?Yu yu harem se i had blong folem wan rul we papa mo mama i putum? Atikol ya bambae i givhan long yu blong save olsem wanem blong tokbaot samting ya wetem tufala.

•  Gat stret tingting

•  Wetaem mo olsem wanem blong toktok wetem tufala

•  Sam yangfala oli talem wanem

 Tingting we i giaman: Taem yu kam bigman mo yu no moa stap wetem papa mo mama, bambae yu no moa nid blong folem ol rul.

 Trutok: Taem yu no moa stap wetem papa mo mama, bambae i gat ol rul yet we yu mas folem. Bambae yu mas folem ol rul we bos blong yu i putum, ol rul we ona blong renhaos i putum, mo ol rul we gavman i putum. Danielle we i gat 19 yia i talem se: “Ol yangfala we oli no save obei long ol rul blong papa mo mama, bambae oli save kasem bigfala trabol taem oli kam bigman.”

 Baebol i talem se: ‘Yumi mas obei long ol gavman mo ol haeman.’ (Taetas 3:1) Sipos yu lanem blong folem ol rul blong papa mo mama, hemia bambae i trenem yu blong yu save folem ol defdefren rul taem yu kam bigman.

 Samting we yu save mekem: Tingbaot olsem wanem ol rul ya oli save givhan long yu. Wan yangfala we nem blong hem Jeremi i talem se: “Ol rul blong papa mo mama oli givhan long mi blong jusum gud ol fren blong mi mo yusum gud taem blong mi. Mo tu, ol rul ya oli givhan long mi blong mi no westem tumas taem blong wajem TV mo pleplei ol video gem. Mi lanem blong yusum gud taem blong mi blong mekem sam narafala samting, we naoia mi laekem yet blong mekem.”

 ?Be olsem wanem sipos yu harem se wan rul we tufala i putum i no stret? Wan gel we nem blong hem Tamara i talem se: “Papa mo mama blong mi i letem mi mi travel i go long wan narafala kantri. Be taem mi kambak, tufala i no iven letem mi mi go long wan taon we i tekem 20 minit nomo blong kasem.”

 Sipos yu tu yu no kasem save long wan rul we papa mo mama i putum, ?bambae i oraet blong tokbaot wetem tufala? Yes, i oraet nomo. Be i impoten we yu tingbaot wetaem blong tokbaot samting ya, mo olsem wanem blong tokbaot long tufala.

 ?Wetaem blong tokbaot? Wan yangfala we nem blong hem Amanda i talem se: “Sipos yu wantem askem papa mo mama blong tufala i jenisim wan rul, fastaem yu mas soemaot se yu stap obei long ol rul blong tufala mo tufala i save trastem yu.”

 Wan gel we nem blong hem Daria i luk se hemia i tru. Hem i talem se: “Taem mama blong mi i luk se mi stap obei oltaem long hem, hem i glad moa blong jenisim wan rul.” Tingbaot se yu no save fosem narafala blong i trastem yu, be yu mas soemaot long ol aksen blong yu se oli save trastem yu.

 Baebol i talem se: “Yu mas folem gud komanmen blong papa blong yu, mo yu no mas sakemaot tijing blong mama blong yu.” (Ol Proveb 6:20) Sipos yu folem advaes ya, bambae papa mo mama blong yu i trastem yu mo bambae tufala i glad moa blong lesin long samting we yu wantem talem.

 ?Olsem wanem blong tokbaot? Wan yangfala we nem blong hem Steven i talem se: “Taem yu storian wetem papa mo mama, oltaem i gud moa blong toktok wetem kwaet fasin mo respek, i bitim we yu komplen o yu faerap long kros.”

 Daria we yumi tokbaot hem finis, i talem se: “Taem we mi mo mama i rao, hem i no save jenisim wan rul. Mo samtaem hem i mekem rul ya i kam strong moa.”

 Baebol i talem se: “Man we i stupid, hem i letem ol filing blong hem oli kamaot, be man we i waes, hem i stap kwaet nomo, i holemtaet ol filing blong hem.” (Ol Proveb 29:11) Sipos yu lanem blong bos long tingting blong yu, hemia bambae i givhan bigwan long yu taem yu stap wetem ol famle, mo antap moa taem yu stap long skul, long wok, mo long eni narafala ples.

 Samting we yu save mekem: Tingting gud bifo we yu toktok. Maet yu mekem plante gudfala samting blong papa mo mama i trastem yu, be sipos yu faerap long kros, wantaem nomo hemia i save spolem gudfala tingting we tufala i gat long yu. Taswe Baebol i talem se “man we i no save kros kwik, hem i gat fasin luksave.”—Ol Proveb 14:29.

 Traem hemia: Tingbaot from wanem papa mo mama i putum ol rul, mo sipos yu wantem yu save tokbaot ol rul ya wetem tufala.