Faswan samting blong mekem, hemia blong jusum gud wan stret taem blong tokbaot samting ya. ?Olsem wanem blong mekem?

 I gud blong tingbaot samting we yu wantem se narafala bambae i mekem long yu. (Matiu 7:12) ?Bambae yu yu glad sipos boefren o gelfren blong yu i talem long yu, long fored blong ol narafala se bambae yufala i stop blong fren? I sua se nogat.

 Sipos folem situesen blong yutufala yu luk se yutufala i mas stop blong fren, i moa gud yu no lego wan voes mesej, sanem teks o imel long hem blong talem se bambae yutufala i stop blong fren. Be yu save jusum wan stret taem mo ples we yutufala i save mit long hem, blong tokbaot impoten bisnes ya.

 ?Be bambae yu talem wanem sipos i kam long taem we yu nao yu mas toktok? Aposol Pol i talem long ol Kristin se oli mas “tok tru” long narafala.—Efesas 4:25.

 Beswan rod blong mekem, hemia se yu tok stret, be long wan fasin we i waes. Talemaot klia from wanem yu wantem stop blong frenem hem.

 Yu no nid blong talemaot long hem evri samting we yu no laekem long saed blong hem. Mo i no gud yu talem long hem se: “Yu no mekem hemia” o “Yu neva mekem olsem.” Be i moa gud yu yusum ol tok we oli soemaot filing blong yu, maet yu save talem se: “Mi nidim wan man we i . . .” o “Mi wantem se yumitu stop blong fren from we . . .”

 Hemia i no wan taem blong gat tu tingting o letem boefren o gelfren blong yu i jenisim tingting blong yu. Rimemba se yu yu jusum blong stopem frensip ya from wan impoten risen. Taswe, yu mas lukaot gud sipos boefren o gelfren blong yu i mekem sam samting blong traem jenisim tingting blong yu. Wan yangfala woman we nem blong hem Lori, i talem se: “Afta we mi stopem frensip blong mi wetem boefren blong mi, hem i stat blong soemaot se oltaem hem i harem nogud. Mi ting se hem i mekem olsem, jes blong mi sore long hem. I tru se mi sore long hem, be mi no letem ol aksen blong hem i jenisim desisen blong mi.” Olsem Lori, i gud blong savegud samting we yu wantem. Holemtaet desisen blong yu. No we yu talem, i mas minim no nomo.—Jemes 5:12.