Baebol i tokbaot nogud samting we i save kamaot taem man i lego wok i stap blong mekem biaen, i se: “Man we i stap lukluk win, bambae hem i no saksakem sid long garen, mo man we i stap lukluk klaod, bambae hem i no karemaot kakae long garen.”—Prija 11:4.

 Tingbaot sam samting we oli save mekem se yu gat fasin ya mo samting we yu save mekem blong winim.

 I tru se taem wok i bigwan tumas, yumi save fraet long hem, mo i isi nomo blong lego i stap blong mekem long wan narafala taem. Be hemia sam samting we i moa gud blong mekem:

•   Seraotem projek ya i go long ol smosmol haf. Melisa i talem se: “Taem mi save se mi let blong finisim wan projek, mi seraotem wok ya long ol smosmol haf, mo mi mekem wan afta narawan blong traem kajap.”

•   Statem naoia. “Taem yu kasem wan wok, i gud blong statem kwiktaem, nating sipos yu raetem nomo long lis blong ol wok blong yu, o yu raetem sam smosmol tingting long saed ya blong yu no fogetem olgeta.”—Vera.

•   Askem help. Ating papa mo mama mo ol tija blong yu oli bin fesem sem problem. I gud yu askem advaes long olgeta. Maet oli save halpem yu blong oganaesem wok blong yu mo mekem wan plan.

 Traem hemia: “Mekem wan program. I tru, hemia i min se yu mas oganaes gud mo yu mas gat strong tingting blong folem program ya. Be sipos yu mekem olsem, bambae yu wok gud mo mekem evri samting we yu mas mekem long stret taem.”—Abi.

 Plante taem wok we yu mas mekem i boring. ?Bambae yu mekem wanem sipos yu no laekem wok ya? Traem hemia:

•   Tingbaot wan risen blong statem kwik. Yu save tingbaot olsem wanem bambae yu harem gud taem yu finisim wok ya. Ami i talem se: “Mi laekem filing we mi kasem taem mi finisim wan wok long stret taem o mi finisim eli mo mi save rilaks.”

•   Tingbaot frut blong desisen blong yu. Taem yu wet, yu ademap stres, mo yu no mekem bes blong yu long wok ya. Baebol i talem se: “Bambae yu kasem stret kakae blong sid we yu planem.”—Galesia 6:7, Good News Translation.

•   Long tingting blong yu, seftem det we yu mas finisim projek ya i kam klosap moa. Alesia i talem se: “Samting we i givhan long mi, hemia se mi mekem olsem we mi mas finisim wok ya wan o tu dei bifo long det blong hem. Afta, mi gat wan o tu dei we mi fri, mo mi gat taem blong jekem bakegen.”

 Traem hemia: “I dipen nomo long tingting blong yu. Tingbaot se bambae yu mas mekem wok ya mo i no gat wan samting we bambae i blokem yu. Taem mi tingting olsem, samting we mi mas mekem, mi mekem.”—Aleksis.

 Natan i talem se: “Plante man oli stap talem se mi gat fasin ya blong lego wok i stap blong mekem biaen. !Be tok ya i no stret! !Oli no save se mi bisi olsem wanem!” Sipos yu gat sem tingting olsem Natan, traem hemia:

•   Mekem ol wok we i isi fastaem. Amba i talem se: “Wan man i bin talem long mi se sipos wan wok i no bitim faef minit, yu mas mekem naoia nomo. Hemia i minim ol samting olsem klinap, putumbak ol klos long ples blong olgeta, wasem ol plet, mo ringim wan man we yu mas ring long hem.”

•   Makemaot samting we i moa impoten. Baebol i talem se: “Faenemaot ol samting we oli moa impoten.” (Filipae 1:10) ?Olsem wanem blong folem advaes ya long laef blong yu? Ana i talem se: “Mi mekem wan lis blong ol projek we mi gat mo wetaem mi mas finisim olgeta. Be samting we i moa impoten, mi raetemdaon wetaem mi gat plan blong wok long ol wanwan projek ya mo finisim olgeta.”

 Sipos yu mekem olsem, ?yu ting se yu mekem i strong tumas long yu wan? Traem tingbaot: Taem yu mekem wan program, yu nao yu kontrolem taem blong yu, be i no taem we i kontrolem yu. Hemia i daonem stres. Keli i talem se: “Taem mi gat wan plan, tingting blong mi i stap kwaet, mo i isi blong luksave ol samting we oli moa impoten.”

•   Blokem ol samting we oli save distebem yu. Jenifa i talem se: “Mi talem long evriwan long haos wetaem bambae mi statem wan projek. Sipos oli wantem se mi mekem wan samting, mi askem long olgeta blong talem bifo we mi statem projek ya. Mo tu, mi ofem fon blong mi mo imel.”

 Traem hemia: “Wok blong yu bambae i no ronwe, yu mas mekem. I moa gud yu finisim wok ya i bitim we yu wari long hem. Olsem nao, afta we yu finisim yu save rilaks.”—Jodan.