IiNdumiso 104:1-35
104 Mandimdumise* uYehova.+
Owu Yehova Thixo wam, umkhulu kakhulu.+
Wambethe uzuko* nobungangamsha.+
2 Uzisongele ngokukhanya+ ngokungathi sisambatho;Wolula amazulu okwelaphu lentente.+
3 Ubeka iipali kumagumbi akhe aphezulu emanzini asesibhakabhakeni,*+Esenza amafu abe yinqwelo yakhe,+Ehamba ngamaphiko omoya.+
4 Iingelosi zakhe uzenza zibe ngumoya,Abasebenzi bakhe babe ngumlilo oqwengayo.+
5 Uwuzinzisile umhlaba phezu kweziseko zawo;+Awuzukususwa endaweni yawo* ngonaphakade kanaphakade.+
6 Wawuthi wambu ngamanzi anzulu ngokungathi sisambatho.+Amanzi ema phezu kweentaba.
7 Wathi usakuwakhalimela, abaleka;+Athi akuva isandi sendudumo yakho, abaleka esoyika,
8 Iintaba zenyuka,+ neentlambo zehla,Zaya kwindawo owawuzibekele yona.
9 Wawamisela umda ukuze angadluli kuwo,+Ukuze angaphindi ogqume umhlaba.
10 Uthumela imithombo ezintlanjeni;Iqhubeka ihamba phakathi kweentaba.
11 Iseza onke amarhamncwa asendle;Iidonki zasendle ziqabula unxano lwazo kuyo.
12 Entla kwayo kuhlala iintaka zezulu;Zintyiloza phakathi kwamahlamvu ashinyeneyo.
13 Unkcenkceshela iintaba esemagumbini akhe aphezulu.+
Umhlaba waneliswa sisiqhamo semisebenzi yakho.+
14 Uhlumisa ingca esenzela iinkomo,Notyani ukuze lusetyenziswe ngabantu,+Kuphume ukutya emhlabeni,
15 Iwayini evuyisa intliziyo yomntu,+Ioli ekhazimlisa ubuso,Nesonka esixhasa intliziyo yomntu.+
16 Imithi kaYehova yanelisekile,Imisedare yaseLebhanon ayityalileyo,
17 Apho iintaka zizenzela khona iindlwane.
Indlu yengwamza+ isemithini yejunipha.
18 Iintaba eziphakamileyo zezeebhokhwe zasezintabeni;+Amawa yindawo ezibalekela kuyo iimbila.+
19 Inyanga uyenzele ukubala amaxesha;Ilanga lizazi kakuhle ukuba litshona nini.+
20 Uzisa ubumnyama, kuze kube sebusuku,+Xa zonke izilwanyana zasendle zihambahamba ehlathini.
21 Iingonyama zigqumela ixhoba+Zifuna ukutya kwazo kuThixo.+
22 Lithi lakuphuma ilanga,Ziye kubuthuma kwiindawo zazo.
23 Umntu uyaphuma aye emsebenzini wakhe,Aze abile esoma de kuhlwe.
24 Mininzi ngeyona ndlela imisebenzi yakho, Yehova!+
Yonke uyenze ngobulumko.+
Umhlaba ugcwele zizinto ozidalileyo.
25 Udale ulwandle, olukhulu nolubanzi,Lunyakazela izinto eziphilayo, ezincinci nezinkulu.+
26 Zihamba apho iinqanawa,Kunye neLeviyatan,* owayidalela ukuba idlale kulo.+
27 Zonke zilindela kuweUkuba uzinike ukutya kwazo ngexesha elifanelekileyo.+
28 Ziqokelela loo nto uzinika yona.+
Xa uvula isandla sakho, zifumana intabalala yezinto ezintle.+
29 Ziyaphazamiseka xa ubufihla ubuso bakho.
Ziyafa xa ususa umoya wazo, zibuyele eluthulini.+
30 Ziyadalwa xa uthumela umoya wakho,+Ibe wena uyawuhlaziya nomhlaba.
31 Uzuko lukaYehova luza kubakho ngonaphakade.
UYehova uza kuvuyiswa yimisebenzi yakhe.+
32 Uthi xa ejonga umhlaba, usuke ungcangcazele;Uchukumisa iintaba ziqhume.+
33 Ndiza kumculela uYehova+ ubomi bam bonke;Ndiza kuhlala ndimdumisa ngengoma* uThixo wam ndisaphila nje.+
34 Ndifuna iingcinga zam zimvuyise.*
Ndiza kuvuyiswa nguYehova.
35 Abenzi-bubi baza kuthi shwaka emhlabeni,Nabangalunganga abazukuphinda babekho.+
Mandimdumise* uYehova. Dumisani uYa!
Umbhalo osemazantsi
^ Okanye “isidima.”
^ Okanye “Umphefumlo wam mawumdumise.”
^ Ngokoqobo, “emanzini.”
^ Okanye “Awuzukugungqa.”
^ Funda Ingcaciso Yamagama.
^ Okanye “kumqambela ingoma.”
^ Okanye kusenokwenzeka, “Iingcinga zam ngaye mayibe zezivuyisayo.”
^ Okanye “Umphefumlo wam mawumdumise.”