BACHA BAA BOTSA
Na re Lokela ho Arohana? (Karolo ea 1)
Ka linako tse ling ho arohana ho molemo. Nahana ka se etsahaletseng Jill. O re: “Qalong ke ne ke thaba ha mohlankana oa ka a lula a tšoenyehile ka hore na ke hokae, ke etsa’ng le hore na ke na le bo-mang. Empa taba ena e ile ea fihla moo ke neng ke se ke sa khone ho qeta nako le batho ba bang haese eena feela. O ne a sa rate le ha ke qeta nako le ba lelapa leso—haholo-holo ntate oa ka. Ha ke khaohana le eena, ke ile ka ikutloa ke imolohile!”
Sarah le eena o ile a etsahalloa ke se tšoanang. O ile a qala ho hlokomela hore mohlankana eo a neng a ratana le eena ea bitsoang John, o rata ho phoqa, o batla lintho li hana ho fela, ebile ha a na mekhoa. Sarah o re: “Ka letsatsi le leng o ile a fihla lapeng lihora tse tharo ka mor’a nako eo re neng re lumellane ka eona! O ile a hlokomoloha ’Mè ha a bula monyako, eaba o re: ‘Ha re ee. Re siiloe ke nako.’ Ho e-na le hore a re ‘Ke liehile,’ o re ‘Re siiloe ke nako.’ O ne a lokela ho kōpa tšoarelo kapa ho hlalosa hore na o liehisitsoe ke’ng. Habohlokoa le ho feta, o ne a lokela ho bontša ’Mè tlhompho!”
Ke ’nete hore u ke ke ua khaohana le motho hobane a entse phoso hanngoe kapa a bontšitse mekhoa eo u sa e rateng. (Pesaleme ea 130:3) Empa Sarah o ile a etsa qeto ea ho khaohana le John ha a bona hore o tloaetse ho tšoara batho ba bang ka tsela e sa bontšeng tlhompho.
U lokela ho etsa’ng haeba joaloka Jill le Sarah, u hlokomela hore motho eo u ratanang le eena e ke ke ea e-ba molekane ea loketseng oa lenyalo? Boemong boo, u se ke ua hlokomoloha maikutlo a hao! Le hoja ho ka ’na ha e-ba thata ho amohela seo, ho ka ba molemo hore le khaohane. Liproverbia 22:3 e re: “Ea masene ke ea boneng tlokotsi ’me a ipata.”
Ke ’nete hore ho ka ’na ha e-ba thata hore le arohane. Empa lenyalo ke tlamo ea ka ho sa feleng. Ho molemo ho utloa bohloko ka nakoana hona joale, ho e-na le ho ikoahlaea bophelo bohle ba hao!