Nuuni ha alamee xayanawu matido ‘wurssettaa wodiyan’ woy “wurssetta gallassi” deˈiyoogaa bessiya, alamiyan haniyaabaanne asaa eeshshaabaa Geeshsha Maxaafay yootees. (Maatiyoosa 24:3) Geeshsha Maxaafay ha wodiyaa, ‘wurssettaa gallassaa,’ ‘wurssettaa wodiyaa’ woy ‘wodiyaa wurssettaa’ giidi yootees.—2 Ximootiyoosa 3:1; Daaneela 8:19

 Darobati bolli bollan hananaagaanne hegeeti wurssettaa gallassaa shaakki erissiya ‘malaata’ gidanaagaa Geeshsha Maxaafay kasetidi yootiis. (Luqaasa 21:7) Amarida leemisota beˈa:

 Kumetta saˈan olay deˈana. Yesuusi hagaadan giis: “Issi biittaa asai hara biittaa asaara olettana.” (Maatiyoosa 24:7) Hegaadankka, Ajjuutaa 6:4y olaa bessiya paraa toggidaagee ‘saˈan olaa denttanaagaa’ yootees.

 Koshay denddana. Yesuusi hagaadan giis: ‘Koshay ubbasan deˈana.’ (Maatiyoosa 24:7) Ajjuutaa maxaafay saˈa ubban koshay deˈanaadan oottiya hara paraa toggidaagaabaa yootees.—Ajjuutaa 6:5, 6

 Wolqqaama biittaa qaattay deˈana. Yesuusi “biittaa qaattai ubbasan” deˈanaagaa yootiis. (Maatiyoosa 24:7; Luqaasa 21:11) Wolqqaama biittaa qaattay awudeegaappenne aaruwan daro asay waayettanaadaaninne hayqqanaadan oottiis.

 Harggee ubbasan deˈana. Yesuusi yootidoogaadan, asaappe asaa oyqqiya harggee, woy ubbasaa gakkiya harggee deˈana.—Luqaasa 21:11.

 Danobay darana. Danobay daro xeetu layttaappe doommidi deˈiyaaba gidikkonne, wurssettaa gallassan ‘makkalay daranaagaa’ Yesuusi yootiis.—Maatiyoosa 24:12.

 Saˈay moorettana. Asay saˈaa mooranaagaa Ajjuutaa 11:18y yootees. Eti makkalabaa oottiyoogaa xallan gidennan, saˈaa mooriyaabaa oottiyoogankka hegaadan oottoosona.

 Asaa eeshshay iita gidana. Geeshsha Maxaafay 2 Ximootiyoosa 3:1-4n yootiyoogaadan, daro asati “galatennaageeta, geeshshatetti bainnaageeta, . . . sigettennaageeta, zigirssanchchata, banttana naagennaageeta, kehennaageeta, lo77obaa dosennaageeta, kashi erikke giyaageeta, eesotiyaageeta, otoruwan sugettiyaageeta” gidana. Asaa eeshshay keehi iita gidido gishshawu, ha wodee genccanawu ‘waayissiya wodiyaa’ geetettiis.

 So asay issoy issuwaara darin siiqettenna. Geeshsha Maxaafay 2 Ximootiyoosa 3:1-4n, daroti bantta so asaa ‘siiqennaageetanne’ naati “banttana yelidaageetuyyo azazettennaageeta” gidanaagaa yootees.

 Asay Xoossaa darin siiqenna. Yesuusi hagaadan giis: “Daro asaa siiqoi irxxana.” (Maatiyoosa 24:12) Daro asay Xoossaa siiqiyo siiqoy irxxanaagaa Yesuusi yootiis. Hegaadankka, 2 Ximootiyoosa 3:4y wurssettaa gallassi hegaa mala asati “Xoossaappe aattidi, ufaittiyoobaa dosiyaageeta” gidanaagaa yootees.

 Haymaanootiyaa kaalliyaageeti cimmiyaageeta gidana. Geeshsha Maxaafay 2 Ximootiyoosa 3:5n, asay Xoossawu goynniyaaba milatikkonne, I kessido maaraadan deˈennaagaa yootees.

 Geeshsha Maxaafan odettida hiraagata asay kaseegaappe aaruwan akeekana. ‘Wurssettaa wodiyan,’ Geeshsha Maxaafaa hiraagata akeekiyoogaa gujjin, Geeshsha Maxaafaa eray daranaagaa Daaneela maxaafay yootees.—Daaneela 12:4.

 Kumetta saˈan sabbakiyo oosoy oosettana. Yesuusi hagaadan giis: “Kawotettaa wonggeliyaa mishiraachchoi sa7a ubban odettana.”—Maatiyoosa 24:14.

 Asay kaseegaappe aaruwan siyanawu koyennaagaanne qilliicciyaagaa gidana. Ha alamiyaa wurssettay matidoogaa bessiya naqaashaa daro asay ammanennan ixxanaagaa Yesuusi yootiis. (Maatiyoosa 24:37-39) Hegaappe aaruwan, amaridaageeti hegaa qilliiccanaagaanne siyennan ixxanaagaa 2 PHeexiroosa 3:3, 4y yootees.

 Hiraagati ubbaykka polettana. Yesuusi yootidoogaadan, wurssettaa gallassaabaa yootiya hiraagatuppe amaridaagee woy dariya bagga xallay gidennan, ubbay issi kutti polettana.—Maatiyoosa 24:33.

 Ee. Alamiyan haniyaabatinne Geeshsha Maxaafaa wodiyaa qooday bessiyoogaadan, Koyro Alamiyaa Olay doommido 1914n wurssettaa gallassay doommiis. Ha alamiyan haniyaabati nuuni wurssettaa gallassan deˈiyoogaa waati qonccissiyaakko kaalliya biiduwaappe akeeka:

 Xoossaa Kawotettay 1914n saluwan haariyoogaa doommiis; qassi he kawotettay oottidobaappe koyroy Seexaanaa Dabloosanne daydanttata saˈawu oliyoogaa. Yaatiyo gishshawu, eti qohana danddayiyoy saˈaa xalla. (Ajjuutaa 12:7-12) Seexaanay asaa eeshshaynne eti haniyoobay iita gidanaadan oottiis; hegee wurssetta gallassay genccanawu ‘waayissiyaagaa’ gidanaadan oottiis.—2 Ximootiyoosa 3:1.

 Ha waayissiya wodiyan hanettiyaaban daroti unˈˈettoosona. Eti asay issippetettan waani deˈanaakko mule erennabadan qoppoosona. Ubba amaridaageeti, asay issoy issuwaa muleera xayssana giidi hirggoosona.

 Gidikkonne, ha alamiyan haniyaabatun unˈˈettiya harati sinttappe ufayssiyaabay yaana giidi hidootoosona. Mata wode Xoossaa Kawotettay saˈan deˈiya meto ubbaa xayssanaagaa eti ammanettoosona. (Daaneela 2:44; Ajjuutaa 21:3, 4) Xoossay ba gelido qaalaa polana wodiyaa eti danddayan naagoosona; qassi “wurssettaa gakkanaashin gencciya urai attana” giidi Yesuusi yootidoban minettoosona.—Maatiyoosa 24:13; Mikiyaasa 7:7.