OL YANGFALA OLI ASKEM
?Mi Mi Mas Baptaes?—Pat 2: Rere Blong Baptaes
Sipos yu stap folem ol rul blong Baebol mo yu stap traehad blong fren gud wetem God, ating yu stap tingbaot blong baptaes. ?Olsem wanem blong save sipos yu rere blong baptaes? a
Long atikol ya
?Mi mas kasem hamas save?
Blong rere blong baptaes, i no nid blong lanem baehat plante save, olsem ol studen oli mekem blong pasem eksam long skul. Be yu mas “yusum gud tingting” blong yu blong bildimap bilif se ol tijing blong Baebol oli tru. (Rom 12:1) Eksampol:
?Yu yu bilif se God i stap mo i stret we yu wosipim hem?
Baebol i talem se: “Man we i wantem kam klosap long God, hem i mas bilif we God i stap, mo we hem bambae i givim pei long ol man we oli stap traehad blong faenem hem.”—Hibru 11:6.
Askem se: ‘?From wanem mi mi bilif long God?’ (Hibru 3:4) ‘?From wanem i stret blong wosipim hem?’—Revelesen 4:11.
?Yu nidim help? Yu luk “?Kriesen o Evolusen?—Pat 1: ?From Wanem i Stret Blong Bilif Long God?”
?Yu yu bilif se ol tok blong Baebol i kamaot long God?
Baebol i talem se: “Olgeta tok blong Baebol oli kamaot long God fastaem, mo oli stret gud blong tijim man, blong stretem man, blong stretem olgeta samting, mo blong stretem man folem stret fasin.”—2 Timoti 3:16.
Askem se: ‘?From wanem mi bilif se Baebol i no wan buk we i talemaot tingting blong ol man nomo?’—Aesea 46:10; 1 Tesalonaeka 2:13.
?Yu nidim help? Yu luk “?Olsem Wanem Baebol i Save Givhan Long Mi?—Haf 1: Kasem Ol Gudfala Samting Long Baebol.”
?Yu yu bilif se Jehova i stap yusum Kristin kongregesen blong mekem wok blong hem?
Baebol i talem se: “Tru long kongregesen mo tru long Kraes Jisas, i gud yumi givim glori long [God] gogo i no save finis.”—Efesas 3:21.
Askem se: ‘?Mi tingbaot ol save blong Baebol we mi lanem long ol Kristin miting, olsem samting we i kamaot long ol man o long Jehova?’ (Matiu 24:45) ‘?Mi mi stap go long miting taem papa mo mama i no save go (sipos tufala i letem yu)?’—Hibru 10:24, 25.
?Yu nidim help? Yu luk “?From Wanem i Gud Blong Go Long Ol Miting Long Haos Kingdom?”
?Mi mas mekem wanem?
I no nid blong yu stret gud olgeta blong baptaes. Be yu mas soemaot se yu rili wantem ‘tanem baksaed long samting we i nogud, mo mekem samting we i gud.’ (Ol Sam 34:14) Eksampol:
?Yu yu stap folem ol fasin we Jehova i laekem long laef blong yu?
Baebol i talem se: “Yufala i mas gohed blong mekem se tingting blong yufala we i save stikim yufala, i stap klin oltaem.”—1 Pita 3:16.
Askem se: ‘?Olsem wanem mi soemaot se mi “yusum tingting” blong mi, mo ‘mi trenem tingting blong mi blong luksave samting we i stret mo samting we i rong’?’ (Hibru 5:14) ‘?Mi save tingbaot sam taem we mi no bin letem ol nara yangfala oli pulum mi blong mekem samting we i rong? ?Mi mi jusum ol fren we oli pulum mi blong mekem gudfala fasin?’—Ol Proveb 13:20.
?Yu nidim help? Yu luk “?Olsem Wanem Blong Trenem Tingting Blong Mi We i Save Stikim Mi?”
?Yu yu kasem save se yu mas talemaot long Jehova from wanem ol aksen blong yu oli olsem?
Baebol i talem se: “Yumi wanwan i mas talemaot olgeta fasin blong yumi long God.”—Rom 14:12.
Askem se: ‘?Mi mi stap giaman long mi wan mo ol narafala?’ (Hibru 13:18) ‘?Mi mi talemaot ol mastik blong mi, o mi haedem olgeta, o mi blemem narafala from?’—Ol Proveb 28:13.
?Yu nidim help? Yu luk “?Olsem Wanem Blong Dil Wetem Ol Mastik Blong Mi?”
?Yu stap gohed blong fren gud wetem Jehova?
Baebol i talem se: “Yufala i mas kam klosap long God, nao hem bambae i kam klosap long yufala.”—Jemes 4:8.
Askem se: ‘?Mi stap mekem wanem blong kam klosap long Jehova?’ Eksampol: ‘?Mi mi ridim Baebol evri dei?’ (Ol Sam 1:1, 2) ‘?Mi mi prea oltaem?’ (1 Tesalonaeka 5:17) ‘?Mi mi stap tokbaot evri samting wetem Jehova long ol prea blong mi? ?Ol fren blong mi, oli fren blong Jehova?’—Ol Sam 15:1, 4.
?Yu nidim help? Yu luk “?Olsem Wanem Baebol i Save Givhan Long Mi?—Haf 2: Laekem Blong Ridim Baebol” mo “?From Wanem Mi Mas Prea?”
TRAEM HEMIA: Blong givhan long yu blong rere blong baptaes, ridim japta 37 blong buk ya Questions Young People Ask—Answers That Work, Volium 2 (Inglis). Makem gud ol save long pepa blong fulumap, long pej 308 mo 309.
a Ridim atikol ya “?Mi Mi Mas Baptaes?—Pat 1,” we i tokbaot mining blong givim laef blong yu long God mo baptaes, mo from wanem samting ya i impoten.
Maet Yu Laekem Hemia Tu
OL YANGFALA OLI ASKEM
?Mi Mi Mas Baptaes?—Pat 1: Mining Blong Baptaes
Sipos yu stap tingbaot blong baptaes, fastaem yu mas kasem save long mining blong hem.
OL YANGFALA OLI ASKEM
?Mi Mi Mas Baptaes?—?From Wanem Mi Stap Slo Blong Baptaes?
Sipos yu fraet blong givim laef blong yu long Jehova mo baptaes, atikol ya bambae i givhan long yu blong winim fraet ya.
ANSA WE BAEBOL I GIVIM
?Wanem Ya Baptaes?
Baebol i tokbaot plante man we oli baptaes, i soemaot mining blong baptaes, mo from wanem i impoten.
