Nuuni Yihoowa Markkati, Kiristtaanetu timirttiyaa, hegeekka Yesuusi tamaarissidobaanne I erissiyo ashkkarati oottidobaa minttidi kaallanawu baaxetoos. Ha huuphe yohoy nu ammanuwaabaa qanttan yootees.

1.   Xoossaa. Nuuni goynniyo Xoossay Ubbabaa Danddayiyaagaa, Medhdhidaagaanne, A sunttay Yihoowa giyo issi tumu Xoossaa. (Mazamure 83:18, NW; Ajjuutaa 4:11) I Abrahaama, Muusanne, Yesuusa Xoossaa.—Kessaabaa 3:6; 32:11; Yohaannisa 20:17.

2.   Geeshsha Maxaafaa. Geeshsha Maxaafaa Xoossay asawu ba ayyaanan Xaafissidoogaa ammanoos. (Yohaannisa 17:17; 2 Ximootiyoosa 3:16) “Galˈˈa Maachaanne” “Ooratta Maachchaa” geetettiya ha 66n maxaafatun nu ammanoy baasettiis. Josen D. Beduhan giyo profeeseree Yihoowa Markkatu ammanuwaabaa xaafiiddi hagaadan giis: “Eta ammanoynne eti oottiyoobay Geeshsha Maxaafan baasettanaadan oottoosonappe attin issibaa kaseti kuuyi simmidi hegawu haniya qofaa Geeshsha Maxaafaappe koyokkona.” a

    Nuuni Geeshsha Maxaafaa kumettaa ammanoos. SHin nuuni Geeshsha Maxaafaa akeekanawu maliyo wode, Geeshsha Maxaafan deˈiya issi issi qofay polettidabaa, woy sinttappe polettanabaa; haray qassi issibawu eeshodan woy leemiso hanotan odettidoogaa akeekoos.—Ajjuutaa 1:1.

3.   Yesuusa. Nuuni Yesuus Kiristtoosa timirttiyaanne A leemisuwaa kaalloos A nuna ashshiyaabaadaaninne Xoossaa Naˈaadan xeellidi A bonchchoos. (Maatiyoosa 20:28; Oosuwaa 5:31) Yaatiyo gishshawu, nuuni Kiristtaaneta. (Oosuwaa 11:26) SHin, Yesuusi Ubbaa Danddayiya Xoossa gidennaagaanne, sillaase timirttiyaa Xoossaa Qaalay tamaarissennaagaa Geeshsha Maxaafaappe erida.—Yohaannisa 14:28.

4.   Xoossaa Kawotettaa. Xoossaa Kawotettay Kiristtaanetu wozanan deˈiyaaba gidennan, saluwan deˈiya tumu haaro. He Kawotettay asaa haaruwaa muleera xayssidi Xoossaa shenee saˈan polettanaadan oottana. (Daaneela 2:44; Maatiyoosa 6:9, 10) Geeshsha Maxaafaa hiraagay yootiyoogaadan, nuuni deˈiyoy ‘wurssetta gallassaana’ gidiyo gishshawu, mata wodiyan he Kawotettay hegaa polana.—2 Ximootiyoosa 3:1-5; Maatiyoosa 24:3-14.

    Yesuusi saluwan deˈiya Xoossaa Kawotettaa Kawuwaa. I 1914n haariyoogaa doommiis.—Ajjuutaa 11:15.

5.   Atotettaa. Yesuusa wozuwaa yarshshoy nagaraappenne hayquwaappe laˈa kessees. (Maatiyoosa 20:28; Oosuwaa 4:12) He yarshshuwaappe issi asi goˈettanawu Yesuusan ammaniyoogaa xalla gidennan, ba deˈuwan laamettananne xammaqettana koshshees. (Maatiyoosa 28:19, 20; Yohaannisa 3:16; Oosuwaa 3:19, 20) Issi uri oottiyoobay A ammanoy paxa deˈiyoogaa bessees. (Yaaqooba 2:24, 26) SHin, nuuni atotettaa demmiyoy hegee nuussi bessiyo gishsha gidennan, “Xoossaa aaro kehatettaa” gishshataassa.—Galaatiyaa 2:16, 21.

