VECHIDIKI VANOBVUNZA KUTI
Ndoita Sei Kana Ndisingafariri Chikoro?
Pane zvinhu zvinogona kuita kuti munhu asafarire chikoro. Zvimwe zvacho ndeizvi: Vadzidzisi vanoomesa zvinhu, kuda kutevedzera vamwe, bvunzo dzinotemesa musoro uye homuweki yakawandisa. a Mumwe musikana anonzi Rachel b anoti:
“Dai zvaizonzi ndisarudze kwekuenda, ndaitoenda hangu kune imwe nzvimbo pane kuita zvechikoro. Ndingatoenda hangu kumahombekombe egungwa kana kushamwari dzangu kana kutobatsira vabereki vangu kubika kana kutsvaira pamba!”
Kana wakaita saRachel, makore ako ekuchikoro anogona kuita semutongo wekugara mujeri, unotofanira kugaramo kusvikira makore acho akwana. Asi pane zvaungaita kuti ufarire chikoro here?
Waizviziva here? Kana ukatanga kufarira chikoro unenge usisaiti zvekuzvimanikidza, kuenda kuchikoro kunenge kwava kutokunakidza. Unenge wava kutoziva kuti chikoro chichakubatsira kuwana ruzivo rwaunoda kuzoshandisa paunenge wakura.
Kuti utange kufarira chikoro, chimboedza kufunga zvinotevera:
Dzidzo. Kuramba uchienda kuchikoro kuchakubatsira kuti ugone kugadzirisa wega matambudziko auchasangana nawo pauchange wava kushanda uyewo mamwe matambudziko eupenyu. Zvibvunze kuti, ‘Kunyange zvazvo paine zvimwe zvinhu zvandisingafariri nezvechikoro, ndezvipi zvakanakira dzidzo yandiri kuwana?’
Zvinotaurwa neBhaibheri: “Chengetedza uchenjeri hunobatsira uye gara uchishandisa pfungwa.”—Zvirevo 3:21.
Kuti unzwe zvakawanda, verenga nyaya yakanzi “Ndoita Sei Kana Ndiri Kufoira Kuchikoro?”
Tsika dzako. Purogiramu yako yechikoro inokubatsira kuronga nguva zvakanaka, kuzvidzora, uye kushanda nesimba. Zvinhu izvi zvinozokubatsira kana wakura. Zvibvunze kuti: ‘Kuita zvechikoro kuri kundibatsira sei pakuva munhu anozvidzora uye anoshanda nesimba? Ndezvipi zvandingada kugadzirisa pazvinhu izvi?’
Zvinotaurwa neBhaibheri: “Kushanda zvakaoma kwese kune zvakunobatsira.”—Zvirevo 14:23.
Kuti unzwe zvakawanda, verenga nyaya yakanzi “Ndingashandisa Sei Nguva Yangu Zvakanaka?”
Kuwirirana nevamwe. Kutamba nevamwe zvakanaka kuchikoro kunokubatsira kuti uve netsitsi uye uremekedze vamwe. Mumwe mukomana anonzi Joshua anoti: “Kudzidza kutaura nevamwe zvakanaka kunokosha sezvinoita zvidzidzo zvesainzi nezvenhoroondo dzezvakaitika kare”. Anotiwo, “unyanzvi ihwohwo hunoshanda kweupenyu hwese.” Zvibvunze kuti, ‘Zvidzidzo zvipi zvandakawana kuchikoro nezvekuwirirana nevamwe, kunyange vaya vanobva kwakasiyana nekwandinobva uye vane chitendero chakasiyana nechangu?’
Zvinotaurwa neBhaibheri: “Ivai nerugare nevanhu vese.”—VaHebheru 12:14.
Kuti unzwe zvakawanda, verenga nyaya yakanzi “Ndingaita Sei Kuti Ndigone Kutaura Nevanhu?”
Ramangwana rako. Kuenda kuchikoro kunogona kukubatsira kuziva zvinhu zvaunonyatsogona wobva waronga kuita zvinhu izvozvo muupenyu. Mumwe musikana anonzi Brooke anoti: “Unokwanisa kutodzidzira rimwe basa sezvandakaita, kuitira kuti paunopedza chikoro unenge uine mapepa anokuwanisa basa.” Zvibvunze kuti: ‘Ndichange ndichizviriritira sei pandinenge ndapedza chikoro? Ndinofanira kudzidza nezvechii kuti ndikwanise kuzoita basa iroro richandiraramisa?’
Zvinotaurwa neBhaibheri: “Gadzirira tsoka dzako nzira yakati chechetere”—Zvirevo 4:26.
Zvimwe Zvaunogona Kufarira
VECHIDIKI VANOBVUNZA KUTI
Ndingaita Sei Kuti Ndiwirirane Nemudzidzisi Wangu?
Kana uine mudzidzisi akaoma kuwirirana naye, une zvaunogona kuita kuti unakidzwe nekudzidza. Edza kushandisa mazano anotevera.
VECHIDIKI VANOBVUNZA KUTI
Unofanira Kusiya Chikoro Here?
Pane zvakawanda zvaunofanira kutanga wafunga.
VECHIDIKI VANOBVUNZA KUTI
Ndoita Sei Kana Ndiri Kufoira Kuchikoro?
Kurega chikoro, chimbofunga zvinhu 5 zvaungaita kuti upase.
WHAT YOUR PEERS SAY
Ndingaita Sei Kana Ndichishungurudzwa?
Ungasakwanisa kuchinja zvinoitwa nemunhu anokushungurudza, asi unogona kuchinja zvauchaita kana washungurudzwa.
