ఈ ఆర్టికల్‌లో …

•  డేటింగ్‌ అంటే ఏంటి?

•  డేటింగ్‌ చేయడానికి మీరు రెడీగా ఉన్నారా?

 డేటింగ్‌ అంటే సరదా కోసం చేసేది అని కొంతమంది అనుకుంటారు. కానీ “డేటింగ్‌” అంటే ఒక అమ్మాయి, అబ్బాయి పెళ్లి చేసుకోవడానికి ఒకరికొకరు సరిపోతారా లేదా అని తెలుసుకోవడానికి గడిపే సమయమని ఈ ఆర్టికల్‌ చెప్తుంది. అవతలి వ్యక్తి ఇష్టపడుతుంటే ఆనందించడం మాత్రమే కాదు గానీ డేటింగ్‌ చేయడానికి ఒక ఉద్దేశం ఉంటుంది.

 డేటింగ్‌ చేస్తున్నవాళ్లు కాలం గడిచేకొద్దీ, ఆ వ్యక్తిని పెళ్లి చేసుకోవాలా లేకపోతే ఆ బంధాన్ని అక్కడితోనే ఆపేయాలా అనే నిర్ణయం తీసుకోవాల్సి వస్తుంది. అందుకే డేటింగ్‌ మొదలుపెడుతున్నప్పుడే ఆ రెండిటిలో దేనికైనా రెడీగా ఉండాలి.

 ఒక్క మాటలో చెప్పాలంటే: మీరు డేటింగ్‌ చేయడానికి రెడీగా ఉన్నారంటే, ఒకరకంగా పెళ్లికి కూడా రెడీగా ఉన్నట్లే.

 డేటింగ్‌ పెళ్లికి నడిపిస్తుంది కాబట్టి ఏ లక్షణాలు మీ బంధాన్ని కాపాడతాయో, ఏవి పాడు చేస్తాయో జాగ్రత్తగా ఆలోచించండి. ఒకసారి ఈ కిందున్న వాటిని చూడండి:

•   కుటుంబ సభ్యులతో ఎలా ఉంటున్నారో చూసుకోండి: మీ అమ్మానాన్నలతో, తోబుట్టువులతో మీరు ఎలా ఉంటారు, ముఖ్యంగా ఒత్తిడిలో ఉన్నప్పుడు ఎలా ప్రవర్తిస్తారు అనే దాన్ని బట్టే మీ భార్య లేదా భర్తతో కూడా ఎలా ఉంటారనే విషయం తెలుస్తుంది.

   బైబిలు సూత్రం: “మీరు అన్నిరకాల ద్వేషం, అలాగే కోపం, ఆగ్రహం, అరవడం, తిట్టడం, అన్నిరకాల చెడుతనం మానేయండి.”—ఎఫెసీయులు 4:31.

   ఇలా ప్రశ్నించుకోండి: ‘నేను అమ్మానాన్నల్ని, తోబుట్టువుల్ని గౌరవిస్తానని వాళ్లు నా గురించి చెప్తారా? వాళ్లతో ఏదైనా సమస్య వస్తే, నేను ప్రశాంతంగా మాట్లాడతానా లేదా ఆవేశంగా అరుస్తానా?’

•   మీ గురించే ఆలోచించకండి: పెళ్లయ్యాక మీకు నచ్చింది కాకుండా, మీ భార్య లేదా భర్తకి ఏం నచ్చుతుందో తెలుసుకుని వాటిని చేయడానికి చూడాలి.

   బైబిలు సూత్రం: “ప్రతీ ఒక్కరు సొంత ప్రయోజనం గురించి కాకుండా ఇతరుల ప్రయోజనం గురించి ఆలోచిస్తూ ఉండాలి.”—1 కొరింథీయులు 10:24.

   ఇలా ప్రశ్నించుకోండి: ‘ప్రతీసారి నాకు నచ్చిందే చేయాలని నేను పట్టుపడుతున్నానా? నేను సరిగ్గా ఆలోచించి నిర్ణయాలు తీసుకుంటానని ఇతరులకు తెలుసా? నా అవసరాల కన్నా ఎదుటివాళ్ల అవసరాలనే ఎక్కువ పట్టించుకుంటానని నేనెలా చూపిస్తున్నాను?’

•   వినయం చూపించండి. ఒక మంచి భార్య లేదా భర్త, తమ తప్పుల్ని ఒప్పుకుని, మనస్ఫూర్తిగా క్షమించమని అడుగుతారు.

   బైబిలు సూత్రం: “మనందరం తరచూ పొరపాట్లు చేస్తుంటాం.”—యాకోబు 3:2, అథస్సూచి.

   ఇలా ప్రశ్నించుకోండి: ‘నేను నా పొరపాట్లని ఒప్పుకోవడానికి ఇష్టపడతానా లేదా సాకులు చెప్తానా? ఏదైనా విషయంలో అవసరమైన సలహా ఇస్తే నేను నొచ్చుకుంటానా?’

•   డబ్బులు ఎలా ఖర్చు చేస్తారో ఆలోచించండి. తరచూ కుటుంబాల్లో, డబ్బు విషయాల్లో గొడవలు అవుతుంటాయి. కాబట్టి ఆ విషయంలో మీరెంత ఎక్కువ బాధ్యతగా ఉంటే, అంత తక్కువ గొడవలు అవుతాయి.

   బైబిలు సూత్రం: “మీలో ఒక వ్యక్తి భవనం కట్టాలనుకుంటే, దాన్ని పూర్తిచేయడానికి కావాల్సినంత డబ్బు తన దగ్గర ఉందో లేదో చూడడానికి ముందుగా కూర్చొని లెక్కలు వేసుకోడా?”—లూకా 14:28.

   ఇలా ప్రశ్నించుకోండి: ‘నా ఖర్చుల్ని నేను కంట్రోల్‌ చేసుకుంటున్నానా లేక అతిగా ఖర్చుపెట్టి అప్పుల పాలు అవుతున్నానా? నేను డబ్బును జాగ్రత్తగా ఉపయోగిస్తానని ఎలా చూపిస్తాను?’

•   దేవునికి ఇష్టమైన పనులు చేయండి. మీరు ఒక యెహోవాసాక్షి అయితే, క్రమంగా బైబిలు చదవడం, మీటింగ్స్‌కి వెళ్లడం లాంటివి చేస్తూ ఉండాలి.

   బైబిలు సూత్రం: “దేవుని నిర్దేశం తమకు అవసరమని గుర్తించేవాళ్లు సంతోషంగా ఉంటారు.”—మత్తయి 5:3.

   ఇలా ప్రశ్నించుకోండి: ‘దేవునికి ఇష్టమైన పనులు చేస్తూ, నా విశ్వాసాన్ని బలంగా ఉంచుకోవడానికి ప్రయత్నిస్తున్నానా? ఆరాధనలో భాగంలో చేసే పనుల్ని ప్రాముఖ్యంగా ఎంచుతున్నానా లేక వేరే విషయాలకు టైం ఇస్తున్నానా?’

 ఒక్క మాటలో చెప్పాలంటే: మిమ్మల్ని చేసుకునే వ్యక్తి, మీరు తనకు తగిన జోడీగా ఉండాలని ఆశిస్తారు. అలా ఉండడానికి మీరు కష్టపడితే, అవతలి వ్యక్తి మిమ్మల్ని తప్పకుండా ఇష్టపడతారు.