Samtaem, i gud blong stopem frensip blong yu wetem boefren o gelfren blong yu. Traem tingbaot ekspiriens blong Jill. Hem i talem se: “Long stat, mi laekem taem boefren blong mi i wari oltaem from mi se, mi stap wea, mi stap mekem wanem, mo mi stap wetem hu. Be hem i mekem olsem kasem wan mak we hem i no wantem se mi joen wetem eni narafala man, be blong mi joen wetem hem nomo. Antap moa, hem i jalus taem mi spenem taem wetem famle blong mi, speseli papa blong mi. !Taem mi stop blong frenem hem, mi harem olsem se wan bigfala hevi samting i kamaot long solda blong mi!”

 Sarah tu i ekspiriensem sem samting olsem. Hem i stat blong makem se boefren blong hem Jon, i gat fasin ya blong jikim man, i wan had man, mo i no gat respek. Serah i talem se: “!Wan taem hem i kam let tri aoa afta! Taem hem i kamtru long doa, hem i no wantem save long mama blong mi we i openem doa long hem, mo i talem se: ‘Yumitu go. Yumitu let.’ Hem i no talem se: ‘Mi mi let,’ be i se: ‘Yumitu let.’ Hem i sud talem sore o eksplenem from wanem hem i let. !Antap moa, hem i sud respektem mama blong mi!”

 I tru, i no nid blong stopem wan frensip sipos yu harem nogud from wan fasin o aksen blong boefren o gelfren blong yu, we i mekem wan taem nomo. (Ol Sam 130:3) Be taem Sarah i luksave se plante taem Jon i no gat fasin ya blong soem respek, hem i disaed blong no moa frenem Jon.

 Be olsem Jill mo Serah, ?yu save mekem wanem sipos yu luksave se boefren o gelfren blong yu, i no stret wan blong yu maredem hem? !Yu no mas lego nomo olsem! Nating se i had blong akseptem, be maet i moa gud we yutufala i stop blong fren. Ol Proveb 22:3 i talem se: “Man we i tingting gud i luksave we trabol i stap kam, nao i go haed.”

 I tru, i no isi blong stopem frensip blong yu wetem boefren o gelfren blong yu. Be mared i wan samting we i blong olwe. !Taswe, i moa gud blong harem nogud smoltaem nomo naoia, i bitim we yu harem nogud olwe from yu jusum wan rong man o woman blong mared wetem!