6.   Saluwaa. Xoossaa Yihooway, Yesuus Kiristtoosinne ammanettida kiitanchchati deˈiyo ayyaana alamiyaa. b (Mazamure 103:19-21; Oosuwaa 7:55) Saluwaa Kawotettan Yesuusaara haaranawu amarida asati, hegeetikka144,000 hayquwaappe denddana.—Daaneela 7:27; 2 Ximootiyoosa 2:12; Ajjuutaa 5:9, 10; 14:1, 3.

7.   Saˈaa. Xoossay saˈaa medhdhidoy asay merinawu deˈiyoosa gidanaadana. (Mazamure 104:5; 115:16; Eranchchaa 1:4) Azazettiya asawu gannate gidana saˈan kumetta payyatettaanne merina deˈuwaa immiyoogan Xoossay eta anjjana.—Mazamure 37:11, 34.

8.   Iitatettaanne waayiyaa. Xoossaa kiitanchchatuppe issoy makkaliyo wode hegee doommiis. (Yohaannisa 8:44) Makkalidoogaappe guyyiyan “Seexaanaa” qassi “Daabiloosa” geetettida ha kiitanchchay koyro azinaynne machchiya awu exatanaadan denttettiis; qassi eta gaasuwan merettida metoy eta yeleta ubbaassi gakkiis. (Doomettaabaa 3:1-6; Roome 5:12) Seexaanay denttido oyshawu zaaroy beettanaadan Xoossay iitatettaynne waayee deˈanaadan eeno giikkonne, hegee merinawu deˈanaadan oottenna.

9.   Hayquwaa. Hayqqida asay aybanne erenna. (Mazamure 146:4; Eranchchaa 9:5, 10) Eti siˈooliyaa taman xuugettokkona.

    Xoossay biilooniyan qoodettiyaageeta hayquwaappe denttana. (Oosuwaa 24:15) SHin hayquwaappe denddi simidikka Xoossaa ogiyaa kaallanawu ixxiyaageeti zaarettidi denddiyo hidootay baynna hanotan merinawu xayana.—Ajjuutaa 20:14, 15

10.   So Asaa. Xoossay aqo deˈuwawu kessido koyro maara, hegeekka issi attuma asinne issi macca asi eketti gelettana bessiyoogaa ammanoos; qassi issoy issuwaappe paraman shaahettana danddayiyoy shaaramuxiyo wode xallaana. (Maatiyoosa 19:4-9) Geeshsha Maxaafan deˈiya aadhdhida eratettay so asaa deˈoy ufayssiyaagaa gidanaadan maaddiyoogaa ammanoos.—Efisoona 5:22–6:1.

11.   Nu Goynuwaa. Nuuni goynuwawu masqqaliyaa woy hara misileta goˈettokko. (Zaarettido Wogaa 4:15-19; 1 Yohaannisa 5:21) Nuuni nu goynuwan xoqqu oottidi xeelliyoogeetuppe waannatiyaageeti hageeta:

    •   Xoossawu woossiyoogaa.—Piliphphisiyuusa 4:6.

    •   Geeshsha Maxaafaa nabbabiyoogaanne xannaˈiyoogaa.—Mazamure 1:1-3.

    •   Geeshsha Maxaafaappe nabbabidobaa wotti denttidi qoppiyoogaa.—Mazamure 77:12.

    •   Woossanawu, Geeshsha Maxaafaa xannaˈanawu, yexxanawu, nu ammanuwaa qonccissanawu, qassi nu mala Kiristtaanetanne harata minttettanawu issippe shiiqiyoogaa.—Qolasiyaasa 3:16; Ibraawe 10:23-25.

    •   ‘Kawotettaa wonggeliyaa mishiraachchuwaa’ markkattiyoogaa.—Maatiyoosa 24:14.

