योहानने सांगितलेला संदेश १:१-५१
१ सुरुवातीला शब्द होता+ आणि शब्द देवासोबत होता+ आणि शब्द देवासारखा होता.+
२ हाच सुरुवातीला देवासोबत होता.
३ सगळ्या गोष्टी त्याच्याद्वारेच अस्तित्वात आल्या.+ अशी एकही गोष्ट नाही, जी त्याच्याद्वारे अस्तित्वात आली नाही.
४ त्याच्याद्वारे जीवन अस्तित्वात आलं आणि ते जीवन माणसांसाठी प्रकाश होतं.+
५ तो प्रकाश अंधारात चमकत असला,+ तरी अंधार त्याच्यावर मात करू शकला नाही.
६ मग देवाने पाठवलेला एक माणूस आला. त्याचं नाव योहान होतं.+
७ हा माणूस एक साक्षीदार होता. त्याच्याद्वारे सगळ्या प्रकारच्या लोकांनी विश्‍वास ठेवावा, म्हणून तो त्या प्रकाशाबद्दल साक्ष द्यायला आला.+
८ हा माणूस स्वतः तो प्रकाश नव्हता,+ तर त्या प्रकाशाबद्दल साक्ष द्यायला आला होता.
९ जो सगळ्या प्रकारच्या लोकांना प्रकाश देतो, तो खरा प्रकाश लवकरच जगात येणार होता.+
१० तो जगातच होता+ आणि जग त्याच्याद्वारेच अस्तित्वात आलं.+ पण जगाने त्याला ओळखलं नाही.
११ तो स्वतःच्या लोकांमध्ये आला, पण त्यांनी त्याला स्वीकारलं नाही.
१२ पण ज्यांनी त्याचा स्वीकार केला, त्या सगळ्यांना त्याने देवाची मुलं व्हायचा अधिकार दिला.+ कारण, त्यांनी त्याच्या नावावर विश्‍वास असल्याचं दाखवलं.+
१३ आणि त्यांचा जन्म माणसांपासून* किंवा शरीराच्या इच्छेने किंवा कोणत्याही माणसाच्या इच्छेने नाही, तर देवापासून झाला.+
१४ मग शब्द मानव झाला.+ तो आपल्यामध्ये राहिला आणि आपण त्याचं तेज पाहिलं. पित्याच्या एकुलत्या एका मुलाचं+ ते तेज होतं. आणि तो देवाच्या कृपेने* आणि सत्याने परिपूर्ण होता.
१५ (योहानने त्याच्याबद्दल साक्ष दिली. त्याने असं घोषित केलं: “मी याच्याविषयीच म्हणालो होतो, की ‘माझ्यामागून येणारा माझ्यापुढे निघून गेलाय. कारण तो माझ्याआधीच अस्तित्वात होता.’”)+
१६ आणि त्याच्या पूर्णतेतून आपल्या सगळ्यांवर अपार कृपेचा वर्षाव झाला.*
१७ कारण देवाने मोशेद्वारे नियमशास्त्र दिलं.+ पण अपार कृपा+ आणि सत्य हे त्याने येशू ख्रिस्ताद्वारे दिलं.+
१८ कोणत्याही माणसाने कधीही देवाला पाहिलं नाही.+ पण देवासारखा असलेला एकुलता एक मुलगा,*+ जो पित्याच्या अगदी जवळ* आहे,+ त्याने पित्याला प्रकट केलं आहे.+
१९ यहुद्यांनी यरुशलेमहून याजकांना आणि लेव्यांना योहानकडे, “तू कोण आहेस?” असं विचारायला पाठवलं,+ तेव्हा त्याने ही साक्ष दिली.
२० त्याने उत्तर द्यायला नकार दिला नाही. उलट, “मी ख्रिस्त नाही,” असं त्याने उघडपणे मान्य केलं.
२१ तेव्हा त्यांनी त्याला विचारलं: “मग तू कोण आहेस? एलीया?”+ तो म्हणाला: “नाही.” “मग ज्याच्याबद्दल भविष्यवाणी करण्यात आली होती, तो संदेष्टा आहेस का?”+ तो म्हणाला: “नाही!”
२२ तेव्हा ते त्याला म्हणाले: “मग तू कोण आहेस ते आम्हाला सांग, म्हणजे ज्यांनी आम्हाला पाठवलं, त्यांना आम्ही जाऊन सांगू. तू स्वतःबद्दल काय म्हणतोस?”
२३ तो म्हणाला: “यशया संदेष्ट्याने सांगितल्याप्रमाणे, ‘यहोवासाठी* मार्ग मोकळा करा!’ अशी ओसाड रानात घोषणा करणाऱ्‍याचा मी आवाज आहे.”+
२४ योहानकडे आलेल्या या माणसांना परूश्‍यांनी* पाठवलं होतं.
२५ त्यांनी त्याला विचारलं: “जर तू ख्रिस्त किंवा एलीया किंवा भविष्यवाणी केलेला संदेष्टाही नाहीस, तर मग बाप्तिस्मा* का देतोस?”
२६ योहानने त्यांना उत्तर दिलं: “मी पाण्यात बाप्तिस्मा देतो. पण तुमच्यामध्ये असा एक जण आहे, ज्याला तुम्ही ओळखत नाही.
