Phuputso e ’ngoe e bontša hore liphesente tse 80 tsa bacha ba Amerika baa rapela empa ke halofo ea bona feela e rapelang kamehla. Ho hlakile hore ba bang baa ipotsa ba re: ‘Na ho rapela ke mokhoa feela oa ho ikimolla maikutlong kapa ho akarelletsa se fetang seo?’

•  Thapelo ke eng?

•  Na Molimo o mametse?

•  Nka rapella eng?

•  Seo bacha ba bang ba se buang

 Thapelo ke puisano ea rona le ’Mopi oa lintho tsohle. Nahana feela hore na sena se bolela’ng. Jehova o phahame haholo ho feta batho ka litsela tsohle tseo re ka li nahanang empa ha a “hole le e mong le e mong oa rona.” (Liketso 17:​27) Ha e le hantle, Bibele ena le memo ena e monate: “Atamelang ho Molimo, ’me o tla atamela ho lona.”​—Jakobo 4:8.

 U ka atamela haufi le Molimo joang?

•   Tsela e ’ngoe ke ka thapelo. Ke eona tsela eo u buang le Molimo ka eona.

•   Tsela e ’ngoe ke ka ho bala Bibele. Ke eona tsela eo Molimo a “buang” le uena ka eona.

 Puisano ena, e leng ho rapela le ho ithuta Bibele, e tla u thusa hore u hahe setsoalle se matla le Molimo.

 “Ho bua le Jehova ea Matla Ohle, ke tlotla ea bohlokoa ka ho fetisisa eo motho a ka bang le eona.”​—Jeremy.

 “Ho bolella Jehova maikutlo a ka a tebileng ka thapelo, ho etsa hore ke ikutloe ke atametse haufi le eena.”​—Miranda.

 Le ha u lumela ho Molimo ebile u mo rapela, ho ka ba thata hore u lumele hore ka ’nete oa re mamela. Leha ho le joalo, Bibele e re Jehova ke “Ea Utloang thapelo.” (Pesaleme ea 65:2) E boetse e re mema hore re ‘lahlele matšoenyeho ohle a rona ho eena.’ Hobaneng? ‘Hobane oa re tsotella.’​—1 Petrose 5:7.

 Seo u ka nahanang ka sona: Na u ipha nako ea ho bua le metsoalle ea hao khafetsa? U ka etsa se tšoanang ha u bua le Molimo. Bua le eena khafetsa ’me u sebelise lebitso la hae e leng Jehova ha u rapela. (Pesaleme ea 86:​5-7; 88:9) Bibele ea re khothaletsa e re: “Rapelang le sa phetse.”​—1 Bathesalonika 5:17.

 “Thapelo ke puisano e pakeng tsa ka le Ntate oa ka oa leholimo. Ka eona ke khona ho tšollela pelo ea ka eohle ho eena.”​—Moises.

 “Ke bua le Jehova ka lintho tse tebileng tseo ke neng ke tla li bua le ’mè oa ka kapa le motsoalle ea haufi.”​—Karen.

 Bibele e re: “Nthong e ’ngoe le e ’ngoe ka thapelo le thapeli hammoho le liteboho likopo tsa lona tse matla li ke li tsebisoe Molimo.”​—Bafilipi 4:6.

 Na see se bolela hore ho lokile hore u rapelle mathata a hao? Ho joalo! Ha e le hantle Bibele e re: “Lahlela moroalo oa hao ho Jehova, o tla o tšehetsa.”​—Pesaleme ea 55:22.

 Ke ’nete hore sena ha se bolele hore u tla bua ka mathata a hao feela. Chantelle ea lilemo li 23 o re: “E ne e ke ke eaba setsoalle sa ka le Jehova ke sa ’nete haeba ke ne ke lula ke mo kopa thuso feela. Ke nahana hore ho leboha Jehova e lokela ho ba nthong e tlang pele, le hore lintho tseo ke li lebohang li lokela ho ba ngata.”

 Seo u ka nahanang ka sona: Ke lintho life tseo u li lebohang bophelong ba hao? Na u ka nahana ka lintho tse tharo tseo u ka lebohang Jehova ka tsona kajeno?

 “Le ntho e nyenyane joaloka ho sheba palesa e ntle, e ka u susumelletsa hore u rapele Jehova ’me u mo lebohe.”​—Anita.

 “Nahanisisa ka e ’ngoe ea lintho tse u khahlileng popong ea Jehova kapa temana ea Bibele eo u e ratang ’me ka mor’a moo u lebohe Jehova.”​—Brian.