    •   Maadoy koshshiyoogeeta maaddiyoogaa.—Yaaqooba 2:14-17.

    •   Kumetta saˈan Geeshsha Maxaafaa tamaarissiyo oosuwawu goˈettiyo SHiiqo Addaraashatanne hara keettata keexxiyoogaanne bottokoniyoogaa.—Mazamure 127:1.

    •   Daafabay gakkidoogeeta maaddiyoogaa.—Oosuwaa 11:27-30.

12.   Nu Dirijjitiyaa. Nuuni gubaaˈiyan gubaaˈiyan darajjayettida; qassi ubba gubaaˈiyan cimataa shiishshiya uri deˈees. SHin he cimati qeeseta gidokkona, qassi miishshay etawu qanxxettenna. (Maatiyoosa 10:8; 23:8) Nuuni asirataa shiishshokko, nu shiiqotunkka gidin miishsha asappe shiishshokko. (2 Qoronttoosa 9:7) Nu oosoy ubbay issi uri ba dosan immiyo miishshan oosettees.

     Waanna biiruwan haggaaziya kaymanne qoodan guutta gidida, Bolla Giidi Heemmiyaagee kumetta saˈan deˈiya Yihoowa Markkatussi kaaletuwaa immees.—Maatiyoosa 24:45

13.   Nu Issippetettaa. Kumetta alamiyan deˈiya Yihoowa Markkati issi malabaa ammanoosona. (1 Qoronttoosa 1:10) Qassi duree hiyyeesaa giyoogan, zariyan, qommon woy sheeshshan issoy issuwaappe shaakkenna mala minnidi baaxetoos. (Oosuwaa 10:34, 35; Yaaqooba 2:4) SHin hegaa giyo wode nu koyiyoobaa dooriyo maataynne nu buzo qofay deˈenna giyoogaa gidenna. Ubba Yihoowa Markkay Geeshsha Maxaafaa maaran loohida ba kahaa goˈettidi bawu kuuyees.—Roome 14:1-4; Ibraawe 5:14.

14.   Nu Eeshshaa. Nuuni oottiyo ubbabaa siiquwan oottanawu baaxetoos. (Yohaannisa 13:34, 35) Suutta ekkiyoogaa gujjin Xoossaa ufayssenna oosotuppe haakkoos. (Oosuwaa 15:28, 29; Galaatiyaa 5:19-21) Nuuni asaara saruwan deˈoos; qassi olaa olettokko. (Maatiyoosa 5:9; Isiyaasa 2:4) Nuuni nu biittaa kawotettaa bonchchoos; qassi Xoossaa higgiyaa nu kanttanaadan oottiyaabaa gidana xayikko kawotettay kessido higgiyawu azazettoos.—Maatiyoosa 22:21; Oosuwaa 5:29.

15.   Haratuura Gayttidaagan. Yesuusi hagaadan azaziis: “Neeni ne shooruwaa ne huuphedan siiqa.” Qassi I Kiristtaaneti “sa7aassa gidokkona” yaagiis. (Maatiyoosa 22:39; Yohaannisa 17:16) Yaatiyo gishshawu, nuuni ‘asa ubbawu loˈˈobaa oottanawu baaxetoos’; gidikkonne polotikaaban oossinne mule exatokko qassi hara haymaanootetuura eammanuwaa issippetettaa medhdhokko. (Galaatiyaa 6:10; 2 Qoronttoosa 6:14) SHin hegaara gayttidaagan haraati kuuyidobaa bonchchoos.—Roome 14:12.

 Yihoowa Markkatu ammanuwaabaa ne eranawu koyiyo hara oyshay deˈikko, nu websaytiyaappe gujjada nabbabana, nu macara biirotuppe issuwawu oychchana, neeyyo matattiya SHiiqo Addaraashan shiiqana, woy ne heeran deˈiya Yihoowa Markkatuppe issuwaa oychchana danddayaasa.