യുവജനങ്ങൾ ചോദിക്കുന്നു
വീട്ടിലെ നിയമം ഞാൻ തെറ്റിച്ചല്ലോ. . . ഇനി എന്തു ചെയ്യും?
മിക്ക കുടുംബങ്ങളിലും ചില നിയമങ്ങൾ ഉണ്ടായിരിക്കും. വീട്ടിൽ തിരിച്ചെത്താനുള്ള സമയം, ഇലക്ട്രോണിക് ഉപകരണങ്ങൾ എത്ര സമയം ഉപയോഗിക്കണം, മറ്റുള്ളവരോട് എങ്ങനെ പെരുമാറണം, അങ്ങനെ പലപല നിയമങ്ങൾ.
വീട്ടിലെ ഒരു നിയമം നിങ്ങൾ തെറ്റിച്ചെങ്കിലോ? കഴിഞ്ഞതു കഴിഞ്ഞു, അത് മാറ്റാൻ നിങ്ങൾക്കു കഴിയില്ല. പക്ഷേ കാര്യങ്ങൾ കൂടുതൽ വഷളാകാതിരിക്കാൻ നിങ്ങൾക്കു ചിലതു ചെയ്യാൻ കഴിയും. അത് എങ്ങനെയാണെന്ന് ഈ ലേഖനം കാണിച്ചുതരും.
നിങ്ങൾ ചെയ്യാൻ പാടില്ലാത്തത്
നിങ്ങൾ ഒരു നിയമം തെറ്റിച്ച കാര്യം മാതാപിതാക്കൾ അറിഞ്ഞിട്ടില്ലെങ്കിൽ, അതു മൂടിവെക്കാൻ നിങ്ങൾക്കു തോന്നിയേക്കാം.
ഇനി, ആ കാര്യം അവർ അറിഞ്ഞെങ്കിൽ, ഒഴികഴിവുകൾ പറയാനോ കുറ്റം മറ്റുള്ളവരുടെമേൽ കെട്ടിവെക്കാനോ നിങ്ങൾക്കു തോന്നിയെന്നു വരാം.
ഈ രണ്ടു വഴികളും ശരിക്കും പറഞ്ഞാൽ ബുദ്ധിയല്ല. അതെന്താ? കാരണം, ചെയ്ത കാര്യം മറച്ചുവെക്കുന്നതും മുടന്തൻ ന്യായങ്ങൾ പറയുന്നതും പക്വതയുടെ ലക്ഷണമല്ല. അങ്ങനെ ചെയ്യുമ്പോൾ നിങ്ങൾ ഇനിയും കുറെക്കൂടി വളരാനുണ്ട് എന്നു മാതാപിതാക്കൾക്കു കാണിച്ചുകൊടുക്കുകയാണ്.
“കള്ളം പറയുന്നത് നല്ലൊരു ഐഡിയ അല്ല. ഏതായാലും, എപ്പോഴെങ്കിലുമൊക്കെ സത്യം പുറത്തുവരും, നേരത്തേ കാര്യം തുറന്നു പറഞ്ഞിരുന്നെങ്കിൽ കിട്ടുമായിരുന്നതിനെക്കാൾ കട്ടിയായിരിക്കും അപ്പോൾ നിങ്ങൾക്കു കിട്ടുന്ന ശിക്ഷ.”—ഡയാന.
ഒരു മെച്ചപ്പെട്ട സമീപനം
പറ്റിയ തെറ്റ് തുറന്നുപറയുക. ബൈബിൾ പറയുന്നു: “സ്വന്തം തെറ്റുകൾ മൂടിവെക്കുന്നവൻ വിജയിക്കില്ല” (സുഭാഷിതങ്ങൾ 28:13) നിങ്ങൾക്ക് തെറ്റുകൾ പറ്റുമെന്ന് മാതാപിതാക്കൾക്കും അറിയാം. പക്ഷേ നിങ്ങൾക്കു സത്യം പറയാനാകില്ലേ?
“നിങ്ങൾ സത്യം പറയുകയാണെങ്കിൽ മാതാപിതാക്കൾക്കു ക്ഷമിക്കാൻ കൂടുതൽ എളുപ്പമായിരിക്കും. നിങ്ങളുടെ സത്യസന്ധത അവർക്കു നിങ്ങളിലുള്ള വിശ്വാസം കൂട്ടും.”—ഒലീവിയ.
