మీరు బైబిలు ప్రమాణాల ప్రకారం జీవిస్తూ దేవునితో స్నేహం చేస్తూ ఉంటే, మీరు బాప్తిస్మం తీసుకోవాలని కోరుకోవడం సహజమే. అందుకోసం మీరు సిద్ధంగా ఉన్నారో లేదో మీకెలా తెలుస్తుంది? a

ఈ ఆర్టికల్‌లో ...

•  నేను ఎంత తెలుసుకోవాలి?

•  నేను ఏమేం చేయాలి?

•  మీ వయసువాళ్లు ఏమంటున్నారు?

 బాప్తిస్మం కోసం సిద్ధపడడం అంటే, స్కూల్‌లో పరీక్ష పాస్‌ అవడం కోసం కొన్ని విషయాలు గుర్తుపెట్టుకోవడం లాంటిది కాదు. మీరు మీ “ఆలోచనా సామర్థ్యాల్ని” ఉపయోగించి, బైబిలు బోధించేది సత్యం అనే మీ నమ్మకాన్ని బలపర్చుకోవాలి. (రోమీయులు 12:1) ఉదాహరణకు:

•   దేవుడు ఉన్నాడని, మీ ఆరాధన పొందడానికి ఆయన అర్హుడని మీరు నిజంగా నమ్ముతున్నారా?

   బైబిలు ఇలా చెప్తుంది: “దేవుని దగ్గ​రికి వచ్చేవాళ్లు ఆయన ఉన్నాడని, తనను మనస్ఫూర్తిగా వెదికేవాళ్లకు ఆయన ప్రతిఫలం ఇస్తాడని తప్పకుండా నమ్మాలి.”—హెబ్రీయులు 11:6.

   మిమ్మల్ని మీరు ఇలా ప్రశ్నించుకోండి: ‘దేవుడు ఉన్నాడని నేను ఎందుకు నమ్ముతున్నాను?’ (హెబ్రీయులు 3:4) ‘నా ఆరాధన పొందడానికి ఆయన ఎందుకు అర్హుడు?’—ప్రకటన 4:11.

   ఇంకా సహాయం కావాలా? “జీవం ఎలా వచ్చింది? ఎవరైనా సృష్టించారా లేక దానంతటదే వచ్చిందా?—1వ భాగం: దేవుడు ఉన్నాడని ఎందుకు నమ్మాలి?” చూడండి.

•   బైబిల్లో ఉన్న సందేశాన్ని దేవుడే ఇచ్చాడని మీకు నమ్మకం కుదిరిందా?

   బైబిలు ఇలా చెప్తుంది: “లేఖనాలన్నిటినీ దేవుడు ప్రేరేపించాడు. అవి బోధించడానికి, గద్దించడానికి, సరిదిద్దడానికి, దేవుని నీతి ప్రమాణాల ప్రకారం క్రమశిక్షణ ఇవ్వడానికి ప్రయోజనకరంగా ఉంటాయి.”—2 తిమోతి 3:16.

   మిమ్మల్ని మీరు ఇలా ప్రశ్నించుకోండి: ‘బైబిలు మనుషుల ఆలోచనలు మాత్రమే ఉన్న పుస్తకం కాదని నేను ఎందుకు నమ్ముతున్నాను?’—యెషయా 46:10; 1 థెస్సలొనీకయులు 2:13.

   ఇంకా సహాయం కావాలా? “బైబిలు నాకెలా సహాయం చేయగలదు?—1వ భాగం: మీ బైబిలు గురించి తెలుసుకోండి” చూడండి.

•   యెహోవా తన ఇష్టాన్ని చేయడానికి క్రైస్తవ సంఘాన్ని ఉపయోగిస్తున్నాడని మీరు నిజంగా నమ్ముతున్నారా?

   బైబిలు ఇలా చెప్తుంది: “[దేవునికి] సంఘం ద్వారా, క్రీస్తుయేసు ద్వారా తరతరాలు, యుగయుగాలు మహిమ కలగాలి.”—ఎఫెసీయులు 3:21.

   మిమ్మల్ని మీరు ఇలా ప్రశ్నించుకోండి: ‘మీటింగ్స్‌లో చెప్పే బైబిలు విషయాలు మనుషుల నుండి కాకుండా యెహోవా నుండి వస్తున్నాయని నేను నమ్ముతున్నానా?’ (మత్తయి 24:45) ‘మా అమ్మానాన్నలు రాలేకపోతున్నా, (వాళ్లు అనుమతిస్తే) నేను మీటింగ్స్‌కు వెళ్తున్నానా?’—హెబ్రీయులు 10:24, 25.

