?Olsem Wanem Sipos Papa Mo Mama Blong Mi i Mekem Divos?
Samting we yu save mekem
Tokbaot ol wari blong yu. Talem long tufala se yu harem nogud tumas mo yu konfius. Maet tufala i save eksplenem wanem i stap hapen mo hemia i save daonem wari blong yu.
Sipos tufala i no save givhan long yu olsem yu wantem, maet yu save tokbaot wetem wan fren we i bigman long tingting blong hem mo yu trastem hem.—Ol Proveb 17:17.
Samting we i moa impoten se Papa blong yu long heven i rere oltaem blong lesin long yu. Hem i “Man blong harem ol prea.” (Ol Sam 65:2) Talemaot long hem evri samting we i stap long hat blong yu, “from we hem i kea” long yu.—1 Pita 5:7.
Samting we yu no mas mekem
Yu no mas stap kros longtaem. Papa mo mama blong Daniel i seraot taem hem i gat seven yia. Daniel i talem se: “Tufala i tingbaot tufala nomo. Tufala i no tingbaot mifala mo samting we aksen blong tufala bambae i mekem long mifala.”
Sipos Daniel i no lego kros mo fogivim tufala, ?olsem wanem hem i save spolem hem wan bakegen?—Blong save: Ridim Ol Proveb 29:22.
?From wanem i gud Daniel i traem fogivim tufala from ol aksen blong tufala we i mekem hem i harem nogud tumas?—Blong save: Ridim Efesas 4:31, 32.
No mekem ol fasin we oli save spolem yu bakegen. Deni i talem se: “Afta we papa mo mama blong mi i divos, mi lusum glad mo tingting blong mi i foldaon. Mi no wok gud long skul mo wan yia mi no pasem eksam blong mi. Afta long hemia . . . mi stap mekem fani nomo blong evriwan long klas oli laf long mi, mo plante taem mi joen long ol faet tu.”
?Yu ting se from wanem Deni i mekem fani long klas mo i joen long ol faet?
?Olsem wanem advaes blong Galesia 6:7 i stap halpem plante yangfala olsem Deni, blong oli no spolem olgeta bakegen?
I nidim taem blong harem gud bakegen. Taem yu stap folem wan gudfala program bakegen, bambae yu harem se laef blong yu i nomol.