OL YANGFALA OLI ASKEM
?Boe o Gel Ya i Stret Long Mi?
?Yu yu faenem wan boe o wan gel we maet i save kam wan gudfala hasban o waef? Sipos yes, ?olsem wanem yu save se hem i stret long yu?
I impoten we yu traem faenemaot ol fasin blong hem we oli haed, we bambae i soemaot sipos hem i save kam wan gudfala hasban o waef. Antap long hemia, maet gel ya i naes, be ol man oli no trastem hem o maet wan boe i popiula be hem i no gat ol gudfala fasin. Yu wantem wan boe o gel we bambae yu harem gud blong stap wetem hem, wan we i gat ol semfala fasin mo mak olsem yu.—Jenesis 2:18; Matiu 19:4-6.
Faenemaot Ol Fasin We Oli Haed
Traem faenemaot ol mak we boe o gel ya we yu intres long hem, i wantem kasem. !Be yu mas lukaot gud! From we maet yu lukluk nomo ol samting we yu wantem luk. Taswe yu mas tekem taem blong yu, mo traem faenemaot ol trufala fasin blong hem.
Taem wan boe mo gel i stap fren, plante taem tufala i no traem faenemaot ol fasin blong tufala we i haed. Be tufala i kwik blong makem ol samting we tufala tugeta i laekem, mo talem se: “Mitufala i laekem sem miusik.” “Mitufala i laekem blong mekem sem samting.” “!Mitufala i agri long evri samting!” Be yu nid blong faenemaot ol fasin we oli haed. Yu nidim blong faenemaot “ol samting we oli stap long hat.” (1 Pita 3:4; Efesas 3:16) Yu no mas fokas long ol samting ya nomo we yutufala tugeta i agri long hem, be i moa gud yu makem samting we i hapen taem yutufala i no agri long wan samting.
Eksampol, traem tingbaot ol samting ya:
?Boe o gel ya i mekem wanem taem yutufala i no agri long wan samting? ?Hem i wantem se yu folem tingting blong hem, maet i “faerap long kros” o i talem “ol tok we oli doti”? (Galesia 5:19, 20; Kolosi 3:8) ?O hem i soemaot se hem i gat stret tingting, i rere blong folem tingting blong yu blong mekem se i gat pis, sipos samting we yu talem i no agensem ol rul blong God?—Jemes 3:17.
?Hem i pulum yu blong mekem samting we hem nomo i wantem, i wantem se yu lavem hem nomo, o i jalus? ?Hem i wantem save evri samting we yu stap mekem? Nicole i talem se: “Mi harem stori blong sam boe mo gel we oli stap fren, mo oli stap faet from we narawan i no ring o letem narawan i save ples we hem i stap go long hem. Long tingting blong mi hemia i wan rabis saen.”—1 Korin 13:4.
?Wanem tingting blong ol narafala long boe o gel ya? Maet i gud yu askem long samfala we oli save gud hem longtaem, olsem olgeta we oli bigman long tingting, we oli stap long kongregesen, blong oli talemaot long yu se hem i olsem wanem. Olsem nao, bambae yu save sipos hem i “wan gudfala man” o nogat.—Ol Wok 16:1, 2.
