunkulu, cishe ucabanga ukubhapathizwa. Ikhona yini indlela ongathola ngayo ukuthi ukulungele yini ukuthatha leso sinyathelo? a

Kulesi sihloko

•  Kungakanani okudingeka ngikwazi?

•  Yini okufanele ngiyenze?

•  Okushiwo ontanga yakho

 Ukulungiselela ubhapathizo akuhileli ukubamba izinto ngekhanda, njengoba singase senze esikoleni ukuze siphase isivivinyo. Nokho, kuzodingeka usebenzise ‘amandla akho okucabanga’ ukuze uqiniseke ngokuthi iBhayibheli lifundisa iqiniso. (Roma 12:1) Ngokwesibonelo:

•   Uyaqiniseka yini ngokuthi uNkulunkulu ukhona nokuthi kumfanele ukuthi umkhonze?

   IBhayibheli lithi: “Lowo oza kuNkulunkulu kumele akholelwe ukuthi ukhona nokuthi uyabavuza labo abamfuna ngobuqotho.”—Hebheru 11:6.

   Zibuze: ‘Kungani ngikholelwa kuNkulunkulu?’ (Hebheru 3:4) ‘Kungani ngimkweleta ukumkhonza?’—IsAmbulo 4:11.

   Udinga usizo? Funda isihloko esithi “Indalo Noma Ukuziphendukela Kwemvelo?—Ingxenye 1: Kungani Kufanele Ukholelwe KuNkulunkulu?”

•   Uyaqiniseka yini ngokuthi umyalezo weBhayibheli uvela kuNkulunkulu?

   IBhayibheli lithi: “Yonke imiBhalo iphefumulelwe uNkulunkulu futhi iyasiza ekufundiseni, ekusoleni, ekuqondiseni izinto, ekusiyaleni ukuba senze okulungile.”—2 Thimothewu 3:16.

   Zibuze: ‘Yini engenza ngikholelwe ukuthi iBhayibheli aliyona incwadi egcwele imibono yabantu?’—Isaya 46:10; 1 Thesalonika 2:13.

   Udinga usizo? Funda esithi “Lingangisiza Kanjani IBhayibheli?—Ingxenye 1: Ukufunda IBhayibheli Lakho.”

•   Uyaqiniseka yini ngokuthi uJehova usebenzisa ibandla lobuKristu ukuze afeze intando yakhe?

   IBhayibheli lithi: “Makube yinkazimulo [kuNkulunkulu] ngebandla nangoKristu Jesu kuzo zonke izizukulwane kuze kube phakade naphakade.”—Efesu 3:21.

   Zibuze: ‘Ingabe izinto engizifunda eBhayibhelini emihlanganweni yobuKristu ngizibheka njengezivela kubantu noma kuJehova?’ (Mathewu 24:45) ‘Ngiyaya yini emihlanganweni ngisho noma abazali bami bengeke baphumelele (uma bekuvumela)?’—Hebheru 10:24, 25.

   Udinga usizo? Funda esithi “Kungani Kufanele Ngiye Emihlanganweni Eba SeHholo LoMbuso?”

 Akudingeki uze uphelele ukuze ubhapathizwe. Kodwa kufanele kubonakale ukuthi ufuna ngempela ‘ukufulathela okubi, wenze okuhle.’ (IHubo 34:14) Ngokwesibonelo:

•   Ingabe uphila ngemithetho kaJehova?

   IBhayibheli lithi: “Zigcineni ninonembeza omuhle.”—1 Petru 3:16.

   Zibuze: ‘Ngibonise kanjani ukuthi ‘amandla ami okuqonda’ aqeqeshelwe “ukuhlukanisa okulungile nokungalungile”?’ (Hebheru 5:14) ‘Zikhona yini izimo engizikhumbulayo lapho ngimelane khona nokucindezela kontanga okubi? Ingabe abangani bami bayangikhuthaza ukuba ngenze okulungile?’—IzAga 13:20.

   Udinga usizo? Funda isihloko esithi “Ngingawuqeqesha Kanjani Unembeza Wami?”

•   Uyazi yini ukuthi unesibopho sokuphendula kuJehova ngezinto ozenzayo?

   IBhayibheli lithi: “Ngamunye wethu uyozilandisela kuNkulunkulu.”—Roma 14:12.

   Zibuze: ‘Ingabe ngineqiniso kimi nakwabanye?’ (Hebheru 13:18) ‘Ngiyawavuma yini amaphutha ami, noma nginomkhuba wokuwafihla noma wokusola abanye ngawo?’—IzAga 28:13.

   Udinga usizo? Funda isihloko esithi “Ngingabhekana Kanjani Namaphutha Ami?”

•   Ingabe ungumngani kaJehova?

   IBhayibheli lithi: “Sondelani kuNkulunkulu, naye uyosondela kini.”—Jakobe 4:8.

   Zibuze: ‘Ngisondela ngaziphi izindlela kuJehova?’ Ngokwesibonelo, ‘Ngivame kangakanani ukufunda iBhayibheli?’ (IHubo 1:1, 2) ‘Ingabe ngithandaza njalo?’ (1 Thesalonika 5:17) ‘Ingabe imithandazo yami iyagwegwesa? Ingabe abangani bami bangabangani bakaJehova?’—IHubo 15:1, 4.

   Udinga usizo? Funda isihloko esithi “Lingangisiza Kanjani IBhayibheli?—Ingxenye 2: Kujabulele Ukufunda IBhayibheli” nesithi “Kungani Kufanele Ngithandaze?”

 ICEBISO: Ukuze ulungele ukubhapathizwa, funda isahluko 37 sencwadi ethi Intsha Iyabuza—Izimpendulo Ezisebenzayo, Umqulu 2. Sicela uliphawule ngokukhethekile ishadi lemibuzo elisekhasini 308 no-309.