ക്ഷമ ചോദിക്കുക. ‘താഴ്മ ധരിക്കാൻ’ ബൈബിൾ പറയുന്നു. (1 പത്രോസ് 5:5) ന്യായങ്ങൾ പറയാതെ ക്ഷമ ചോദിക്കാൻ നിങ്ങളുടെ ഭാഗത്ത് താഴ്മ വേണം.
“ന്യായങ്ങൾ പറയുന്നത് ഒരു ശീലമാക്കിയാൽ നിങ്ങൾക്ക് പതിയെപ്പതിയെ കുറ്റബോധം തോന്നാതെയാകും. അങ്ങനെ അവസാനം തെറ്റുകൾ ചെയ്യുമ്പോൾ നിങ്ങൾക്ക് ഒട്ടും വിഷമം തോന്നില്ല.”—ഹെതർ.
ശിക്ഷ സ്വീകരിക്കുക. ‘തിരുത്തൽ കേട്ടനുസരിക്കാൻ’ ബൈബിൾ പറയുന്നു. (സുഭാഷിതങ്ങൾ 8:33) മാതാപിതാക്കൾ വെക്കുന്ന നിയന്ത്രണങ്ങൾ ഒരു പരാതിയും കൂടാതെ, മനസ്സോടെ അനുസരിക്കുക.
“കിട്ടുന്ന ശിക്ഷയെക്കുറിച്ച് എത്രത്തോളം പരാതിപ്പെടുന്നോ, അത്രത്തോളം കാര്യങ്ങൾ വഷളാകുകയേ ഉള്ളൂ. നിങ്ങൾക്കു നഷ്ടപ്പെടുന്നത് എന്തൊക്കെയാണെന്നു ചിന്തിക്കാതെ, മാതാപിതാക്കൾ വെക്കുന്ന നിയന്ത്രണങ്ങൾ സമ്മതിക്കാൻ നോക്കുക.”—ജേസൺ.
വിശ്വാസം നേടിയെടുക്കാൻ പരിശ്രമിക്കുക. ബൈബിൾ പറയുന്നു: ‘നിങ്ങളുടെ കഴിഞ്ഞകാലത്തെ ജീവിതരീതിക്കു ചേർച്ചയിലുള്ള പഴയ വ്യക്തിത്വം ഉരിഞ്ഞുകളയണം.’ (എഫെസ്യർ 4:22) ഉത്തരവാദിത്വബോധമുണ്ടെന്നു കാണിച്ചുകൊണ്ട് മാതാപിതാക്കളുടെ വിശ്വാസം നേടിയെടുക്കുക.
“നിങ്ങൾ എപ്പോഴും ചിന്തിച്ച് തീരുമാനങ്ങൾ എടുത്തുകൊണ്ട് പഴയ തെറ്റ് ഇനി ആവർത്തിക്കില്ലെന്നു തെളിയിച്ചുകൊടുത്താൽ, പതിയെ അവർ നിങ്ങളെ വീണ്ടും വിശ്വസിക്കാൻ തുടങ്ങും.”—കാരെൻ.
ചെയ്യാനാകുന്നത്: മാതാപിതാക്കൾ പ്രതീക്ഷിക്കുന്നതിലും കൂടുതൽ കാര്യങ്ങൾ ചെയ്തുകൊണ്ട്, നിങ്ങളെ വിശ്വസിക്കാൻ പറ്റുമെന്നു കാണിക്കുക. ഉദാഹരണത്തിന്, അടുത്ത പ്രാവശ്യം നിങ്ങൾ പുറത്ത് പോയിട്ട് തിരിച്ചു വരുമ്പോൾ, ‘വന്നുകൊണ്ടിരിക്കുകയാണ്, താമസിക്കില്ല’ എന്ന് അവരെ വിളിച്ചുപറയുക. ഇങ്ങനെ ചെയ്യുമ്പോൾ, മാതാപിതാക്കൾ നിങ്ങളെ വീണ്ടും വിശ്വസിക്കാൻ നിങ്ങൾ ആഗ്രഹിക്കുന്നെന്ന് അവരോടു പറയുന്നതുപോലെ ആയിരിക്കും.