Leta i go long Jemes 4:1-17
4 ?Wanem nao i stamba blong ol faet mo ol raorao blong yufala? Hemia ol nogud samting we yufala nomo i wantem, we oli stap faet blong kontrolem bodi blong yufala, ?i tru?+
2 Samting we yufala i wantem, yufala i no kasem. Yufala i no laekem nating ol narafala, mo yufala i stap kavetem ol samting, be yufala i no kasem yet. Yufala i stap faet mo yufala i stap raorao.+ Yufala i no kasem samting ya from we yufala i no askem long God.
3 Mo taem yufala i askem, yufala i no kasem from we yufala i gat nogud tingting, yufala i wantem yusum samting ya, blong mekem ol nogud samting we yufala nomo i wantem.
4 Yufala i olsem woman we i stap mekem adaltri.* ?Yufala i no save se man we i fren gud wetem wol ya, hem i kam badfren blong God? Taswe man we i wantem fren wetem wol, hem i stap mekem hem wan i kam enemi blong God.+
5 Baebol i talem se: “Yumi gat fasin ya blong jalus, taswe oltaem yumi stap wantem tumas ol defdefren samting.” ?Yufala i ting se Baebol i talem ol tok ya blong nating nomo?+
6 Be God i kaen tumas, mo fasin ya blong hem i hae moa long fasin ya blong jalus. Taswe Baebol i talem se: “God i agensem ol man we tingting blong olgeta i antap tumas,+ be hem i kaen long ol man we tingting blong olgeta i stap daon.”+
7 From samting ya, yufala i mas putum yufala i stap aninit long God,+ be yufala i mas agensem Devel,+ mo hem bambae i ronwe long yufala.+
8 Yufala i mas kam klosap long God, nao hem bambae i kam klosap long yufala.+ Yufala ya we yufala i man blong mekem sin, yufala i mas wasem han blong yufala.+ Mo yufala we i gat tu tingting, yufala i mas mekem hat blong yufala i klin.+
9 Yufala i mas harem nogud, yufala i sore mo yufala i krae.+ I no stret blong yufala i stap laf, yufala i mas krae. I no stret blong yufala i stap glad, yufala i mas sore.
10 Long fes blong Jehova,* yufala i mas mekem tingting blong yufala i stap daon,+ nao hem bambae i leftemap yufala.+
11 Ol brata, yufala i mas stop blong tok agensem yufala.+ Man we i tok agensem brata blong hem no i jajem hem, hem i tok agensem loa mo i jajem loa. Sipos yu jajem loa, yu no man we i folem loa, be yu wan jaj.
12 Be i gat wan man nomo we i Man Blong Givim Loa mo i Jaj.+ Hem nomo i naf blong sevem man, mo i naf blong spolem laef blong man.+ Taswe, ?yu yu hu blong yu jajem neba blong yu?+
13 Yufala i lesin long mi, yufala ya we i stap talem se: “Tede o tumoro bambae yumi go long wan taon, mo yumi stap wan fulyia long ples ya, mo bambae yumi mekem bisnes blong winim plante mane.”+
14 Yufala i no save se tumoro laef blong yufala bambae i olsem wanem.+ Yufala i olsem smok we i stap smoltaem nomo, nao biaen i lus.+
15 Taswe i moa gud yufala i talem se: “Sipos hem i wil blong Jehova,*+ bambae yumi laef, mo yumi mekem samting ya, o samting ya.”
16 Be taem yufala i stap tok flas olsem, tingting blong yufala i go antap tumas. Mo ol tok flas olsem i nogud.
17 Taswe man we i save wanem samting i stret blong mekem, be hem i no mekem, hem i mekem sin.+