   ఇంకా సహాయం కావాలా? “రాజ్యమందిరంలో జరిగే కూటాలకు ఎందుకు వెళ్లాలి?” చూడండి.

 మీలో ఎలాంటి లోపం లేనప్పుడే మీరు బాప్తిస్మం తీసుకోవాలని కాదు. అయితే, ‘చెడుకు దూరంగా ఉండాలని, మంచి చేయాలని’ మీరు నిజంగా కోరుకుంటున్నట్లు ఖచ్చితంగా చూపించాలి. (కీర్తన 34:14) ఉదాహరణకు:

•   మీరు యెహోవా ప్రమాణాల ప్రకారం జీవిస్తున్నారా?

   బైబిలు ఇలా చెప్తుంది: “మంచి మనస్సాక్షిని కాపాడుకోండి.”—1 పేతురు 3:16.

   మిమ్మల్ని మీరు ఇలా ప్రశ్నించుకోండి: ‘నేను “తప్పొప్పులను గుర్తించేలా” నా “వివేచనా సామర్థ్యాలకు” శిక్షణ ఇచ్చుకున్నట్టు ఎలా చూపించాను?’ (హెబ్రీయులు 5:14) ‘నా స్నేహితులు తప్పు చేయమని నన్ను ఒత్తిడి చేసినప్పుడు నేను ఎదిరించిన సందర్భాలు ఏమైనా నాకు గుర్తొస్తున్నాయా? సరైనది చేసేలా నా స్నేహితులు నన్ను ప్రోత్సహిస్తున్నారా?’—సామెతలు 13:20.

   ఇంకా సహాయం కావాలా? “నా మనస్సాక్షికి ఎలా శిక్షణ ఇవ్వాలి?” చూడండి.

•   మీరు చేసే పనులకు మీరే బాధ్యులని గుర్తిస్తున్నారా?

   బైబిలు ఇలా చెప్తుంది: “మనలో ప్రతీ ఒక్కరు తన గురించి దేవునికి లెక్క అప్పజెప్పాల్సి ఉంటుంది.”—రోమీయులు 14:12.

   మిమ్మల్ని మీరు ఇలా ప్రశ్నించుకోండి: ‘నేను నా విషయాల్లో, ఇతరుల విషయాల్లో నిజాయితీగా ఉంటున్నానా?’ (హెబ్రీయులు 13:18) ‘ఏదైనా తప్పు చేసినప్పుడు దాన్ని ఒప్పుకుంటానా లేక దాన్ని దాచిపెట్టడానికి, ఇతరుల మీద వేయడానికి ప్రయత్నిస్తానా?’—సామెతలు 28:13.

   ఇంకా సహాయం కావాలా? “తప్పులు చేసినప్పుడు నేనేమి చేయాలి?” చూడండి.

•   యెహోవాతో మీ స్నేహాన్ని కాపాడుకుంటున్నారా?

   బైబిలు ఇలా చెప్తుంది: “దేవునికి దగ్గరవ్వండి, అప్పుడు ఆయన మీకు దగ్గరౌతాడు.”—యాకోబు 4:8.

   మిమ్మల్ని మీరు ఇలా ప్రశ్నించుకోండి: ‘యెహోవాకు దగ్గరవడానికి నేను ఏమేం చేస్తున్నాను?’ ఉదాహరణకు, ‘నేను ఎంత తరచుగా బైబిలు చదువుతున్నాను?’ (కీర్తన 1:1, 2) ‘నేను క్రమంగా ప్రార్థిస్తున్నానా?’ (1 థెస్సలొనీకయులు 5:17) ‘నేను ఫలానా విషయాల గురించి నిర్దిష్టంగా ప్రార్థిస్తున్నానా? నా స్నేహితులు యెహోవాకు కూడా స్నేహితులేనా?’—కీర్తన 15:1, 4.

   ఇంకా సహాయం కావాలా? “బైబిలు నాకెలా సహాయం చేయగలదు?—2వ భాగం: బైబిలు చదవడాన్ని ఎలా ఆనందించవచ్చు?” అలాగే “నేను ఎందుకు ప్రార్థించాలి?” చూడండి.

 టిప్‌: బాప్తిస్మం కోసం సిద్ధపడడానికి యువత అడిగే ప్రశ్నలు—ఆచరణాత్మక సమాధానాలు (ఇంగ్లీషు) 2వ సంపుటిలోని 37వ అధ్యాయం చదవండి. ముఖ్యంగా 308, 309 పేజీల్లోని వర్క్‌షీట్‌ చూడండి.