Nzembo 55:1-23
Epai ya mokambi ya nzembo; eyembamaka elongo na bibɛtɛlo ya bansinga. Maskile.* Ya Davidi.
55 Ee Nzambe, yoká libondeli na ngai,+Mpe kosala te lokola oyoki te ntango nazali kosɛnga yo oyokela ngai mawa.*+
2 Tyelá ngai likebi mpe yanolá ngai.+
Motungisi na ngai ezali kosala ete nazanga kimya,+Mpe nabulungani mpenza
3 Mpo na maloba ya mongunaMpe ndenge moto mabe azali konyokola ngai.
Mpo bazali kobimisela ngai mpasi mingi mpenza,Bazali koyokela ngai nkanda makasi mpe bazali mpenza koyina ngai.+
4 Motema na ngai ezali na mpasi makasi na kati na ngai,+Mpe nsɔmɔ ya liwa ezingi ngai.+
5 Kobanga mpe kolɛnga ekweli ngai,Mpe kolɛngalɛnga ezwi ngai.
6 Nazali kaka koloba: “Soki nazalaka ata na mapapu lokola ebenga!
Mbɛlɛ napumbwaki mosika mpe nafandi na kimya.
7 Talá! mbɛlɛ nakimaki mosika.+
Mbɛlɛ nafandaki na esobe.+ (Sela)
8 Mbɛlɛ nakendaki mbangu na esika na ngai ya libateliMosika na mopɛpɛ oyo ezali kopɛpa makasi, mosika na mopɛpɛ makasi.”
9 Ee Yehova, bulunganisá bango mpe salá ete makambo oyo bakani kosala elonga te,*+Mpo namoni mobulu mpe kowelana na kati ya engumba.
10 Ezali kobaluka zingazinga likoló ya bifelo na yango butu moi;Makambo ya mabe mpe mpasi ezali na kati na yango.+
11 Libebi ezali na kati na yango;Monyoko ná bokosi elongwe ata moke te na esika na yango monene ya bato nyonso.+
12 Mpo monguna te nde atumoli ngai;+Soki bongo mbɛlɛ nakangelaki yango motema.
Ezali te monguna nde atɛmɛli ngai;Soki bongo mbɛlɛ namibombaki liboso na ye.
13 Kasi ezali yo, moto lokola ngai,*+Moninga na ngai oyo nayebi malamu.+
14 Tozalaki kosepela elongo mpo na boninga na biso ya makasi;Na kati ya ndako ya Nzambe tozalaki kotambola elongo na ebele ya bato.
15 Libebi ekwela bango!+
Bákita na Nkunda* wana bazali naino na bomoi;Mpo mabe ezali na bisika na bango ya kofanda mpe na mitema na bango.
16 Kasi ngai nakobelela Nzambe,Mpe Yehova akobikisa ngai.+
17 Na mpokwa, na ntɔngɔ mpe na midi, nazali kaka komitungisa mpe komilelalela,*+Mpe ayokaka mongongo na ngai.+
18 Akobikisa ngai mpenza* na baoyo bazali kobundisa ngai mpe akopesa ngai kimya,Mpo bato ebele bayei kobundisa ngai.+
19 Nzambe akoyoka mpe akoyanola bango,+Ye oyo azali kofanda na kiti na ye ya bokonzi kobanda ntango ya kala.+ (Sela)
Baoyo babangakaNzambe teBakoboya kobongwana.+
20 Abundisi* baoyo bazali na kimya elongo na ye;+Abebisi kondimana na ye.+
21 Maloba na ye ezali kitoko koleka manteka,+Kasi kowelana ezali na motema na ye.
Maloba na ye ezali pɛtɛɛ koleka mafuta,Kasi ezali mipanga oyo ebimisami na mabenga na yango.+
22 Bwakelá Yehova mokumba na yo ya kilo,+Mpe akosunga yo.+
Akopesa nzela ata moke te ete moto ya sembo akwea.*+
23 Kasi yo, Ee Nzambe, okokitisa bango na libulu oyo eleki mpenza mozindo.+
Baoyo bazali na ngambo ya makila mpe bato ya bokosi bakokokisa ata katikati ya mikolo na bango te.+
Kasi ngai, nakotyela yo motema.
Maloba na nse
^ Talá Ndimbola ya maloba.
^ To, “komibomba te ntango nazali kobondela mpo na kosɛnga lisalisi.”
^ Lil., “kabolá lolemo na bango.”
^ To, “moto, moto oyo akokani na ngai.”
^ To, “Sheole,” elingi koloba, nkunda ya bato nyonso. Talá Ndimbola ya maloba.
^ To, “kokimela; nazali na kimya te.”
^ Lil., “Akosikola ngai mpenza.”
^ Elingi koloba, moninga ya kala oyo alobelami na vɛrsɛ 13 mpe 14.
^ To, “atengatenga.”