२७ तो माझ्या मागून येतोय आणि त्याच्या जोड्यांचे बंद सोडायलाही मी योग्य नाही.”+
२८ यार्देन नदीच्या पलीकडे बेथानीमध्ये, जिथे योहान बाप्तिस्मा देत होता तिथे या सगळ्या गोष्टी घडल्या.+
२९ दुसऱ्‍या दिवशी, येशूला आपल्याकडे येताना पाहून योहान म्हणाला: “पाहा! जगाचं+ पाप दूर करणारा+ देवाचा कोकरा!+
३० हा तोच आहे ज्याच्याबद्दल मी असं म्हटलं होतं: ‘माझ्यामागून येणारा एक माणूस माझ्यापुढे निघून गेलाय. कारण तो माझ्याआधी अस्तित्वात होता.’+
३१ मलाही त्याची ओळख नव्हती. पण तो इस्राएलसमोर प्रकट व्हावा, म्हणून मी पाण्यात बाप्तिस्मा देतोय.”+
३२ योहानने अशीही साक्ष दिली, की “स्वर्गातून पवित्र शक्‍ती* कबुतराच्या रूपात उतरताना मला दिसली आणि ती त्याच्यावर स्थिर झाली.+
३३ मलाही त्याची ओळख नव्हती. पण ज्याने मला पाण्यात बाप्तिस्मा द्यायला पाठवलं त्यानेच मला सांगितलं, की ‘ज्या कोणावर तू पवित्र शक्‍ती उतरताना आणि स्थिर होताना पाहशील,+ तोच पवित्र शक्‍तीने बाप्तिस्मा देणारा आहे.’+
३४ आणि मी ते पाहिलंय आणि हाच देवाचा मुलगा आहे अशी साक्ष दिली आहे.”+
३५ त्याच्या दुसऱ्‍या दिवशी पुन्हा, योहान आपल्या दोन शिष्यांसोबत उभा होता.
३६ येशूला तिथून जाताना पाहून तो म्हणाला: “पाहा, देवाचा कोकरा!”+
३७ हे ऐकून ते दोन शिष्य येशूच्या मागे चालू लागले.
३८ तेव्हा येशूने वळून त्यांना आपल्यामागे येताना पाहिलं आणि तो म्हणाला: “तुम्हाला काय हवंय?” ते त्याला म्हणाले: “रब्बी, (म्हणजे, “गुरुजी”) तुम्ही कुठे राहताय?”
३९ तो त्यांना म्हणाला: “या आणि बघा.” तेव्हा त्याच्यासोबत जाऊन तो कुठे राहत होता हे त्यांनी पाहिलं. त्या वेळी दुपारचे सुमारे चार वाजले होते.* त्या दिवशी ते त्याच्यासोबतच राहिले.
४० योहानचे शब्द ऐकून जे दोघं येशूच्या मागे गेले होते, त्यांच्यापैकी एक जण शिमोन पेत्रचा भाऊ अंद्रिया+ होता.
४१ तो सगळ्यात आधी आपल्या भावाला, शिमोनला भेटून म्हणाला: “आम्हाला मसीहा (म्हणजे, ख्रिस्त) सापडलाय.”+
४२ मग तो त्याला येशूकडे घेऊन गेला. त्याला पाहून येशू म्हणाला: “तू योहानचा मुलगा, शिमोन+ आहेस. तुला केफा (म्हणजे, “पेत्र”) म्हटलं जाईल.”+
४३ दुसऱ्‍या दिवशी येशूला गालीलला जायचं होतं. मग फिलिप्प+ भेटल्यावर तो त्याला म्हणाला: “माझ्यामागे ये आणि माझा शिष्य हो.”
४४ फिलिप्प हा बेथसैदाचा राहणारा होता. अंद्रिया आणि पेत्रसुद्धा याच शहरात राहायचे.
४५ फिलिप्पला नथनेल+ भेटला तेव्हा तो त्याला म्हणाला: “मोशेने ज्याच्याबद्दल नियमशास्त्रात लिहिलं होतं आणि ज्याच्याबद्दल संदेष्ट्यांनीही लिहिलं होतं, तो आम्हाला सापडलाय. तो नासरेथ इथला योसेफचा मुलगा येशू आहे.”+
४६ पण नथनेल त्याला म्हणाला: “नासरेथमधून कधी काही चांगलं येऊ शकतं का?” तेव्हा फिलिप्प त्याला म्हणाला: “तू स्वतः येऊन पाहा.”
४७ येशूने नथनेलला आपल्याकडे येताना पाहिलं तेव्हा तो त्याच्याबद्दल म्हणाला: “पाहा, हा एक खरा इस्राएली आहे. याच्यात जराही कपट नाही.”+
४८ नथनेल त्याला म्हणाला: “तू मला कसं ओळखतोस?” येशू म्हणाला: “फिलिप्पने तुला बोलावण्याआधी तू अंजिराच्या झाडाखाली होतास, तेव्हाच मी तुला पाहिलं होतं.”
४९ तेव्हा नथनेल त्याला म्हणाला: “रब्बी, तू देवाचा मुलगा, इस्राएलचा राजा आहेस!”+
५० येशू त्याला म्हणाला: “अंजिराच्या झाडाखाली असतानाच तुला पाहिलं, असं सांगितल्यामुळे तू विश्‍वास ठेवतोस का? तू यापेक्षाही महान गोष्टी पाहशील.”
५१ मग तो त्याला म्हणाला: “मी तुम्हाला खरं सांगतो, तुम्ही स्वर्ग उघडलेला पाहाल आणि स्वर्गदूत मनुष्याच्या मुलाकडे खाली येताना आणि वर जाताना पाहाल.”+
तळटीपा
^ शब्दशः “रक्‍तापासून.”
^ किंवा “अपार कृपेने.”
^ शब्दशः “अपार कृपेवर अपार कृपा झाली.”
^ शब्दशः “एकुलता एक देव.”
^ किंवा “पित्याच्या उराशी.” यावरून पित्याची त्याच्यावर खास मर्जी आहे हे दिसून येतं.
^ शब्दार्थसूची पाहा.
^ शब्दार्थसूची पाहा.
^ शब्दार्थसूची पाहा.
^ म्हणजे, दहावा तास.
