Klosap evri famle i putum sam rul blong folem, maet long saed blong stret taem we pikinini i no mas bitim blong kamhom, teknoloji, mo respektem ol narafala.

 ?Be olsem wanem sipos yu brekem wan rul? Yu no save jenisim samting we i hapen, be yu save mekem se i no kam mowas. Ol advaes biaen i save givhan long yu.

•  Samting we yu no mas mekem

•  Samting we i moa gud

•  Sam yangfala oli talem wanem

•   Sipos papa mo mama blong yu i no save se yu brekem wan rul, maet yu wantem haedem rong blong yu.

•   Sipos tufala i save se yu brekem wan rul, maet yu wantem mekem eskius o blemem narafala.

 I nogud blong mekem olsem. ?From wanem? Sipos yu traem haedem o mekem eskius from rong blong yu, yu mekem fasin olsem pikinini. Bambae papa mo mama blong yu i luksave se yu no gruap yet long tingting blong yu.

 “I nogud blong giaman. Biaen, bambae tufala i faenemaot, mo bambae tufala i panisim yu moa i bitim sipos yu bin talem trutok.”—Diana.

•   Talemaot rong blong yu. Baebol i talem se: “Man we i stap haedem ol sin blong hem, bambae hem i no win.” (Ol Proveb 28:13) Papa mo mama blong yu i save se bambae yu mestem sam samtaem. Be tufala i wantem se yu tok tru taem yu mekem wan mastik.

   “Sipos yu talemaot samting we yu mekem, papa mo mama blong yu bambae i sore moa long yu mo fogivim yu. Bambae tufala i trastem yu moa, from we yu tok tru.”—Olivia.

•   Talem sore. Baebol i talem se: “Yufala evriwan i mas werem tingting daon olsem wan klos.” (1 Pita 5:5) Blong talem sore mo no mekem eskius, yu nidim tingting daon.

   “Man we i mekem eskius oltaem, sloslo tingting blong hem bambae i no moa stikim hem taem i mekem i rong, gogo, bambae hem i no moa harem se samting we hem i mekem i rong.”—Heta.

•    Lesin taem tufala i stretem yu. Baebol i talem se: “Yufala i mas lesin long ol tok blong stretem yufala.” (Ol Proveb 8:33) Yu no mas komplen, mo yu mas akseptem enikaen panis we tufala i givim.

   “Taem yu komplen, yu mekem evri samting i kam mowas. Akseptem panis we tufala i givim, mo no tingbaot samting we tufala i blokem o tekemaot long yu.”—Jason.

•   Wok had blong mekem se tufala i trastem yu bakegen. Baebol i talem se: “Yufala i mas karemaot olfala fasin blong yufala we i folem olfala laef blong yufala bifo.” (Efesas 4:22) Traehad blong mekem ol waes desisen, blong tufala i save trastem yu bakegen.

   “Sipos yu mekem ol waes desisen mo traehad blong no moa mekem semfala mastik, sloslo bambae tufala i trastem yu bakegen.”—Karen.

 ADVAES: Mekem moa i bitim samting we tufala i askem long yu, blong soemaot se tufala i save trastem yu. Eksampol: Nekis taem yu goaot, kolem tufala blong talem wetaem bambae yu kamhom, nating se yu no let. Bambae tufala i luksave se yu stap traehad blong mekem tufala i trastem yu bakegen.