•  ?Boe i pleplei wetem filing blong gel o gel i pleplei wetem filing blong boe, i minim wanem?

•  ?From wanem samfala oli mekem fasin ya?

•  ?Wanem ol trabol we i save kamaot?

•  ?Sam yangfala oli talem wanem?

 Sam man oli ting se sipos wan gel i wantem soemaot long wan boe se hem i laekem hem, hem i mas talem ol toktok mo mekem ol aksen blong pleplei wetem filing blong hem. ?I rong blong gel i soemaot se i gat filing long boe o boe i soemaot se i gat filing long gel? Maet i no rong. Wan gel we nem blong Ann, i talem se: “Sipos yu laekem wan boe mo yu gat naf yia blong frenem hem, i no gat narafala rod blong faenemaot sipos hem tu i gat sem filing.”

 Be long haf ya, yumi tokbaot wan we i mekem olsem se hem i gat filing long narawan, be i no gat tingting blong frenem hem blong i mared wetem hem.

 “Taem yu wantem frenem wan boe, i stret blong soemaot se yu gat filing long hem. Be taem yu no gat tingting blong mared, i no stret nating blong mekem hem i harem se yu gat filing long hem, nao biaen, wantaem nomo, yu lego hem.”—Deanna.

 Sam gel oli pleplei wetem filing blong ol boe from we i mekem olgeta oli harem gud. Wan gel we nem blong hem Haley, i talem se: “Taem yu luk se yu naf blong pulum filing blong wan boe, yu wantem gohed nomo blong mekem.”

 Sipos yu givim tingting long wan boe se yu gat filing long hem be yu no rili wantem frenem hem, yu soemaot se yu ting nating long filing blong hem. Mo tu, yu soemaot se yu no naf blong mekem wan desisen. Baebol i talem se: “Man we i no gat gudfala tingting, hem i stap glad long ol krangke fasin.”—Ol Proveb 15:21.

 I stret nomo we Haley i finisim toktok blong hem olsem: “Long stat, maet pleplei wetem filing blong wan boe i no mekem trabol, be long en, plante taem trabol i kamaot.”

•   Yu save spolem gudnem blong yu

   “Gel we i pleplei wetem filing blong wan boe i soemaot se hem i stap fraet mo i gat tingting olsem pikinini nomo. Yu harem olsem se hem i stap giaman long yu mo i stap traem blong kasem samting blong hem wan nomo.”—Jeremy.

   Baebol i talem se: “Man we i gat lav, . . . hem i no tingbaot hem wan nomo.”—1 Korin 13:4, 5.

   Blong tingbaot: ?Wanem kaen toktok mo aksen i save mekem ol narafala oli tingbaot yu olsem wan man we i stap pleplei wetem filing blong ol gel o ol boe?

•   Yu spolem gel o boe we yu pleplei wetem filing blong hem.

   “Taem mi luksave se wan boe i stap pleplei wetem filing blong mi, mi wantem go longwe long hem. Mi harem olsem se hem i stap storian wetem mi nomo from we mi wan gel. Ol boe we oli pleplei wetem filing blong mi, oli no kea long mi, be oli wantem nomo blong harem gud.”—Jaqueline.

   Baebol i talem se: “I nogud man i stap lukaot rod we i save givhan long hem nomo. Hem i mas lukaot rod blong givhan long ol narafala man.”—1 Korin 10:24.

   Blong tingbaot: ?I gat wan taem we wan boe o gel i givim tingting long yu se hem i gat filing long yu, be yu faenemaot biaen se i no tru? Sipos yes, ?yu harem olsem wanem? ?Yu save mekem wanem blong no spolem narafala olsem?

•   I mekem i had blong frenem wan boe o gel blong mared wetem.

   “Wan boe we i pleplei wetem filing blong mi i no wan boe we bambae mi wantem mared long hem o frenem hem. I had blong save gud o trastem wan boe sipos hem i stap giaman long mi olsem.”—Olivia.

   Deved i raetem Sam ya long Baebol, i se: “Mi stap longwe long olgeta we oli stap haedem prapa fasin blong olgeta.”—Ol Sam 26:4.

   Blong tingbaot: ?Wanem kaen gel bambae i laekem boe we i pleplei wetem filing blong hem? ?Yu ting se hemia nao kaen gel we yu yu wantem pulum?