•  ?From wanem yu mas yusum gud taem blong yu?

•  Samting we yu save mekem

•  Sam yangfala oli talem wanem

•   Taem i olsem mane. Sipos yu westem, bambae yu no moa gat taem we yu nidim. !Be sipos yu yusum gud taem blong yu, bambae yu gat sam ekstra taem i stap we yu save yusum blong mekem ol samting we yu wantem!

   Advaes blong Baebol: “Nating we man blong les i wantem plante samting, be hem i no save kasem. Man we i stap wok had, yes, hem bambae i kasem evri samting we hem i wantem.”—Ol Proveb 13:4.

   Stamba poen: Sipos yu yusum gud taem blong yu bambae yu gat plante fri taem, be i no smol.

•   Yu mas lanem blong yusum gud taem blong yu naoia, from we samting ya bambae i givhan long yu taem yu kam bigwan. Hemia i save halpem yu blong holemtaet wan wok. Traem tingbaot, sipos yu gat wan bisnes, ?bambae yu kipim wan wokman we oltaem i stap kam let long wok?

   Advaes blong Baebol: “Man we i wok gud long smol samting, hem i save wok gud long bigfala samting tu.”—Luk 16:10.

   Stamba poen: Fasin blong yusum gud taem i soemaot klia se yu yu wanem kaen man.

 Be, i tru se i no isi blong yusum gud taem blong yu. Hemia sam samting we i save mekem se i no isi.

 Samting #1: Ol fren

 “Sipos ol fren oli askem mi blong go aot wetem olgeta, klosap oltaem bae mi go nating se samtaem mi no rili gat taem. Mi stap ting se, ‘Bae mi save finisim wok ya kwiktaem nomo taem mi kambak long haos.’ Be oltaem samting ya i no hapen, mo plante taem ol samting oli go rong.”—Cynthia.

 Samting #2: Ol samting we oli pulum tingting

 “TV i olsem masin ya vakium klina. I gat sam program blong TV mo sam muvi we i had blong yu aot long olgeta.”—Ivy.

 “Mi save westem plante taem long tablet blong mi. Mi harem nogud se wan samting nomo i save stopem mi, hemia taem batri i flat.”—Marie.

 Samting #3: Pulum taem

 “Mi stap pulum taem blong mekem ol skul wok blong mi mo long ol narafala samting bakegen we mi mas mekem. Mi stap westem taem blong mi long ol krangke samting nomo, gogo las minit mi mas finisim ol skul wok blong mi. Hemia i nogud stret, mi no yusum gud taem blong mi nating.”—Beth.

1.   Raetemdaon wan lis blong ol wok we yu mas mekem. Eksampol, i gud yu raetemdaon ol wok we yu mas mekem long haos mo ol homwok blong yu. Yu raetem hamas taem we yu nidim blong spenem blong finis wanwan wok ya long wan wik.

    Advaes blong Baebol: “Faenemaot ol samting we oli moa impoten.”—Filipae 1:10.

2.   Raetemdaon wan lis blong ol samting we yu laekem blong mekem long fri taem blong yu. Yu save putum long lis blong yu ol samting olsem, taem blong go long intenet mo taem blong wajem TV. Mo, i gud blong yu raetemdaon hamas aoa we yu spenem long wanwan samting ya long wan wik.

    Advaes blong Baebol: ‘Yu mas gohed blong wokbaot long fasin we i waes, yu yusum gud taem blong yu.’—Kolosi 4:5.

3.   Mekem wan plan. Yu luklukbak long tufala lis ya we yu mekem. ?Olsem wanem? ?Yu yu putum inaf taem blong yu save spenem blong mekem ol samting we oli moa impoten? ?Yu nidim blong katemaot sam aoa long ol samting we yu mekem long fri taem blong yu?

    Traem Hemia: Evri dei yu mekem wan lis blong ol samting we yu mas mekem, mo taem yu finisim wan wok, yu makem se i finis.

    Advaes blong Baebol: “Man we i mekem gudfala plan mo i stap wok strong long hem, hem i save kasem plante samting.”—Ol Proveb 21:5.

4.   Folem plan blong yu. I tru, maet yu mas talem no long wan invetesen we yu kasem blong yu mekem ol samting we oli moa impoten. Be taem yu tingting gud, bambae yu faenemaot se yu gat plante moa fri taem, mo bambae yu harem gud moa.

    Advaes blong Baebol: ‘Yu mas wok had, yu no pleplei long wok.’—Rom 12:11, futnot.

5.   Yu wok had fastaem, biaen yu jes spel. Wan yangfala gel we nem blong hem Tara, i talem se: “Samtaem mi finisim tu samting long lis blong mi mo afta mi tingbaot se, ‘OK bae mi wajem TV blong 15 minit nomo mo afta bae mi mekem sam moa wok bakegen.’ Blong talem stret, 15 minit we mi talem, i kam 30 minit, afta 1 aoa, mo afta mi jes sek se mi westem 2 aoa blong wajem TV.”

    ?Olsem wanem blong winim problem ya? I gud we yu tingbaot spel olsem wan presen we yu kasem from we yu finisim ol wok we yu mas mekem, be i no wan samting we yu kasem olsem nomo long wan dei.

    Advaes blong Baebol: “I no gat samting we i gud moa bitim we wan man, . . . i haremgud from ol hadwok blong hem.”—Prija 2:24, NW.